गनं पिहांवल अन हे थ्यनीगु खः ला, ग्व मसिउ !

नर्मदेश्वर प्रधान

भाषा सदां उत्थें जुइ मखु। समाजलिसे थ्व हिलाच्वनी। हिलावनी। थौंकन्हय् समाजया हिउपाः बुलुहुँ मजू। द्रुत खने दइ। घौछि न्ह्यःया खँ घौछि लिपा पायेधुंकी। वं मेगु हे रुप कायेधुंकी। थुकिया लिच्वः भाषाय् नं लाइ। थौंया भाषा म्हिगः स्वयां गन खः गन गतिशील जुइ। फूर्तिबाज खने दइ। थौंया भाय्या धाक, रवाफ मेगु हे जुइ। म्हिगःया भाय् थौंया भाय् न्ह्यःने सुतुं खनेदइ। मछाः थें, नुगः चमकंगु थें खने दइ। थौंया भाय् यक्व हे खुल्ला। फुक्का। स्वतन्त्र खने दइ। शायद समाजय् वःगु खुल्लावादं भाषाय् लाकूगु लिच्वः खयेमाः थ्व।
विशेषतः यौन भाषाय् थौंकन्हय् खनेदुगु गति बेतोडं जुइ। भाषां थौं काःगु गतिया न्ह्यःने जिं थःत गनं लिउने लाःम्ह थें। क्वपुलांगु थें अनुभव याइ। थौंया भाय् पचे याये मफु थें। न्यनेत थाकु थें। मछाः थें। मछिं थें अनुभव जुइ ।

न्हापा न्हापा यौनबारे खँ जुइ। मिसा मिजं यौनकार्यय् फँसे जुइगु घटना चर्चाय् वइ। यौन शोषणया खँ जुइ। थुज्वःगु खँ, कार्य, चर्चा बारे परिवारय्, समाजय् खँल्हाबल्हा जू। तर थुज्वःगु सन्दर्भय् छ्यलीगु भाय् थौं थें खुल्ला मजू। तप्यं मजू। पर्दां किकातःगु भाय् जुइ। 'व मिसा स्यन'। 'इपिं छथाय् क्वथाय् खापा तिनाः च्वन। नापं द्यनाच्वन।' गबलें इमित द्यनाच्वंगु खनी। लाइ। यौन क्रियायात थुज्वःगु भाषां अभिव्यक्त याइ। थुलि धायेवं हे धायेत स्वःगु खँ व्यक्त जुइ। मनूतसें थुइकी। न्ह्याथे हे अश्लील दृश्ययात नं थुज्वःगु हे भाषां व्यक्त यायेत स्वइ। थ्वयां पुलाः सटिक जुइत स्वयेगु उबलय् शिष्टतां पिनेया खँ जुइ। भाषां आँट याइ मखु ।

थौं 'लिङ्ग', 'योनी' खँग्वःत जा, केँ थें जुइ। समाजया चलनय् वइ। न्ह्यथनेत मछाः, मछिं तायेके म्वाः। न्हापा अथे मखु। मेगु हे कथं न्ह्यथनी। 'मिजंतय्', 'मिसातय्' सांकेतिक भाय् छ्यली। थुलिं हे गाना बी। माःगु थुइकेत। म्हुतु ल्हायेबलय् जक छ्यली तप्यंगु खँग्वःत। खँग्वः नग्न कथं छ्यलेगु यात 'माय् फ्वयेगु' धाइ। साधारण इलय् छ्यली मखु ।

मिसाल्वय् स्वइम्ह विशेषज्ञयात 'गाइनोलोजिष्ट' धाइ। मिसाया डाक्टर। विदेशय् मिसाया डाक्टर मिजंत जू। उबलय् नेपालय् छम्ह मिजं डाक्टर मिसा ल्वय्या विशेषज्ञ जुयाः वल। प्रसूतिगृहय् ज्या यात। तर उबलय् व डाक्टरयात ज्या याये थाकुइ। मिजं डाक्टरयात मिसातसें पचे याये मफुत। आखिर व डाक्टर नेपालय् मच्वन। बेलायतय् च्वं वन। थ्व पीदँ न्ह्यःया खँ खः। थौंकन्हय् थ्व ख्यलय् यक्व हिउपाः वयेधुंकल। थौं मिजं डाक्टरपाखें मिसा ल्वय्या उपचार जू। म्हिगःया संकीर्णता थौं खने मदयेधुंकल। उपचारय् थुज्वःगु संकोच आवश्यकता नं जुइ मखु। उपचारं सेक्स भाय्यात चकंका बी ।

