हिन्दूतय्त छाय् ख्वयेकूगु ?

सम्पादकजु,

नेपाःया इतिहासय् गबलें मजूनि कथं सम्पूर्ण हिन्दूतय् तःधंम्ह द्यः पशुपतिनाथया पुजा तकं मजुयाच्वंगु तसकं हिसि मदुगु खँ खः धायेमाः । माओवादीया सरकारं तसकं हे हिसि मदुगु ज्या यानाः पशुपतिइ थः यःम्ह मन्त्री नियुक्ति यायेगु थें यानाः पुजारी नियुक्त यानाः देशय् गन्जागोल अवस्था हया बिल । थ्व तसकं बांमलाः । माओवादी धाःपिं ला द्यः हे माने मयाईपं खः । उमिसं पशुपतिइ न्ह्यागु जूसां छु धकाः अथे याःगु जुइ लाःसा । तर माओवादी द्यः माने मयाईपं जुल धायेवं फुक्क हे उपिं थें जुइ धइगु ला मदुनि । थौं पशुपतिनाथया स्नान तकं मजुयाच्वंगु खँ न्यनाः नेपाः जक मखु भारतय् च्वंपिं हिन्दूत तकं दुःखित जुयाच्वंगु दु । भारत जक मखु सारा विश्वया हे हिन्दूत मर्माहत जुयाच्वंगु दयेमाः । सारा विश्वया हिन्दूतय्त ख्वयेकाः माओवादीयात छु दइ उमिसं थुकिया लिच्वः अवश्य भोगे यायेमाली । कुमारीयात लाक्वपाक्व धाःगुलिं गथे एमालेया नेता विद्या भण्डारीया हिया ल्वय् जूगु खः थौं पशुपतिनाथयात लाथेपाथे याःगुलिं माओवादीया नेतातय्त नं अथे जुइ तिनि ।

- तिलक श्रेष्ठ,
न्ह्यःखा, येँ ।

More Stories Like this