मर्यादां पिहां वयाच्वंम्ह राष्ट्रपति यादव

राष्ट्रपति डा. रामवरण यादवं थौंकन्हय् थीथी थासय् थीथी कथं बियाच्वंगु अभिव्यक्तियात कयाः एमाले संसदीय दलं आपत्ति प्वंकूगु दु। संविधान निर्माणया ज्या जुयाच्वंगु हे इलय् राष्ट्रपति यादवं गबलें संघीय व्यवस्थायात कयाःसा गबलें जातीय स्वशासनयात कयाः टिप्पणी यायेगु यानाच्वंगु दु। संविधानतः राष्ट्रपतियात सार्वजनिक रुपं थज्याःगु अभिव्यक्ति बीगु छुट मदु। वय्कः छम्ह थापना यानातःम्ह राष्ट्रपति जूगु कारणं संस्थागत रुपं थःगु बिचाः तयेगु अधिकार वय्कःयात मदु। तर थौंकन्हय् राष्ट्रपतिपाखें वयाच्वंगु थज्याःगु अभिव्यक्तिं वय्कः थःगु सीमा हाचांगायाः न्ह्यःने वयाच्वंगु संकेत बिउगु दु। देशय् छुं छगू घटना जूसां तुरुन्त हे प्रधानमन्त्री वा सुं नेतायात सःताः थ्व छाय् गुकथं जूगु धकाः न्यनेकने याना हे छ्वयेगु वय्कःया ज्यां वय्कलं जबर्जस्ती थःगु भूमिका दयेकेत स्वयाच्वंगु आभास नं बिउ। लिसें राजनीतिक नेतातलिसे सार्वजनिक रुपं हे आरोप प्रत्यारोपय् कुहां वयाः राष्ट्रपतिया ओजस्वीपूर्ण गरिमायात नं राजनीतिया ध्याचः किकेगु ज्या वय्कःपाखें जुयाच्वंगु खनेदु ।

थ्व स्वयां न्ह्यः प्रधानसेनापति प्रकरणय् सरकारया ज्याय् हे हस्तक्षेप यानाः प्रधानसेनापतियात थमौती यायेगु पलाः ल्ह्वनाः वय्कलं देशय् गन्जागोल अवस्था सिर्जना यानादीगु हे खः। उगु पलाखं थःगु अधिकार 'स्थापित' यायेधुंकाः आः इलय् संविधान दयेके मफुत धाःसा संविधानसभा भंग जुयाः राष्ट्रपति जक ल्यनी धइगु पूर्व घोषणा यानाः थःहे सर्वेसर्वा जुइगु मनसुवा नं वय्कलं प्वंकादीगु दु। राष्ट्रपतिपाखें थज्याःगु ज्या जुयाच्वंगु धाथें नं ल्वःगु खँ मखु ।

More Stories Like this