खुर्दलोटन सीमा तनावग्रस्त
भारतीय सुरक्षाकर्मीपाखें पंगः
रुपन्देही (सन्ध्या टाइम्स)/ एनेकपा (माओवादीं) आन्दोलनया झ्वलय् राष्ट्रिय स्वाधिनताया निंतिं धकाः न्ह्याकूगु ज्याझ्वः कथं थौं नेपाःया रुपन्देहीया खुर्दलोटन बाँध लागा अवलोकनया निंतिं वंपिं माओवादीया नेता व कार्यकर्तातय्त भारतया सुरक्षा बलं पंगः थना बीवं अन तनावग्रस्त जूगु दु। माओवादीया महासचिव रामबहादुर थापा बादलया नेतृत्वय् अथे खुर्दलोटन बाँध अवलोकन यायेगु ज्याझ्वः कथं उखेपाखे वंगु इलय् भारतया सीमा सुरक्षा बलं पंगः थनेवं अन तनाव ब्वलंगु खः ।
माओवादीया नेता बादलया नेतृत्वय् खुर्दलोटन बाँध अवलोकन यायेधुंकाः अन हे विरोध सभा यायेगु ग्वसाः ग्वयातःगु खः ।
भारतपाखें नेपाःया सीमा अतिक्रमण जुयाच्वंगु थाय् अवलोकन यायेगु, नेपाःमिपिंत राष्ट्रिय स्वाधिनताया भावना विकास यायेगु नापं अतिक्रमित लागाय् हे विरोध सभा यानाः जनतायात जागरण ब्वलंकेगु ग्वसाः कथं माओवादी पार्टीं राष्ट्रिय स्वाधिनता व नागरिक सर्वोच्चताया निंतिं धकाः अथे अभियान न्ह्याकूगु खः। व हे अभियानयात निरन्तरता बीगु कथं म्हिगः लिमलाःगु हुनिं थौं खुर्दलोटन बाँध अवलोकन यानाः छगू तःधंगु विरोध सभा यायेगु ग्वसाः कथं हे माओवादीया नेता बादल उखेपाखे झाःगु खः ।
लिपांगु इलय् वयाः माओवादी पार्टीं सन् १९५० या सन्धिनिसें थीथी कथंया नेपाः भारतया असमान सन्धित खारेज यायेमाःगु मागयात तसकं बः बियाहःगु दुसा थीथी कथंया असमान सन्धितकं च्याकेगु ज्याझ्वः माओवादी पार्टीं घोषणा यायेधुंकूगु दु ।
आन्दोलनया हे झ्वलय् म्हिगः माओवादीया नेतात भारतं सीमा अतिक्रमण यानातःगु लागात कन्चनपुरया टनकपुर, इलामया पशुपतिनगर, नवलपरासीया सुस्ता, बाँकेया लक्ष्मणपुरय् अवलोकन यानाः अन ब्यागलं ब्यागलं कथंया सभा तकं याःगु खः ।
सभाय् न्ववायेगु झ्वलय् माओवादीया नेतातय्सं नेपाःया राष्ट्रिय स्वाधिनताया निंतिं थःपिं मदिक्क हे ल्वाना च्वनेगु जुइ धकाः नं धयादीगु दु ।
