पार्टी दुनेया संघीय व्यवस्था विरोधीत

न्हूगु संविधानय् उल्लेख जुइत्यंगु संघीय व्यवस्थाया विरोधय् आः ततःधंगु पार्टीया वरिष्ठ नेतातय्सं तकं न्ववायेगु शुरु यानाहःगु दु। उपप्रधानमन्त्री सुजाता कोइरालां संघीय व्यवस्थाय् नेपाः वनेगु लाकि मवनेगु धइगु खँयात कयाः जनमत संग्रह यायेमाः धायेसातकि उकियात हे बः कयाः ध्वं हाले थें एमालेया नेता केपी ओलीं नं सः तयाहःगु दु। थुपिं निम्हं थःथःगु पार्टी दुने च्वंपिं अनुदारवादी नेतात खः। थुमिसं बियाहःगु थज्याःगु अभिव्यक्तिं आः देशय् वयेत्यंगु संघीय व्यवस्थाया लँपुयात कठिन याना बीगु आभास ब्वलनाच्वंगु दु। यदि थुमित इलय् हे उगु पार्टी दुने च्वंपिं संघीयताया पक्षधर शक्तिं थासय् तये मफुत धाःसा थुमिसं पार्टी दुने संघीय व्यवस्था विरोधी भाइरस तःधंक हे संक्रमित याना बीगु खतरा दु ।

थ्व निगुलिं पार्टीं संविधानसभाया चुनावय् ला संघीय व्यवस्था बी धइगु बचं बियाः हे जनताया मत कया वःगु खः।
(खतुं कांग्रेसया सुजाता कोइराला व एमालेया खड्ग ओली निम्हं चुनावय् बूपिं खः, उमिसं जनताया मतयात अनादर याइगु स्वाभाविक खः)। संघीय व्यवस्था सहितया घोषणापत्रपाखें चुनाव त्याकाः संविधानसभाय् थ्यनेधुंकाः थुकिया बारे ला जनमत संग्रह यायेमानि धायेगु गुलि तक नैतिकतां बिउगु विषय खः? यदि संघीय व्यवस्था मजिउगु वा मयःगु खःसा अबलय् चुनाव नं संघीय व्यवस्थाया विरोधी बिचाः ज्वनाः हे ल्वानाः क्यनेमाःगु खः। आः वयाः अथे धायेगु जनतायात धोका बीगु खः ।

More Stories Like this