शान्ति प्रक्रिया बारे मुनया चिउताः

नेपाःया शान्ति प्रक्रिया धमाधम स्यना वनाच्वंगु बारे संयुक्त राष्ट्र संघया महासचिव वान की मुनं बियादीगु प्रतिवेदनयात कयाः नेपालय् गनं आश्चर्य, गनं आक्रोश व गनं समर्थनया सः थ्वयाच्वंगु दु। खतुं राष्ट्र संघपाखें नेपाःया शान्ति प्रक्रियायात कयाः थुकथं नकारात्मक चिउताः क्यंगु थ्व न्हापांखुसी मखु। न्हापा न्हापा नं थज्याःगु चिउताः वया हे च्वंगु खः। तर नेपालं थुकियात गम्भीर रुपं कायेगु ज्या धाःसा गबलें नं मयाः। बरु राष्ट्र संघं याइगु थज्याःगु टिप्पणीयात नेपाःया राजनीतिक पार्टीतय्सं अःखतं आलोचना जक याइ। पार्टीतय्सं याइगु थज्याःगु आलोचना पूर्वाग्रही नं खनेदु। नेपालय् राष्ट्र संघया उपस्थिति खास यानाः भारतयात मयः। उकिं राष्ट्र संघया उपस्थितियात विरोध याइपिनि मिखा भारतीय दृष्टिकोणं प्रभावित जुयाच्वंगु दइ ।

तर राष्ट्र संघ महासचिवया थ्व टिप्पणी यथार्थं पिने धाःसा मखु। नेपाःया शान्ति प्रक्रिया थासय् लानाच्वंगु मदु। बरु थुकियात स्यंकेगु व लिपा हानं मेमेगु कथंया द्वन्द्व सिर्जना याये कथं न्ह्यानाच्वंगु दु। अय् जुयाः राष्ट्र संघं उकी चिउताः प्वंकूगु खः। राष्ट्र संघया चिउताः दत्तले उकियात समाधान यायेगु लागिं विदेशी ग्वाहालि वइगु सम्भावना नं दयाच्वनी। राष्ट्र संघं ल्हाः लिकायेवं मेमेगु देय्तय्सं थ्व छगू गबलें समाधान याये मफइगु (क्रोनिक) समस्या धकाः अथें त्वःता बी। नेपाः थेंज्याःगु विदेशी ग्वाहालिइ निर्भर जुयाच्वनेमाःगु देशय् थ्व अवस्था धइगु धाथें नं ग्यानापुगु अवस्था खः। राजनीतिक पार्टी व नेतातय्सं थुकी गम्भीर चिउताः कायेमाः ।

More Stories Like this