माओवादीयात साइजय् हयेगु कुतः

येँ (सन्ध्या टाइम्स)/संविधानसभाया माध्यमं दयेकीगु न्हूगु संविधानय् एनेकपा (माओवादी) हावी मजुइकेत व तिब्बतयात ताः तयाः थीथी गतिविधि यायेत दकलय् न्हापां माओवादीयात निं 'साइज'य् हयेमाःगु तायेकाः भारत सक्रिय जुयावःगु खँ सीदुगु दु। संविधानसभाया चुनावं दकलय् तःधंगु पार्टी जूवःगु माओवादी मदयेकं संविधान हे दयेके मफइगु जूगुलिं दकलय् न्हापां थ्वहे पार्टीयात 'साइज'य् हयेमाःगु निष्कर्ष भारतं पिकाःगु खँ विज्ञतय्सं धाःगु दु ।

राजसंस्था मदयेधुंकाः भारतं थ्व इलय् दकलय् विश्वास याये फइगु शक्ति धइगु नेपाली सेना जूगुलिं आः अन दुने हे चलखेल शुरु याना हःगु खँ नं विज्ञ सूत्रं धाःगु दु। भारतं नेपाली सेनायात ल्हातय् कायेगु निंतिं विदेशमन्त्री एस एम कृष्णा नेपाः भ्रमण वये छन्हु न्ह्यः हे माक्व सुरक्षाया सामान छ्वया हःगु खः। सूत्रया कथं थ्व धइगु छखे माओवादी विरुद्ध न्ह्याः वनेत सेनायात बिउगु तिबः खःसा मेखे सेनाया विश्वास कायेत क्यंगु सकारात्मक संकेत नं खः। भारत विरुद्ध आन्दोलन याना वयाच्वंगु एनेकपा (माओवादी) यात छगू कथं ख्यायेगु कथं नं सेनायात अज्याःगु सामान छ्वयाहःगु खँ सूत्रं धाःगु दु ।

सुरक्षा निकायया फुक्कं पक्षयात थःगु ल्हातय् तये फत धाःसा जक आज्जु पूवंके फइगु तायेका गृह मन्त्रालय अन्तर्गतया सुरक्षा निकायया प्रमुखत नापं गृहमन्त्री भिम रावलयात भारतं सःतूगु खँ नं सूत्रं धाःगु दु। भारतया थ्वहे रणनीति कथंया भ्रमणय् सरिक जुइत गृह मन्त्री भीम रावल थौं स्वंगुलिं सुरक्षा निकायया प्रमुखत ज्वनाः भारत भ्रमणय् झाःगु दु। भारतं धौख्यलय् सशस्त्र प्रहरीया तालिम केन्द्र दयेका बीगु नापं सुर्खेतय् सेनाया हवाइ आधार दयेका बीगु बचं बिउगु दु ।

भारतया सेना प्रमुख कन्हय्निसें येँय्

माओवादीया लडाकुतयात नेपाली सेनाय् समायोजन याये मजिउ धकाः विवादय् वःम्ह भारतया सेना प्रमुख दिपक कपूर कन्हसंनिसें नेपाः भ्रमणय् वयेत्यंगु दु। वर्तमान सरकारया योजना कथं माओवादीयात ख्यायेत नापं भारतयात ह्ययेकेत भारतीय सेना प्रमुखयात नेपाः सःतूगु दावी सूत्रं याःगु दु। वय्कःया नेपाः भ्रमणया इलय् चीनया तिब्बतयात क्यनेगु ल्याखं नं तिब्बतलिसे स्वाःगु मुस्ताङया भ्रमणय् वनीगु ग्वसाः दु ।

वय्कःयात नेपाःया मानार्थ सेनापतिया पदवी नं बीगु नापं नेपाली सेनाया मू मू मनूतय्त नं नापलाकाः सहलह ब्याकीगु ज्याझ्वः तयातःगु दु ।