नासः सृष्टि कलाया गुँभ्वय्

नासः सृष्टि कलाया ग्वसालय् वंगु ने.सं. ११३० पोहेलागा नवमि २०६६ पौष २५ कुन्हु त्रिभुवन पार्क थानकोटय् तःजिगु गुँभ्वय् ज्याझ्वः क्वचाल । धर्म मुनिकारं स्यनातःपिं झिंन्यागु बाँसुरी खलःया स्वसः३००म्ह स्यमि विद्यार्थीपिं याना मुक्कं ४०० म्हेसियां उगु गुँभ्वय् ज्याझ्वलय् ब्वति काःगु खः ।

ज्याझ्वलय् बाँसुरी खलः दूगु १) वाःबहाः त्वा, २) पुखुद्यां बाँसुरी खलः, ३) तुकंबहाः त्वाः, ४) जमः त्वाः, ५) ओमबहाः त्वाःखलः, ६) ननिचा ल्याय्म्ह पुचः बाजाहिति, ७) लुकुमाननी दापा बाँसुरी खलः बुलु यल, ८)सतुंगः बाँसुरी खलः, ९) धर्मपुर बाँसुरी खलः हात्तिगौडा, १०) अशोक विनायक गुहालि पुचः, ११) गोफः त्वाः माकगल्ली, १२) त्यःर त्वाः ल्याय्म्ह पुचः, १३) ज्याय् खलः तम्मोगल्ली, १४) पोर्पा ज्यापु पुचः, १५) नेवाः भाषा कला संस्कृति संरक्षण समिति गोंगःबुँया स्यमि व हामापिं दुथ्याःगु खः । विशेष कारणं याना ज्याथा पाचदान गुथि प्रजापति खलः व मुसुंबहाः भलननी त्वाःपाखें ब्वति कायेमखंगु खः ।

नासः सृष्टि कलाया नायः धर्म मुनिकारया नायोसुइ न्ह्याःगु सभां न्यागु दशक तक मदिक्क नेवाः बाद्य संगीत ख्यलय् योगदान यानादीम्ह बरिष्ठ बाद्यगुरु लतमान महर्जनयात झिद्धः दां हनापौ व दोसल्लां न्ययेका हनादीगु खः । लिसें बाँसुरी खलःयात दकले न्हापां २०५८ साल फागुन ८ गते ब्यावसायिक कथं लँस्वःवनेगु ज्याय् छ्यलाः इहिपा यानादीपिं निम्हतिपू रमेश महर्जन व कमला महर्जनयात नं हनापौ व दोसल्लां न्ययेका हनादीगु खः ।

ज्याझ्वलय् ज्यापु महागुथि केन्द्रीय समितिया नायः बिपेन्द्र महर्जन, सभासद् दिलिप महर्जन, ज्यापु महागुथि येँ महानगरसमितिया छ्याञ्जे हिराकाजी महर्जन लगायतपिंसं नं ब्वति कयादीगु खः ।

गुँभ्वय् ज्याझ्वलय् नासः सृष्टि कलाया कलाकारिपंसं थी थी सांस्कृतिक ज्याझ्वः नं न्ह्यब्वःगु खः । लुमंकेबहःजू नासः सृष्टि कलाया कलाकारिपंसं नेवाःतय्गु परम्परागत बाजागाजायात ब्यवसायिक कथं छ्यालावयाच्वंगु दु ।

More Stories Like this