विदेशीया न्ह्यःने छ्यं क्वमछुइ

कृष्ण प्रजापति

थीथी राजनीतिक पार्टीया नेतात थौं भारतमुखी जुयाः ज्या यानाच्वंगु खँ पिहां वयाच्वंगु दु। थुलि तक कि थीथी कथंया राजनीतिक निर्णय तक नं नेपालय् च्वनाः मखुसें भारतय् च्वनाः यायेगु परिपाटी विकास जुजुं वनाच्वंगु झीसं सिउ। १२ बुँदे शान्ति सम्झौता हे भारतीय भूमिइ जूगु कारणं देशय् बृहत् शान्ति सम्झौता सम्पन्न यायेगु ज्याय् नं भारतीय पक्षया उलि हे ल्हाः दु धइगु क्यं। अझ देशय् थीथी कथंया सरकार गठन व विघटनय् नं उलि हे चर्को ढंगं विदेशीतय् चलखेल जुजुं वयाच्वंगुलिं थ्व देशया सार्वभौमिकताय् हे शंका जुजुं वनाच्वंगु दु। खास यानाः राजनीतिक समस्या वल धायेवं हे भारतमुखी जुयाः नेतातय् पलाः उखेपाखे हे धेचुलीगुलिं यानाः नं थ्व शंका स्पष्ट जुजुं वनाच्वंगु खः। लछि तक थीथी कथंया आन्तरिक तयारी यानाः माघ १० गते निसें अनिश्चितकालीन आमहडताल यायेगु घोषणा याःगु एनेकपा (माओवादीं) नं बानेश्वरय् जूगु सभाय् भारतीय पक्षनाप वार्ता यायेगु, मालिक ला भारतीय पक्ष हे खः, उमिके हे जक समस्या समाधान यायेगु ल्वाभः दु धइग अभिब्यक्ति वयेवं उगु अभिब्यक्ति प्रति तमाम राष्ट्रियता प्रेमि नेपाली जनताया ध्यान वंगु खः ।

हालया सरकार हिन्दूस्तानया नोकर कथं ज्या यानाच्वंगु स्थिति दु। अथे जुयाः नं प्रमुख प्रतिपक्षी माओवादीं आः थःपिं सरकार नाप मखु कि सरकार गुम्हेसिके निर्भर जुयाच्वंगु खः, उपिंनाप हे वार्ता यायेत तयार जुइ धयाच्वंगु खः। थ्व खँ वास्तवय् राष्ट्रियतायात ध्यान तयाः स्वयेगु खःसा मिले हे मजू। छगू ल्याखं थ्व गैर संवैधानिक ज्या खः। छम्ह राजनीतिक पार्टीया सर्वोच्च नेतां मेगु देशया सरकारनाप वार्ता यानाः थःगु देशया समस्या समाधा यायेगु धायेगु मिले जूगु खँ मखु। तर मनय् वः थें न्ववायेगु बानी दुम्ह प्रचण्डया लागिं उगु खँ उलि अजू चायापु मजुइफु। तर राजनीतिक वृत्तय् धाःसा थुगु खं छझाः हलचल मचे याना बिउगु दु। संविधानया भावना, मर्म व थःगु राष्ट्रियता हे बन्धकय् लाइकथं छगू देशया राजनेतां मेगु देशया सरकारनाप मेलमिलापया लागिं वार्ता यायेगु धइगु उलि न्ह्यइपुगु खँ मखु। संविधानया मौलिक हकय् छगू देशया नागरिक थःगु हे देशया सरकारनाप ल्वायेगु, हालेगु माग यायेगु व वार्ता यायेगु हे जक क्वःछिनातःगु दइ। तर मेमेगु देशया नेतानाप जक खँ ल्हायेगु धाःगु जूसां प्रचण्ड उलि विवादय् मवइगु खइ। तर सर्वहारा सर्वोच्चता कायम यायेगु निंतिं झिंनिदँ तक बन्दूक ल्ह्वनाः युद्ध यानावःगु छगू राजनीतिक पार्टीया सर्वोच्च नेतां विदेशी सरकारनाप वार्ता यायेगु धकाः धाक क्यनेगु गुलित पाय्छि खः ?

