भारतीय मन्त्रीयात हाकुगु ध्वाँय्
येँ (सन्ध्या टाइम्स)/भारतया विदेशमन्त्री एस.एम. कृष्णा थौं न्हापांखुसी नेपाः भ्रमणया निंतिं येँय् झायेत्यंगु दुसा वय्कःयात येँय् थ्यनेवं हाकुगु ध्वाँय् क्यनीगु जूगु दु ।
भारतीय हस्तक्षेपया विरोधय् एकीकृत नेपाल राष्ट्रिय मोर्चा नांगु संस्थाया कार्यकर्तातय्सं वय्कःयात हाकुगु ध्वाँय् क्यनेगु तयारी याःगु खः। मोर्चाया नायः फणिन्द्र नेपालं भारतया विदेशमन्त्रीयात थःपिंसं हाकुगु ध्वाँय् क्यनेत्यनागु जानकारी बियादीगु दु ।
एकीकृत नेपाल राष्ट्रिय मोर्चां हाकुगु ध्वाँय् क्यनेगु तयारी यानाच्वंगु सुचं वयेवं गृह प्रशासनं उमिगु प्रदर्शन दिकेत ब्यापक रुपं सुरक्षा व्यवस्था कडा याःगु दु ।
थौं सुथय् ११ बजे हे येँय् थ्यंकेगु ज्याझ्वः दुसां खराब मौसमया कारणं भारतीय विदेशीमन्त्रीया नेपाः आगमन छुं भचा लिबाइगु खँ धाःगु दु ।
वय्कलं नेपाः भ्रमणया झ्वलय् प्रधानमन्त्री माधवकुमार नेपाल, उपप्रधानमन्त्री विजयकुमार गच्छेदार, उपप्रम नापं परराष्ट्रमन्त्री सुजाता कोइराला, कांग्रेस, माओवादी व एमाले लगायत थीथी दलया शीर्ष नेतात व मेमेगु नं थीथी ख्यःया मनूतलिसे सहलह ब्याकादीगु ग्वसाः दु ।
विदेशमन्त्री कृष्णाया नेपाः भ्रमणया झ्वलय् प्रधानमन्त्री माधव नेपालं यानादीगु भारत भ्रमणया झ्वलय् जूगु सहमतित कार्यान्वयन यायेगु महत्वपूर्ण न्यागू बुँदाय् सहमति जुइगु खँ धाःगु दु ।
वय्कःलिसे माओवादीं निगू देय् दथुइ जुयाच्वंगु थीथी असमान सन्धिया बारे खँ ल्ह्वनी धाःगु दु। वय्कःया नेपाः भ्रमणया झ्वलय् लाकाः माओवादीं म्हिगः नेपाः-भारत असमान सन्धित छ्वयेकूगु खः ।
दर्जन प्रदर्शनकारी ज्वन
येँ (सन्ध्या टाइम्स)/नेपाः भ्रमणय् वयेत्यंम्ह भारतीय विदेशमन्त्री एस.एम. कृष्णायात हाकुगु ध्वाँय् क्यनेगु तयारी यानाच्वंपिं एकीकृत नेपाल राष्ट्रिय मोर्चाया छगू दर्जनं मल्याक कार्यकर्तातय्त प्रहरीं ज्वंगु दु। भारतं नेपाःया आन्तरिक सवालयात कयाः हस्तक्षेप यानाच्वंगु कारणं उकिया विरोधय् मोर्चां थौं अथे हाकुगु ध्वाँय् क्यनेगु तयारी याःगु खः ।
नेपाः भ्रमणय् झाइम्ह कृष्णायात विमानस्थलं पिहां वयेवं हे हाकुगु ध्वाँय् क्यनेगु तयारी कथं विमानस्थल पिने च्वनाच्वंपिं छगू दर्जनं मल्याक मोर्चाया कार्यकर्तातय्त निकः यानाः प्रहरीं ज्वना यंकूगु खः। ज्वंपिं प्रदर्शनकारीतय्त तिनकुने प्रहरी प्रभागय् तयातःगु दु ।
भारतीय विदेशमन्त्रीयात हाकुगु ध्वाँय् क्यनी धकाः थौं सुथंनिसें हे गौशालांनिसें अन्तर्राष्ट्रिय् त्रिभूवन विमानस्थल तक आपालं प्रहरी परिचालन याना तःगु खः। नेपालय् भारत विरुद्ध आन्दोलन जुयाच्वंगु इलय् लाक्क जुइत्यंगु थ्व भ्रमणयात कयाः सरकारं सुरक्षा व्यवस्था कडान नं याना तःगु दु ।
