वाम राजनीतिया बिस्कं आयाम: ज्योति वसु

भारतीय कम्युनिष्ट पार्टीया वरिष्ठ नेता व पश्चिम बंगाल राज्यय् ताः ई तक मुख्यमन्त्री जुयाः शासन यानादीम्ह नांजाःम्ह नेता ज्योति वसु मंत। वय्कः मदयाः भारतया वाम पार्टीयात जक मखु अनया राष्ट्रिय राजनीतियात हे छगू तःधंगु धक्का लाः वंगु दु। ताःई तक उसाँय् मदयाच्वंम्ह वय्कः म्हीग मदुगु खः ।

पश्चिम बंगालयात वाम किल्ला दयेकेगु ज्याय् वय्कलं म्हितादीगु भूमिकायात सुनां नं नकारे याये फइ मखु। शासक जुयाः नं वय्कः अन थुलि लोकंह्वाः कि उगु लागाया मचा मचां तकं 'ज्योति बाबु' धाल कि श्रद्धां छ्यं क्वछुकी। वय्कः सशस्त्र युद्ध यानाः सत्ताय् थ्यंगु मखु। शान्तिपूर्ण चुनावय् ब्वति कयाः सत्ताय् च्वनाः नं ताः ई टिके जुयादीगु खः। वय्कःया थ्वहे अनुभवपाखें नेपाःया वामपन्थीत नं प्रभावित जुयाः अबलय् 'जनताको बहुदलीय जनवाद' धइगु न्हूगु सिद्धान्त समेत प्रतिपादन जूवंगु खः ।

पश्चिम बंगालया शेर खःसां वय्कः पार्टीया निष्ठापूर्ण इमान्दार कार्यकर्ता नं खः। वय्कःयात छगू इलय् भारतया प्रधानमन्त्री जुइगु प्रस्ताव नं वःगु खः। तर वय्कःया पार्टीं उकियात अस्वीकार यात। वय्कः उकिया लागिं तयार खःसां नं पार्टीं अस्वीकार याःगु कारणं वय्कलं भारतया प्रधानमन्त्री जुइगु अवसर त्वःतादिल। नेपालय् थें पार्टी हे कुचा थलाः पदय् वनेगु ज्या वय्कलं यानामदी। नेपाःया वामपन्थी नेतातय्सं वय्कःयात सम्मान ला याइ तर वय्कःपाखें सयेका कायेमानिगु आपालं खँ धाःसा अझ नं वायेत्यःफ्वाय्त्यः हे यानातःगु दनि ।

More Stories Like this