पाठकवृन्द, कृपया क्वःछिनादिसँ

नर्मदेश्वर प्रधान

छपु च्वसु च्वया। सन्ध्या टाइम्सय् पिकया। मेनोपोज बारे। मिसातय् उमेर वनी। थी मत्यः दी। वया शरीर, मनोविज्ञानय् हिउपाः वइ। गुलिस्यां थुइ मखु। अनर्थ जुइ। गलत दृष्टि ब्वलनी। थुज्वःगु विषय चर्चाय् वयेमाः। परिवार, जः, समाजं वाःचायेकेमाः। थ्व सामान्य जनस्वास्थ्यया खँ जुइ। विशिष्ट ज्ञानया खँ मखय् धुंकल। शरीर, स्वास्थ्य विषय आधारभूत खँत दइ। साधारण जनतां सीकेमाः। थुइकेमाः। विशेषज्ञतय् जक सरोकारया खँ जुइ मखु। जनस्वास्थ्य। स्वास्थ शिक्षा, जागरण ईया माग जुइ। शरीर विज्ञान, स्वास्थ्य विषय मजीमगाःगु खँ जनस्तरय् बीमाः। ह्वलेमाः। थ्व जनदायित्वया विषय जुइ ।

छम्ह ब्वँमि मय्जुं जिगु च्वसु ब्वनी। मेनोपोज विषय। छन्हु नापलाइ। न्ह्यसः तइ। छिगु च्वसु ब्वना ।
"थः कलाःयात कयाः च्वयागु खः ला?"
अनायाश। जिं अनसं लिसः बिया -
"व च्वसु छितः कयाः च्वयागु खः ।"

मय्जुं लिसः न्यनी। ख्वाः ह्याउँकी। लिसः जितः सहज जुइ। हिचकिचाहट छुं मदु। जिगु लिसलय् छुं मजाक मदु। वास्तविकता दु। मय्जुं थू। वा मथू। जिं मसिउ।
च्वसुत च्वये। "जि" शैली छ्यले। प्रथम पुरुषय् खँ न्ह्याके। कने। गुलिस्यां बिचाः याइ, च्वसुत जिगु मात्र जीवनया किचः खः। नितान्त ब्यक्तिगत खँत। निजी सरोकारया अभिब्यक्तित। थुज्वःगु शंका, भ्रमं जिगु च्वसुयात गुलिस्यां बेक्वः मिखां स्वः जुइ। मिखा बागलं मस्वइपिं नं दइ। खः। च्वसुत मुक्कं जिगु ब्यक्तिगत खःसा थ्वयात ब्वने हे माः। स्वये हे माः धायेगु जितः ला दइ मखु। आग्रह याये फइ मखु। निजात्मक अनुभूति, घटनात न्ह्यथने। आत्म सन्तुष्टीया खँ जुइ फइ। तर, जनसम्पर्कया सन्दर्भय् उकिया औचित्य दइ मखु। व अर्थहिन जुइ। जिं बांलाक थू ।

च्वसुइ जि शैली वयेफु। छ्यलेफु। तर, व स्वतः आत्म कथात्मक जुइ मखु। "जि" वाचक च्वमिया किचः हे जुइ। थ्व धायेफइ मखु। "जि" ब्यक्तिया छुमां। अन्तरबस्तु। अवसम्भाब्य जुइ। अथे मखु। जि शैलीया प्रयोग समष्टि रूपय् नं जुइफु। समाजया प्रतिनिधि पात्रकथं नं वयेफु। च्वमिं च्वइ। मतिइ दुगु खँ प्वंकी। तर, च्वयेगु कला नं खः। खँतय् वमन जक मखु। च्वसुइ च्वमिया आजु दइ। छुं बी। धाये। वया लक्ष्य जुइ। गय् धाये। गय् प्वंके। गय् पित बी। चायेकं मचायेकं च्वमिं गुणन याइ। गय् न्ह्याके। योजना याइ। गुज्वःगु संरचना ज्याय्। आकार बी। ग्वसाः ग्वइ। च्वमिया रणनीति दइ। गुकथं, गय् वनेगु। लक्ष्यय् थ्यंके। रोडम्याप की। लेखन शैली थ्वयात कला धाइ। छम्ह च्वमि थुगु खँय् गुलि सफल, असफल। व मेगु हे प्रश्न जुइ। च्वसु मात्र अन्तरवस्तु मखु। प्रकाशन विधिया खेल नं खः।
छता खँ धाये मास्ते वइ। खः जिं स्वीकार याये। च्वसुइ जिगु निजात्मक अनुभूतित खने दइ। ब्यक्तिगत खँत न्ह्यथने। परिवारया खँ ल्ह्वने। मनय् लूगु खँत ब्वये। गुलिस्यां तायेकी व जिगु ब्यक्तिगत गन्थन जक खः। गुलिस्यां न्वाइ, व जिगु आत्मरति जक खः। आत्म प्रदर्शनया खेल। थुज्वःगु द्वपं नं वइ ।

