भारतया सेनाध्यक्षयात हाकुगु ध्वाँय्
येँ (सन्ध्या टाइम्स)/थनिंनिसें नेपाः भ्रमण यायेत्यंगु भारतीय सेनाया सेनापति दिपक कपुरयात थौं नेपाः थ्यनेवं हे माओवादी कार्यकर्तातय्सं हाकुगु ध्वाँय् क्यनीगु जूगु दु। उकिया निंतिं थौं सुथंनिसें हे एअरपोर्टंनिसें तिंख्यःस्थित जंगी अड्डा तकया थाय्थासय् माओवादी कार्यकर्तात हाकुगु ध्वाँय् ज्वनाः उपस्थित जुयाच्वने धुंकूगु दु ।
भाजु कपुरं नेपालय् माओवादी सेनायात नेपाली सेनाय् समायोजन याये मजिउ धकाः बिचाः तयादीगु कारणं वय्कःया विरोधय् थ्व हाकुगु ध्वाँय् क्यनेत्यंगु खः।
लिसें भारतीय सेनाया थ्व नेपाः भ्रमण नापनापं हे भारतं नेपाःयात थीथी कथंया ल्वाभः नं छ्वया हइगु जूगुलिं उकियात नं विरोध याये कथं थौंया ज्याझ्वः यायेत्यंगु खँ धाःगु दु ।
भाजु कपुर त्रिभुवन विमानस्थलं तप्यंक तिंख्यःया सैनिक मुख्यालयय् वनीगु ग्वसाः दु। वय्कः नापं मेपिं खुम्ह सैनिक अधिकृतत नं दुसा वय्कःयात नेपाःया राष्ट्रपतिपाखें मानार्थ रथीया उपाधि बीगु ज्याझ्वः नं दु। लिसें वय्कलं नेपाः-चीनया संवेदनशील सीमा लागा मुस्ताङ्ग नं भ्रमण यानादी ।
दूतावास व सिंहदरवार धेराउ
येँ (सन्ध्या टाइम्स)/आन्दोलन याना वयाच्वंगु एनेकपा (माओवादी)या कार्यकर्ता व नेतातय्सं थौं राष्ट्रिय स्वाधिनता व नागरिक सर्वोच्चताया निंतिं धकाः थौं भारतीय राजदूतावास व सिंहदरवारय् घेराउ यायेगु ज्याझ्वः तयातःगु दु ।
थौं न्हिनय् माओवादीया केन्द्रीय नेतातय्गु नेतृत्वय् देय्या प्रमुख प्रशासनिक निकाय सिंहदरवारया मू ध्वाखा भद्रकाली लागाय् च्वनाः अथे घेराउ यायेगु नापं नाराबाजी यायेगु ज्याझ्वः तयातःगु दु ।
माओवादीया प्यंगूगु चरणया आन्दोलन ज्याझ्वः कथं थौं अथे सिंहदरवार घेराउ यायेगु ज्याझ्वः तयातःगु खःसा अनं लिपा माओवादीया नेता व कार्यकर्तात भारतीय राजदुतावासय् वनाः घेराउ याइ धकाः माओवादीया छम्ह नेतां 'सन्ध्या टाइम्स'यात जानकारी बियादीगु दु। येँया लैनचौरय् च्वंगु भारतीय दूतावास न्ह्यःने वनाः राष्ट्रिय स्वाधिनताया निंतिं भारतया हस्तक्षेप विरुद्ध माओवादीं दूतावास घेराउ यायेत्यंगु खः। उगु घेराउ ज्याझ्वः ताःलाकेगु निंतिं स्वनिगः दुनेया अप्वः यानाः कार्यकर्तात वइ धकाः माओवादीं धाःगु दु ।