हिन्दूस्तानया नोकर कथं ताः ई तक थःपिं भारतय् हे च्वनाः नेपालय् उथलपुथल यानाच्वंपिं जूगु कारणं प्रचण्डयात अथे धायेत लज्याचायापु मजुइगु खइ। तर नेपाल स्वाधीन देश खः धइगु सिउपिं भारतीय नागरिक व नेपाःया सम्मान चाहे जूपिं सुं नं नेपाःमिं प्रचण्डया उगु धापूयात सही व पाय्छि धायेफुगु स्थिति मदु। नापं उगु हे झ्वलय् प्रचण्डं भारतीय गुप्तचर विभागया मुख्य मनू नापलाःगु खँयात नं नेपालीतय्सं आपत्तिजनक रुपं कायेमाःगु स्थिति वल। छगू देशया राजनेतां मेगु देशया राजनेतायात नापलायेगु पाय्छि जुइफु। छगू देशया सरकार प्रमुखं मेगु देशया सरकार प्रमुखयात नापलायेगु नं पाय्छि जुइफु। तर छगू देशया राजनेतां मेगु देशया सरकार नाप वार्ता यायेगु खँ थजु वा छगू देशया राजनेतां मेगु देशया गुप्तचर विभागया हाकिमयात नापलानाः खँल्हाबल्हा यायेगु धइगु देशया निंतिं तःधंगु हे दुर्भाग्यया खँ खः। देश गुप्तचरतय् आदेशय् हे चले जुइगु खः। विदेशी गुप्तचरतय् आदेशय् थ्व देश चले जुइगु खःसा गथे जुइ?
थथे भारतीय पक्ष प्रति माओवादी तसकं हे सतीत स्वःगुया मूख्य रहश्य नं भारतीय भूमिइ छम्ह जिलाजं थें जुयाः झिदँया जनयुद्धय् च्यादँ ला भारतय् हे च्वनाः उथलपुथल यानाच्वंगुलिं खः धइगु सीदु। च्यादँ तक प्रचण्डजु च्वंगु क्वथा थ्व खः धकाः नेपाली राजनेतातय्गु भ्रमणय् हे पार्टीया केन्द्रीय नेतातय्सं ब्रिफिङ्ग याना जूगु न्ह्यइपुगु खँ मखयेफु। अथे जुयाः नं भारतीय पक्षलिसे खँ ल्हायेगु धइगु प्रचण्ड व माओवादीया निंतिं उलि अजू गतिया खँ मखु। खँ थुलि हे जक खः कि नेपालय् राजनेतात बसोवास यायेगु गुप्त थाय् मदुगु इलय् न्ह्याबलें हे भारतय् शरण काःवनी। अले भारतं फुक्कं नेपाली राजनेतातय् गतिविधि नं मूल्यांकन यानाच्वनी। थौं संसारं नेपाः छगू सार्वभौमसत्ता सम्पन्न देश खः धकाः माने याना तयेधुंकूगु दु। अज्याःगु इलय् नापं थनया नेतात धाःसा थ्व देश छगू भारतीय भूमि खः कि स्वतन्त्र देश खः धइगु हे अलमल जुइकथंया गतिविधिइ संलग्न जुयाच्वंगु दु। म्हिगः तक देशय् दुहां मवसे अराजकता ब्वलंकाः शान्ति भंग यानाच्वंपिं राजनीतिक शक्ति आः बृहत् शान्ति सम्झौताय् हस्ताक्षर यानाः प्रतिस्पर्धी राजनीतिक स्थितिइ वयेधुंकः नं वहे अराजनीतिक गतिविधियात प्रश्रय बियाच्वनेगु धइगु पुलांगु संस्कार हाकनं हाकनं क्यनाच्वनेगु जक खः। थथे पुलांगु संस्कार क्यनेगु ज्यां न्हूगु नेपाःया सिर्जना सम्भव जुइ मखु।
नेपाली कांग्रेसया सरकारयात भारतीय कठपुतली सरकार धकाः थनया कम्यूनिष्टतय्सं न्हापा न्हापा हेला याइगु खः। नापं गुलिं सरकारय् वंगु शक्ति खः उमिगु न्हापांगु भ्रमण भारतय् हे जुइगु कारणं यानाः नं सरकार भारतमुखी जुल धकाः इलय्ब्यलय् विरोध यायेगु ज्या जू। आः वयाः नेपाली भूमिइ च्वनाः राजनीति यानाः देशय् दकलय् तःधंगु राजनीतिक शक्ति कथं कायम जुइधुंकूगु एकीकृत नेकपा माओवादीं तकं थःपिं भारतमुखी जुयाः आः नोकर नाप मखु थःपिंसं भारतीय मालिक नाप वार्ता यायेगु धाये धुनेवं ला थ्व देशयात पराधीन देश कथं हे स्वीकार याःगु खत। सरकार कतांमरि जुयाः भारतयात लय् तायेकेगु प्रवृत्ति ल्यनाच्वंतले थ्व देश पूर्ण रुपं स्वतन्त्र देश जुइ फइ मखु। सरकारय् च्वनीपिं नेता व मन्त्रीतय्सं अथे न्ह्यःने छु वल व न्ववायेगु पाय्छि मखु। जिम्मेवार नेतातय्सं जिम्मेवारीयात बांलाक पूवंके मफुत धाःसा कि उमिसं थःगु पदं राजीनामा बीमाः कि मखुसा उगु ज्या प्रति नेपाली जनतां याःगु विरोधया सामना यायेमाः। छुं होस् हे मदयेक न्ववायेगु झ्वलय् थथे विदेशी नापं वार्ताया खँ हयेगु सार्वभौम नेपाल राष्ट्र व नेपाःमि जनताया निंतिं नं तसकं हे आपत्तिजनक खँ खः ।

More Stories Like this