पशुपतिइ हानं भारतीय भट्ट
नवनियुक्त पुजारीत छेँय् लिहां वन
सरकारं थःगु निर्णय हिलेवं पशुपतिया विवाद आःयात शान्त जूगु दु । म्हिगः जूगु सहमति कथं पशुपतिइ थौं हानं पुलांम्ह हे भारतीय मूल भट्टं पुजा शुरु याःगु दु । थौं सुथय् पुलांम्ह हे भारतीय मूल भट्ट महावलेश्वर पशुपति देगलय् दुहां वनाः पुजा शुरु याःगु खः ।
पशुपति विकास कोषं नियुक्त याःपिं न्हूपिं पुजारीत विवादय् वःगुलिं कोषं नित्यपुजा न्ह्याका बी माल धकाः राजीनामा बीधुंकूपिं मूल भट्टतय्त इनाप याःगु खःसां वय्कःपिंतयार मजूगु खःसा म्हिगः प्रधानमन्त्री स्वयमं हे वय्कःपिंत नित्यपुजा याना बी माल धकाः इनाप याःगुलिं थौं वय्कःपिं देगलय् वनाः पुजा यानादीगु खः । तर छगू विशिष्ट सूत्रं धाःसा वय्कःपिंत नित्यपुजा यायेत तयार याकेगु ज्याय् भारतीय राजदूतावासं नं भूमिका म्हितूगु खँ धाःगु दु । म्हिगः प्रम प्रचण्डपाखें सर्वोच्चया आदेश कथं पुलांपिं भट्टतय्त पुजा याकेगु धकाः घोषणा यायेवं उकियात दकलय् न्हापां नेपाःया निंतिं भारतीय राजदूत राकेश सूदं निं समर्थन यानादीगु खः ।
हानं पुलांपिं हे भट्टतय्सं पुजा याः वःगुलिं प्यन्हु तक गुप्तवास समेत च्वनाः पशुपतिया मूल पुजारी जुइत तयार जूपिं निम्हं पुजारीत धाःसा आःयात छेँय् लिहां वंगु दु । वय्कःपिंत सरकारं गज्याःगु आश्वासन बिल धइगु खँ धाःसा सी मदुनि । सर्वोच्चया न्हूगु फैसला लिपा अन्तिम निर्णय याइगु खँ धाःगु दु ।
पशुपतिया पुजारी विवाद याकनं ज्यंकेत इनाप यासें भारतया भावी प्रधानमन्त्री धकाः भाजपां न्ह्यःने हयातःम्ह नेता लालकृष्ण आडवानीं समेत थम्हं हे प्रम प्रचण्डयात फोन यानाःथःपिनि चिउताः प्वंकूगु खः । थ्व प्रकरणयात भारतय् नेपाःया कम्युनिष्ट सरकारं भारतीय पुजारीयात अपमानपूर्वक लिकात धकाः प्रेसं च्वयाहःगु दु । थुकिं यानाः अन नेपाः विरोधी प्रदर्शन नं जूगु खः ।
पशुपतिया ल्वापु साम्य जूसां विद्यार्थी व माइक्रोबस दथुया ल्वापुं यानाः उगु लागा धाःसा थौं नं अशान्त जुल । माइक्रोबसं छम्ह विद्यार्थीया म्हसीका पौ खुनाः दाल धकाः थौं विद्यार्थीतय्सं उगु लागाय् चक्का जाम यानाः यातायात ठप्प यानाबिउगु खः ।
