हैटीइ आः तकया दुने दकलय् तःधंगु भुखाय्

सछिं मल्याक मनू सित

नेपाली सैनिक सुरक्षित

येँ (सन्ध्या टाइम्स)/क्यारेबियन राष्ट्र हैटीइ आः तकया हे दकलय् तःधंक थौं सुथय् भुखाय् ब्वयाः तसकं क्षति जूगु दु ।

हैटीइ शान्ति सेनाया नितिं वनाच्वंपिं नेपाली सेना धाःसा सुरक्षित जूगु सैनिक जनसम्पर्क निर्देशनालयया प्रवक्ता रमीन्द्र क्षेत्रीं जानकारी बियादीगु दु। राजधानी प्रोर्ट-अउ-प्रिंसय् महासेनानी रतिन्द्र खत्रीया नेतृत्वय् निगू शान्ति सेनाया पल्टन अन वनाच्वंगु दु। भुखाय् ब्वयाः संयुक्त राष्ट्र संघया भवन नापं मेमेगु भवन ध्वस्त जूगु दु।राष्ट्रसंघया सलंसः कर्मचारी सम्पर्कविहिन जूगु दु। संयोगं जक प्रोर्ट-अउ-प्रिंसय् दुगु सैनिक पल्टन वार्षिक उत्सव ज्याझ्वलय् ब्वति कायेत राष्ट्रसंघया भवनय् च्वनीपिं फुक्क नेपाःया स्टाफत पिहां वनाच्वंगु इलय् भुखाय् ब्वःगु जुयाः नेपाली सेना नापं नेपाःमित बचे जूगु खँ धाःगु दु ।

युएन हेडक्वाटरय् ज्या याइम्ह छम्ह सैनिक अधिकृतया धाःसा थःगु छेँ जुयाः पल्टनपाखे वंगु लिबानाः भुखाय् ब्वःगु इलय् ल्हानाः छपा तुति त्वःधूगु दु। थौं सुथय् ७ दशमलब ३ रेक्टर स्केलया भुखाय् ब्वःगु खः । भुखाय् ब्वयाः यक्व हे छेँ ध्वस्त जूगु नापं यक्व हे मनूत सीगु हुनिं नेपाली सेना अन उद्धार यायेगु ज्याय् क्रियाशिल तकं जुइधुंकूगु दु। भुखाय् ब्वःगु इलय् एक मिनेट सिबें अप्वः ला राजधानी प्रोर्ट-अउ-प्रिंस पूरा हे संगु खः धकाः धाःगु दुसा भुखाय् ब्वये धुंकाः अमेरिकाया राष्ट्रपति बाराक ओबामां दुःख प्वंकुसें फक्व ग्वाहालि यायेगु प्रतिवद्धता प्वंकादीगु दु ।