तराईलय् हानं हिंसा ब्वलनीगु संकेत

तराईलय् हानं छक्वः हत्या हिंसाया श्रृंखला शुरु जुइगु संकेत पिहां वःगु दु। म्हिगः पर्सा जिल्लाया सहायक सीडीओयात याःगु गोली प्रहारपाखें थ्व खतराया संकेत बिउगु खः। वंगु छुं ई तराई मेबलय् स्वयां शान्त जुयाच्वंगु खःसा म्हिगःया घटनां तराई हानं अस्थिर जुइत्यंगु खने दया वःगु दु ।

तराई लागाय् हानं हिंसा शुरु याःगु पुचःतय्सं सरकारं थःपिंलिसे जूगु सम्झौता पालना मयाःगु, वार्ता प्रक्रिया ढिला याःगु आदि द्वपं बिउगु दु। थज्याःगु हे द्वपं बियाः मधेशी जनअधिकार फोरमं नं आः वइगु माघंनिसें तराई लागाय् मेगु मधेश आन्दोलन शुरु यायेगु ख्याच्वः बिउगु खः। अन छगू पुचलं आन्दोलन यात कि मेमेगु पुचःतय्सं नं धेंधेंबल्लाः याये थें आन्दोलन शुरु याना हइगु जुयाच्वंगु दु। तराईया थीथी पुचःतलिसे सरकारं न्हापा याःगु सम्झौता पालना याइ ला धकाः अनया सशस्त्र पुचःत सुम्क च्वनाच्वंगु खः। तर सरकारं थःपिंसं न्ह्याकागु विशेष सुरक्षा योजनां यानाः तराई शान्त जुयाच्वंगु धकाः गलत विश्लेषण यानाच्वंगु दु। तराईया थीथी पुचःतलिसे याःगु सहमति लागू याकेगु लागिं सरकारयाके फुर्सद हे मदु। न सरकारं न्हापाया सरकारतय्सं सुलिसे गज्याःगु सहमति याना तःगु दु धकाः वालेगु ज्या हे गबलें याः। अज्याःगु सहमतित सरकारया ल्वःमंसां सम्बन्धित पुचःया ल्वःमनी मखु। थ्व खँयात थुइकेमाः। तराईया पुचःत जक मखु देय्या थीथी आदिवासी जनजाति पुचःतलिसे नं सरकारं थज्याःगु हे सहमतित यानातःगु दु गुगु आः तक पूमवंनि। कन्हय् दक्व पुचःतय्सं छक्वलं पुलांगु मागत न्ह्यःने तयाः आन्दोलन यात धाःसा उकिं सरकार जक मखु देशयात हे मछिंगु अवस्थाय् लाका बी ।

More Stories Like this