वार्ता लिपा प्रचण्ड प्रशन्न

येँ (सन्ध्या टाइम्स)/'आः नोकर मखु तप्यंक मालिकलिसे जक वार्ता' जुइ धकाः थःपिंसं भारतलिसे वार्ता यायेगु उद्घोष यानादीम्ह माओवादी अध्यक्ष प्रचण्डं नेपाः भ्रमणय् वयाच्वंम्ह भारतीय विदेशमन्त्री एसएम कृष्णालिसे म्हिगः वार्ता यानादिल। येँया द्वारिकाज होटलय् जूगु उगु वार्ता लिपा अध्यक्ष प्रचण्ड अतिकं उत्साहित जुयादीगु खँ विज्ञ सूत्रतय्सं धाःगु दु ।

वार्ता लिपा वय्कलं भारत व थःपिनि स्वापू न्हूगु उचाईलय् थ्यंगु धकाः टिप्पणी यानादीगु खः ।

देशय् सत्ता समीकरणया चर्चा जुयाच्वंगु इलय् वय्कःपिनि दथुइ वर्तमान सरकार परिवर्तन यानाः न्हूगु सरकार गठन याये फइगु सम्भावना बारे नं खँ जूगु अनुमान विज्ञतय्सं याःगु दु। तर माओवादी प्रवक्ता व विदेश विभाग प्रमुख कृष्णबहादुर महरां धाःसा सरकारया बारे छुं हे खँ मजूगु जानकारी बियादीगु दु। वय्कलं भारतलिसे म्हिगः जूगु वार्ता अतिकं सकारात्मक धाःसा जूगु खँ नं कनादिल ।

नेपाः-भारत दथुइ जुयाच्वंगु आपालं असमान सन्धि ईयात ल्वयेक हिलेमाःगु बिचाः प्रचण्डं तयादीगु खःसा भारतीय विदेशमन्त्रीं उकियात सकारात्मक रुपं काःगु खँ नं वय्कलं कनादीगु दु। माओवादी अध्यक्ष प्रचण्डं छुं न्हि न्ह्यः आः थःपिनि वार्ता भारतलिसे हे जक जुइ धकाः यानादीगु उद्घोषलिसे थ्व वार्ताया छुं स्वापू मदुगु खँ नं महरां कनादिल।
भारतीय विदेश मन्त्री कृष्णा नेपाः भ्रमण क्वचायेकाः थौं लिहां झायेत्यंगु दुसा उखे भारतया भ्रमण क्वचायेकाः एमाले अध्यक्ष झलनाथ खनाल थौं नेपाः लिहां झायेत्यंगु दु ।

नागरिक दवाव

येँ (सन्ध्या टाइम्स)/लोकतन्त्र व शान्तिया निंतिं नागरिक आन्दोलनयया आह्वानय् थौं नागरिक समाजं न्हू बानेश्वरया संविधानसभा न्ह्यःने धर्ना बीगु जूगु दु ।

नागरिक आन्दोलनया कजि डा. देवेन्द्रराज पाण्डें 'सन्ध्या टाइम्स' लिसे खँ ल्हासें जनआन्दोलनया भावना कथं इलय् हे संविधान निर्माण यायेगु निंतिं संविधानसभाया सभासदतय्त दवाव बीगु कथं थौं धर्ना च्वनेगु ग्वसाः ग्वयागु खः धयादिल ।

वय्कलं न्हूगु संविधान इलय् हे निर्माण यायेगु निंतिं राजनीतिक दलत सहमति व सहकार्य यानाः न्ह्याः वनेमाःगु जुयाः उकिया निंतिं थनिंनिसें नागरिक स्तरं अभियान कथं थौं अथे धर्ना च्वनागु खः धकाः नं धयादिल ।

थ्व अभियानयात संविधान निर्माण मजूतले हे निरन्तर रुपं थीथी कथंया ज्याझ्वः यानाः न्ह्याकेगु जुइ धयादिसें वय्कलं थ्व इलय् फुक्क थःथःगु कथं ज्याझ्वः यानाच्वंगु नागरिक खलः पुचःत नं छथासं च्वनाः छप्पँ जुयाः वनेमाःगु आवश्यकता दु धयादिल ।