सेक्स बारे उबलय् खुलेआम खँ ल्हायेगु सामाजिक बन्देज। थौं थुज्वःगु सामाजिक बन्देज, निषेध सम्भव जुइ मखु। गुलिखे प्रसङ्गय् सेक्स ज्ञान थौं आवश्यक तायेकी। परिवार नियोजनया चलन वइ। अनेक नियोजनया साधन चर्चाय् हइ। कण्डम दिवस धूमधाम न्यायेकी। एड्सया खतरा खने दइ। सुरक्षित सेक्सया विषयय् जनचेतना थने माली। प्यखेरं अभियान न्ह्याइ। आवश्यकता अनुरुप थौं सेक्स भाषा नं खुल्ला जुयाः वइ। थौं खोल तयाः सेक्स भाषाय् खँ ब्याकेम्वाः। धायेमाःगु तप्यंक धया छ्वइ। स्कुलय् यौन शिक्षा तइ। पुलांपिं शिक्षक, शिक्षिकातय्के यौन शिक्षा ब्वंकेगु, छ्यलेगु भाय्या अभाव जुइ। छकः छम्ह स्वास्थ्य शिक्षा ब्वंकीम्ह शिक्षिकायात विद्यार्थीं न्यनी, 'सम्भोग धइगु छु?' शिक्षिका मय्जुया ख्वाः ह्याउँसे च्वनी। वया म्ये लरबरे जुइ। ग्वारा चिनी। बलं बलं धाइ 'देगलय् बखुंत माया यानाच्वनीगु खं ला? बस् वइत हे धाइ।' थौं ई हिलेधुंकी। भाषां थौं म्हिगःया कष्ट फयेम्वाःले धुंकी। निष्पिफ्क्री स्वतन्त्र जुइ फइ। चखुंबखुं जक त्वाःत्वाः लाकाः जुइगु खनीगु। थौंकन्हय् मनूत हे चखुंबखुं थें खुलेआम जुइधुंकल। 'थौंकन्हय्या मस्तय्सं अबुयात स्यनी...' थ्व धापू पक्का जुइ थौं। सिनेमा हलय् उबलय् हिरो हिरोइन क्वथाय् तयाः मत स्याना बिल कि उकिया अर्थ स्वइपिंसं थुइधुंकी। उबलय्या रोमान्चक दृश्यया व चरमसीमा जुइ। थौंकन्हय् राजेश हमालं बाकायदा हिरोइनयात चुम्बन याइ। पिहां वइ। सिनेमाय् सेक्सी भाय् थौं गनया गन जुइधुंकल। अथेहे सेक्स भाषायात न्ह्याकेगु खँय् एफएम, इन्टरनेटया योगदान दइ।
उपचार, शिक्षा, सिनेमाय् जक मखु सेक्स भाषायात न्ह्याकेगु, रङ्गीन यायेगु खँय् पत्रकारिताया नं योगदान दु। पत्रकारतसें साहित्यकार, कलाकार, गीतकार, राजनैतिकज्ञ, वैज्ञानिक अनेक मनूतलिसे अन्तर्वार्ता काइ। सेक्स अनुभवया न्ह्यसः तइ। मिजं भाषाय् सेक्सं छलाङ मारे याइ। थौंकन्हय् मिसा भाषाय् नं सेक्स भाषा घुसुघुसु न्ह्याः वनी। मिसापिंत न्यनीगु सेक्स बारेया न्ह्यसः इमिसं बीगु लिसलय् म्हिगः भाषावक्रता दइ। थौंकन्हय् थ्व खँय् भाषां वक्रता मखु सरल रेखा ज्वंगु दु।
हिरोइन मय्जुपिं छपुचःयात सेक्स विषय खुलेआम भाषां न्ह्यसः तःगु जिं अखबारय् ब्वने। 'विवाहपूर्व सेक्स जिउ ला?' 'छिं सेक्स याये धुन ला?' न्ह्यसःया भाय् तप्यना वइ ।

लिसलय् नं म्हिगःया संकोच मदु। बरु गाक्क फूर्ति दु। 'मन मिले जूसा, खँ मिले जूसा विवाह पूर्व नं सेक्स जिउ।' मय्जुपिनिगु स्पष्ट लिसः जुइ। थ्व स्पष्टता मिसा सेक्स भाषाय् वःगु विकासया न्हूगु चरण खः। अनुभव जुइ। 'तीतो सत्य'या नकिं मय्जु दीपाश्रीयात नं इहिपा न्ह्यः सेक्स जिउ मजिउ न्ह्यसः तइ। 'खँ मिले जूसा जिउ' वया लिसः जुइ। दीपाश्री अविवाहित। 'छिके सेक्सया अनुभव दु ला?' हानं न्ह्यसः वनी। 'थ्व जिगु व्यक्तिगत खँ। धाये मखु।' दीपाश्रीया लिसः जुइ। 'अनुभव मदु मधासे लिसः रहस्यमय याइ। मिसा सेक्स भाषाय् वःगु थ्व छगू न्हूगु आयाम खः। विकासया चिं खः ।

सेक्स भाषां थौंकन्हय् न्हून्हूगु प्रतीक, बिम्ब ग्रहण यानाः हयाच्वंगु दु। न्हापा न्हापा थ्वइत 'वनारसी लड्डु' धाइ। नःसां पछुताउ। मनंसां पछुताउ। 'लड्डु' बिम्ब सेक्स भाषाय् थौं पुलां जुइ। 'सेक्स' सिटामोल खः। कपाः स्यात कि नयेगु। सेक्स चकलेट खः, म्हुतु चाकुकेगु। चाकु पाउँ खः। गुलिस्यां थ्वयात अक्सिजन खंकी। गुलिस्यां स्लीपिङ पिल्स (न्ह्यः वयेकेगु वासः)। सेक्स भाषाय् सेक्सयात न्हून्हूकथं व्यक्त याइगु प्रतिस्पर्धा जुइ। नवीन प्रतीक, बिम्ब, उपमात लुया वइ। न्ह्यागु थजु सेक्स भाषां गति कयाच्वंगु दु। थ्व न्ह्याः वनाच्वंगु दु। रफ्तारं। थ्वया विकास गन थ्यनी? गन थ्यनाः दी? धाये फइमखु, अनुमान यायेमास्ते वइ। न्ह्याः ववं थ्व सेक्स भाय् गनं पिहांवल अन हे थ्यनीगु खः ला? ग्व मसिउ !

More Stories Like this