विदेशी पाहांलिसे आगं प्वलाः खँ मल्हाये

आः नकतिनि नेपाः भ्रमण यानाः लिहां वंम्ह भारतीय विदेशमन्त्री एसएम कृष्णालिसे मेपिं सिबें माओवादी अध्यक्ष प्रचण्डं यानादीगु वार्तालाप अतिकं चर्चित जुल। भारतीय विदेशमन्त्रीलिसे प्रधानमन्त्रीं याःगु वार्ताया बारे बरु उलि चर्चा मजू तर माओवादी अध्यक्षं याःगु वार्तां विशेष चर्चाया थाय् काल। अथे जूगुया कारण मेता मखु, थौंकन्हय् माओवादीं न्ह्याकाच्वंगु भारत विरोधी आन्दोलनं यानाः खः। माओवादीं राष्ट्रियताया सन्दर्भय् भारत विरोधी आन्दोलन न्ह्याकाच्वंगु हे इलय् नेपाः वःम्ह भारतया विदेशमन्त्रीलिसे माओवादी अध्यक्षं गय् यानाः वार्ता यात जुइ, छु छु विषयय् खँल्हाबल्हा यात जुइ धकाः चिउताः ब्वलनीगु स्वाभाविक खः
।

उगु वार्ताया बारे पिने नेपाः-भारत असमान सन्धिया बारे चर्चा जूगु खः धाःसां दुनें दुनें धाःसा वर्तमान सरकार हिलेगु बारे नं वार्ता जुल धकाः पिने हल्ला जुयाच्वंगु दु। न्हापा लिपा नेपाः वइपिं भारतीय नेतातलिसे थनया नेतातय्सं थथे हे थःगु देशया सरकार क्वःथलाः थःपिनि सरकार दयेका बी माल धकाः आग्रह याइगु जूगुलिं प्रचण्डया हकय् नं अज्याःगु हे वार्ता जुल जुइमाः धकाः अनुमान जूगु जुइफु। तर विदेशीतलिसे थःगु देशया आन्तरिक खँयात कयाः छुं नं कथं खँल्हाबल्हा यायेगु धाःसा पाय्छि मखु। उकिसनं माओवादीं ला न्हापांनिसें जुया वयाच्वंगु थज्याःगु प्रवृत्तिया विरोध हे याना वयाच्वंगु खः। उकिं माओवादीं सुं नं विदेशीलिसे उकथंया चर्चा यायेगु उचित जुइ मखु। यदि प्रचण्डं यानादीगु खःसा व गलत खः। मयाःगु खःसा पाय्छि हे जुल ।

More Stories Like this