पेज थ्री अवार्ड

नेपालभाषाया संगीत, म्युजिक भिडियो व फिल्म ख्यःया कलाकार, प्राविधिकतय् ज्यायात दर्शक, स्रोतां गुलि तक ययेकाच्वन धकाः स्वये कथं नेपालभाषाया रंगीन बाःछिपौ 'पेज थ्री' या ग्वसालय् जूगु पेज थ्री पिपुल्स च्वाइस अवार्ड वंगु विहीवाः छगू ज्याझ्वःया दथुइ घोषणा जुल ।

ज्याझ्वलय् संगीत, फिल्म व म्युजिक भिडियो ख्यःया २६ म्ह कलाकार व प्राविधिकतय्त दर्शकतय्सं छ्वयाहःगु एसएमएस, अन लाइन व पत्रिकाय् प्रकाशित फाराम भोटिङ्गया लिधंसाय् वःगु मतया लिधंसाय् थ्व अवार्ड घोषणा याःगु खः ।

ज्याझ्वलय् भोटिङ्गपाखें विजयी कलाकारत बाहेक नांजाःम्ह ख्यालः च्वमि व निर्देशक रामशेखरयात जीवनकाःछि योगदानया लागिं 'लाइफ टाइम एचिभमेण्ट अवार्ड' बिउगु खः ।

नेपालभाषा ख्यलय् आपालं सीडी, फिल्म, म्युजिक भिडियोत निर्माण जुयाच्वंगु दु। तर निर्माण जू थें उकिया बजाः व हःपाः मदु। थ्वहे खँयात वाःचायेकाः पेज थ्री नेपालभाषाया बाःछिपौपाखें स्वकुमितय् ध्यान थुखे साला कायेगु ताः थ्व ज्याझ्वः ग्वसाः ग्वःगु खः ।

ज्याझ्वलय् बिउगु जानकारी कथं थ्व अवार्डया लागिं एसएमएस पाखें २६,०००, अनलाइनपाखें १०,००० व पत्रिकाया फारामपाखें १२,००० भोटिङ्ग वःगु खः।
ज्याझ्वलय् लसकुस यासें पेज थ्रीया सम्पादक दर्शनवीर शाक्यं सिर्जना तःधंगु खँ मखु, उकियात मू बीगु मुख्य खँ खः धासें थःपिंसं यायेत्यनागु ज्याझ्वःया उद्देश्य कनादिल ।

अथे हे ईल्वहं प्रकाशनया अध्यक्ष नरेशवीर शाक्यं झीसं न्ह्याक्व हे फिल्म वा संगीत सिर्जना याःसां स्वकुमि/दर्शकं उकियात मययेकूतले उकिया मूल्य मदइगु यथार्थ कँसें थ्वहे ज्याया लागिं थ्व ज्याझ्वः यानाच्वनागु जानकारी बियादिल।
नेपालभाषा ख्यलय् न्हापांखुसी थज्याःगु ज्याझ्वः जुयाच्वंगु खः। उकिं उकी नोमिनेशनय् लानाच्वंपिं सकलें कलाकार व प्राविधिकत पूर्ण ठाँटपूर्वक थ्यनाच्वंगु खः ।

सिरपाः घोषणा जुक्वपतिकं सकस्यां नुगः उलि हे धुकधुक।
लाइफ टाइम एचिभमेन्टं सम्मानित रामशेखरजुं धाःसा थःगु संवोधनया झ्वलय् नेपालभाषा कला ख्यलय् सना जुइपिं कलाकर्मीतय् छेँया आन्तरिक यथार्थ कनादिल। कला ख्यलय् वय्कःया नां दुसां थःगु हे छेँय् धाःसा थुकिया मूल्य मदु। थःगु छेँय् च्वंपिं जहान परिवार हे थःपिनि थ्व ज्यापाखें लय्मताःगु खायुगु यथार्थ वय्कलं कनादिल। थ्वहे कारणं यानाः झीगु ख्यःया आपालं प्रतिभात तना वनाच्वंगु दु। उकियात बचे यायेगु, ल्यंकेगु ज्या झीसं याये मफु।
थज्याःगु ज्याय् छुं भचा विवाद, मगाःमचाः जुइगु खँय् शंका मदु। उकिसनं न्हापांखुसी जुयाच्वंगु ज्याझ्वलय् अज्याःगु कमीकमजोरी जुया हे च्वनी। तर पेज थ्रीया थ्व ज्याझ्वः उकथंया छुं नं कथंया विवादं मुक्त धाःसां जिउ। श्रोता व स्वकुमितय्सं अवार्डया लागिं ल्ययाहःपिं कलाकर्मीत सकस्यां लागिं चित्त बुझे जूपिं हे लात ।

ज्याझ्वः जुजुकाजी रंजितया म्येँ, रीता व्यंजनकार एवं संजय शर्माया हुलाप्याखं व ह्दयप्रसाद मिश्र एवं भिमसेन रिसालया हास्य व्यंगं अझ झःझः धाःगु खः ।

नेपालभाषाय् संगीत पुलांगु हे विधा खःसां म्युजिक भिडियो व फिल्म न्हूगु विधा खः। थज्याःगु अवार्डं थ्व न्हूगु विधायात च्वन्ह्याके लिसें स्वकुमितय्त थुखेपाखे आकर्षित याइगु नं निश्चित दु ।

More Stories Like this