देशघातकत पितिने फःसा विकास जुइ

डी. आर खड्गी

सिद्धान्तवादी अनुभवी संघर्षशील कम्यूनिष्ट नेता मसालया महामन्त्री मोहन विक्रम सिंहं स्पष्ट रुपं व्याख्या यानादिल - भारतया नीति नेपालय् कठपुतली सरकार दयेकाः भारतया राष्ट्रिय स्वार्थ पूर्ति यायेगु खः। भारत थःगु स्वार्थ पूर्तिया लागिं अनेक रणनीति म्हिनेगु यानाच्वंगु दु। विशेष यानाः भारतं न्यागू रणनीति म्हिताच्वंगु वय्कःया बिचाः दु - १) नेपाल सरकारयात दबाव बियाः फाइदा कायेगु २) नेपाःया पार्टीतय्त प्रयोग यानाः फाइदा कायेगु ३) पार्टीया नेतातय्त थःगु मुठ्ठीइ तयाः फाइदा कायेगु ४) भारतीय मूलया मधेशी दलयात उपयोग यानाच्वनेगु ५) घुसपैठ नीति कायम यानाच्वनेगु। थ्व न्यागू नीति ज्वनाः नेपाःयात मछिंगु स्थितिइ लाकाः भारतं थःगु स्वार्थ पूर्ति यानाच्वंगु दु। अझ भविष्यय् नं नेपाःयात थःगु मुठ्ठीइ तयाः प्याखं हुइका च्वनेगु लक्ष्य ज्वनाः भारतं ज्या यानाच्वंगु खने दु। भारतं न्हापा कांग्रेस पार्टीयात दबाव बियाः कोशी व गण्डकी खुसि ल्हातय् लाकेत सफल जुल। काँग्रेस धुंकाः एमाले पार्टीयात दबाव बीगु यात, तर एमाले महासचिव मदन भण्डारीया देशभक्त राष्ट्रवादी अडानया कारणं पार्टीयात दबाव बियाः टनकपुर सम्झौता याकेत असफल जुल। जब नेता मदन भण्डारीया अवसान जुल, टनकपुर जलश्रात सम्झौता यायेगु धकाः एमाले पार्टीं निर्णय यात। कांग्रेस पार्टी व एमाले पार्टी मिले जुयाः टनकपुर सम्झौता यात। निगूगु सफल आन्दोलन धुंकाः माओवादी पार्टीयात नं दबाव बियाः पश्चिम सेती व मथिल्लो कर्णाली जलविद्युत सम्झौता याकेगु कुतः याःगु खः तर दथुइ हे माओवादी सरकार भंग जुल, सम्झौता याकेगु ज्या नं पूमवन ।

उकथं हे थीथी पार्टीया नेतातय्त नं भारतं उपयोग यानाच्वंगु दु। थ्व खँ स्वयं पार्टीया नेतातय्सं हे धयाच्वंगु नं दु। कांग्रेस पार्टीया ८० प्रतिशत नेतात भारत परस्त जुयाच्वंगु दु। जब भारतया स्वार्थ विरुद्ध सुं नेता न्ह्यःने वइ व नेतायात माइनस याना यंकी। दसुया लागिं काँग्रेस पार्टीया नेता नरहरि आचार्यया ग्रुप माइनस जुयाच्वंगु दु। एमाले पार्टीइ नं भारत परस्त मजूपिंत माइनस यायां यंकाच्वंगु दु। दसुया लागिं टनकपुर सन्धिया विरोधी याःम्ह हिरण्यलाल श्रेष्ठयात पार्टीइ च्वने मफयेका बिल। माओवादी पार्टीइ नं डा. बाबुराम भट्टराईयात अध्यक्ष प्रचण्डं खुल्ला रुपं हे द्वपं बीगु यानाच्वंगु दु बाबुरामजु भारतया प्रिय नेता खः धकाः। मधेशवादी नेतातय्गु ला खँ हे त्वःता छ्वये। छाय्धाःसां उपिं सय प्रतिशत हे भारत परस्त नेतात खः। दसुया लागिं विहारया जनता दल व जनता पार्टीया स्थानीय नेतातय्सं खुल्ला रुपं धायेगु यानाच्वंगु दु नेपाःया सकली कम्युनिष्टतय्त कमजोर यायेगु लागिं जिमिस माक्व सहयोग व समर्थन यानाच्वनागु दु धकाः। भारतं पार्टी व नेतातय्त प्रयोग यानाः नं मगानाः अझ नेपाःया सीमा दुने घुसपैठ नं यानाच्वंगु दु। थुलि यानां नं मगानाः भारतीय सीमा सुरक्षा बलं नेपाः दुहां वयाः अपहरण, लुटपाट यासें जनतायात आतंकित यानाच्वंसां नेपाः सरकार सुंक च्वनाच्वंगु दु। भारतया ज्व ज्यादतियात नेपाः सरकारं विरोध याये मफु। नेतात च्यःबुद्धिं ग्रस्त जूगुलिं हे भारत तं चाइ ला धकाः ग्यानाच्वंगु खः। झीगु धापू भारतनाप टक्कर हे कायेमाः धयागु मखु, नेपाः सरकारं खालि भारतीय सीमा सुरक्षा बलया दादागिरी व सीमा मिचे यानाच्वंगु खँ दिल्ली दरबारया न्ह्यःने स्पष्ट रुपं धाये फयेमाः धइगु जक खः। मेगु खँ, दिल्ली दरबारया सोच नेपाः प्रति सकारात्मक दुगु खःसा नेपाः प्रति जुयाच्वंगु दादागिरी पहःयात बन्द या धकाः आदेश बीमाःगु खः। तर दिल्ली दरबार नं नेपाः प्रति सकारात्मक मजूगुलिं न्ह्यागु अत्याचार जुयाच्वंसां नं सुम्क च्वनाच्वंगु खनेदु ।