विशुद्ध "जि"। जिगु "अहम्"। मौलिक। निरपेक्ष। पृथक। जिं गबलें मधया। जिं सिउ। थ्व जिं धायेे नं फइ मखु। धाये नं मजिउ। जिं थःत विश्लेषण याये। वाले। स्वये। अन समाज दइ। संस्कार दइ। राजनैतिक, सामाजिक सिद्धान्त नं दइ। अखबार दइ। टेलिभिजन दइ। एफ.एम. दइ। जःखःया ई, परिवेश दइ। छु दइ, छु दइ। माला वने। अनेक प्रभावत लुइ। अनेक दबाव खने दइ। जिं थःत पृथक धाये। कल्पना याये। तर, अथे मखु खनी धात्थें। जि उगुंथुगुंया पुञ्ज खनी। निर्माण खनी। गठन खनी। जिगु पूर्ण अहंकार। भ्रम खनी। अले विशुद्ध "जि" विलिन जुइ ।

जिगु जन्म जुइ। दयाच्वंगु तयारी भाय् सयेके। तयारी अर्थत लाये। तयारी अर्थयात आत्मसात याये। इमित जिगु धया बी। जिगु खंकाछ्वये। तयारी रीतिथिति, अनुष्ठान, मूल्य मान्यता। जिगु निर्माण सामग्री। समाज जग। जि समाजया उपज। प्रतिबिम्व। प्रतिध्वनी। जिं छगू कविता सफू च्वया। नां "जिगु कविता, छिगु कविता" छुना। जि यात छिसं रुपान्तरित यायेगु। जिगु रचना क्रियाया लक्ष्य जुइ। लेखनक्रियाय् कवि लेखक सहजकर्ता जक खः। जिगु मान्यता जुया बी। उगु आसयं सफूया नां तया।
जिगु च्वसुत ब्वनी। गुलिस्यां धाइ -

"जिं बिचाः यानातयागु खँ छिं धयाबिल।"
थज्याःगु खँ न्यने। जितः सन्तोष जुइ। "जि" शैली जिं छ्यले। तर 'जि'या प्रदर्शन जिगु लक्ष्य मखु। मेपिं। समाज। थुमित ब्वयेगु खँय् जि गुलि प्रभावकारी जुइ। ज्याख्यले दइ। जि उलि हे विशाल जुइ। ब्यापक खया बी। वहे विशालता ब्यापकता जिगु आजु जुया बी। ताक जुइ। "जि" शैलीया रणनीतिया निशान जुइ ।

च्वसु ब्वनी। बांलाः बांमलाः मूल्याङ्कन जुइ। गुण दोषया चर्चा जुइ। च्वसु बांलाः। च्वमिया प्रशंसा जुइ। बांमलाः च्वमियात कुंखिनी। थ्व प्रचलित पठन नीति खः। तर, ब्वनेज्याया मूल्यांकन थौं थ्वहे प्रचलनं जक न्ह्याके मजिउ। थुज्वःगु धारणा थौं ब्वलनी। स्थापित ब्वनेज्याय् लेखक केन्द्र जुइ। वया मूल्यांकन जुइ। थौं थ्व विधिइ हिउपाः वइ। च्वसुया अर्थ निर्धारण लेखकं जक याइ मखु। ब्वँमिया नं अन भूमिका दइ। दायीत्व दइ। ब्वँमिं गुगु मिखां स्वइ। खनी। च्वसुया अर्थ अथे हे जूवनी। मू उकथं हे क्वःजी। उकिं च्वमिया स्तर, दक्षताया नं खँ वइ। ब्वँमियात छखे तयाः च्वसुं अर्थ काये फइ मखु। च्वमिया चिउताः तयां जक मगाः। थौं चिउताः ब्वँमिपाखे नं वनी। च्वसुया खँ जक मखु। ब्वँमिया दक्षता दृष्टिकोणया नं खँ जुइ। थौं युग च्वमिया जक मखु, ब्वँमिया नं जुइ। ब्वँमितसें थःगु दायीत्व नं वाःचायेकेमाः ।

मेनोपोज। थ्व बारे च्वसु च्वया। स्वइत कयाः च्वयेगु खः? न्ह्यसः लुइ। ब्वँमि मय्जुं धाःथें कलाःयात कयाः। वा "......?"। प्रिय पाठकवृन्द ! जिगु निवेदन, कृपया क्वःछिनादिसँ ।

More Stories Like this