भारत नेपाःयात मुठ्ठीइ तयेगु लागिं न्ह्यागु हरकत यायेत नं तयार जुयाच्वंगु दु धकाः मसालया नेता मोहन विक्रमं स्पष्ट धया वयाच्वंगु दु। वय्कःया खँ न्हाय्क थें प्रस्ट जुजुं वनाच्वंगु दु। छाय्धाःसां निक्वःगु सफल आन्दोलन धुंकाः ला थन भचा जक गडबडी जूसां स्वयं नेतात दिल्ली दरबारय् वनाः ग्वाहालि फ्वनीगु जुयाच्वंगु दु। माओवादी पार्टीं जनयुद्धया इलय् देशभक्त व जनपक्षीय नीति ज्वनाच्वंगु कारणं बहुसंख्यक आदिवासी जनजाति व मेमेगु कमजोर वर्गं साथ बिउगुलिं माओवादीया अभियान सफल जुया वनाच्वंगु खः। जनयुद्ध न्ह्यानाच्वंगु इलय् माओवादीं थथे घोषणा याःगु नं खः नेपाःया सामन्ती दलाल पुंजीपति वर्ग समाप्त यायेगु झ्वलय् भारतया पुंजीवादी सरकारनाप नं टक्कर काये मालेफु अथे जूगुलिं शुरुङ्ग युद्ध मार्फत विदेशी सेनायात हायल कायल यानाः पितिना छ्वये मालेफु धकाः शुरुङ्ग म्हुइगु समेत शुरु याःगु नं खः। देशभक्त अडान कयाच्वंपिं माओवादी नेतात जब दिल्ली वनाः १२ बुँदे सम्झौता यानावःगु खँ न्यने माल, जनता निराश जुल। १२ बुँदे सम्झौताया आधारय् विहारीतय्सं धमाधम नेपाःया नागरिकता कयाः राजनीतिया नामय् ल्वाभः तक ल्ह्वनाः संघर्ष यानाच्वंगु दु। यदि विहारीतय्त नागरिकता बियां तुं वनाच्वन धाःसा नेपाली जनता हे धमाधम अल्पमतय् लालां वनी। नेपाली जनता अल्पमतय् लायेसातकि नेपाःया अस्तित्व समाप्त जुयाः सिक्किम अथवा फिजीकरणया अवस्था नं वयेफु ।

२०६२ साल न्ह्यः दरबारं पार्टीतय्त प्याखं हुइकाच्वनीसा थौंकन्हय् दिल्ली दरवारं पार्टीतय्त प्याखं हुइकाच्वंगु दु धकाः माओवादी नेता प्रचण्ड सार्वजनिक यानादिल। जनतां नं नेतातय्त न्हापांनिसे शंका याना वयाच्वंगु नं खः, थुपिं फुक्क भारतया इशाराय् प्याखं हुलीपिं खः धकाः। पार्टीया नेतात गद्दार जयाच्वंगु कारणं यानाः देय्या सार्वभौम कमजोर जुया वनाच्वंगु जक मखु जनता नं गरिब जुजुं वनाच्वंगु खः। प्रचण्डं थ्व खँ नं प्रस्ट यात, माओवादी पार्टी दुने नं छगू पुचःयात भारतं प्रभावित यायेत कुतः यानाच्वंगु दु। प्रचण्डं डा. बाबुराम भट्टराईया नां हे किटान यानाः थ्व खँ धयाबिल। प्रचण्डया ग्याःचिकु पहलं थ्व खँ नं स्पष्ट यात - जितः नं जुजु वीरेन्दं व मदन भण्डारीयात थें राष्ट्रवादी अडान काल धकाः षडयन्त्र यानाः सिधयेकेगु कुतः जकं यानाच्वंगु मदुला? यदि प्रचण्ड देशभक्त जनपक्षया अडानय् दृढ जुयाच्वन धाःसा सारा जनतां साथ बियाः विदेशी षडयन्त्रयात चकनाचुर याइगु जक मखु देश घातक नेतातय्त नं लितुलिनाः देशं पितिना छ्वया बी ।

More Stories Like this