बसुन्धरा द्यः लाकि तारा द्यः ?

बुद्धमान महर्जन

खय्त ला जिं 'सन्ध्या टाइम्स' न्हिपौ ब्वनासां थौं तक छुं नं पौ छ्वया महया। थ्व हे झ्वलय् च्वसु महीश्वरराज वज्राचार्यजुं पिथनादीगु धार्मिक कृति 'सद्धर्म कथा संग्रह भाग-१ ' स दुगु बाखं व तुतःया खँय् लाभरत्न तुलाधरजुया प्रतिक्रिया ब्वना। वय्कःपिं निम्हं सफू पिथनादीपिं जूगुलिं वय्कःपिंत दुनुगलंनिसें सुभाय् देछानाच्वना। थज्याःगु हे तुतः वा बाखंया सफूत हाकनं पिथनादी धइगु मनंतुना च्वना। थ्व हे पिदंगु सफूया खँय् जूगु बाखं व तुतः बारे जितः नं जुयाच्वंगु अन्योल वय्कःपिंसं मदयेका बी ला धकाः थुगु पौ च्वयाच्वना ।

धार्मिक कृति वा सफू पिथनादीपिं संस्कृतया ज्ञाता व धर्मया मर्मज्ञ ग्वःम्ह दु व ला जिं मसिउ। जि संस्कृत व धर्मया ज्ञाता नं मखु, छुं छुं सफुली च्वयातःगु स्तोत्र व धारणी ब्वनीम्ह जक खः। आः तुतः व स्तोत्र ब्वनेबलय् गुलिस्यां ला धाइगु तुतः ब्वनेगु ज्या छंगु मखु, तर जि कर्पिनिगु लागिं न्ह्याथेंज्याःम्ह जूसां छुं नं खँ वा ज्या जिगु मनं माने जूसा यायेत तयार। मखु, मनं माने मजूसा थाकुलि वा सःसिउम्हेस्यां धाल धायेवं तुं जि माने जुइम्ह मखु। उकिं न्ह्याम्हेस्यां न्ह्यागु धाःसां जि थम्हं सःथे तुतः व धारणी ब्वनेगु याना छाय्कि जिगु मनं थ्व हे धाइ। ब्वने मजिउगु व स्वये मजिउगु शास्त्र गबलें च्वइ मखु। थ्व हे झ्वलय् छिकपिंसं पिथनादीगु सफू 'सद्धर्म कथा संग्रह' व ने.सं. ११०६ स पिदंगु 'झीगु तुतः'लय् च्वंगु ताराद्यःया १०८ नांया तुतः ब्वना। लिसें जिके दुगु ताराद्यःया १०८ नां दुगु सफू मध्ये ने.सं. १११९ स पिदंगु 'श्री तारादेवीया प्यपु बाखं', 'आर्यतारा स्तोत्र' ने.सं. ११२० स पिदंगु आर्यनाम संगीति ताराशतनाम स्तोत्र व आर्य भद्रचरी प्रणिधान, सफू स्वयाबलय् तारादेवीया १०८ नांया तुतःया नां ला व हे जुल खालि तुतः ब्वनीबलय् ताराद्यःया नां च्वय् क्वय् लात वा खँग्वःया अर्थ जूगु विवाद छु खः व क्वचायेकेगु धइगु छिकपिं सफू पिथनादीपिनिगु हे खः थें च्वन। भलसा काये, थ्व तुतः खँग्वः सम्बन्धी खँ याकनं हे क्वचायेकी ।

आः जिगु मनय् जूगु तुतःया अन्योलया लागिं ने.सं. ११०५ स रत्नकाजी बज्राचार्यजुया च्वसां पिदंगु सफू 'धीमतिवदान' व नेसं ११२५ स धर्म पासा खलःया ग्वसालय् पिदंगु 'सप्तबार पाठ पुस्तकम' सफुली च्वयातःगु बसुन्धरा देवीया १०८ नांया स्तोत्र छकः थन न्ह्यब्वयाच्वना-
।। ओं नमो भगवत्यै आर्य श्री बसुन्धरायै।।
दिव्यरुपी सुरुपीच सौम्यरुपी वलप्रदा।
बसुधरी बसुधारी बसुश्री
बरीबरा।। (श्रीकरी वया)
धरणी धारणी धाता शरण्या भक्तवत्सला।
प्रज्ञापारमिता देवी प्रज्ञाश्री बुद्धि वर्द्धिनी।।
विद्याधरी शिवा शूक्ष्मा सर्वा सर्वत्र मातृका।
तरुणी तारुणी देवी विद्या दानेश्वरीश्वरी।।
भूपिता भूमाता च सर्वाभरण भूषिणी।
दुर्दान्तत्राशिनी भीमा उग्रा उग्र पराक्रमी।।
दानपारमिता देवी वर्षनी दिव्यरुपिनी।
निधानी सर्व मांगल्या कीर्तिलक्ष्मी यशःशुभा।।
दहनी मारनी चण्डी शर्वरी सर्वमातृका।
कृतान्त त्राशिनी शैद्री कौमारी विश्वरुपिणी।।
विर्यपारमिता देवी जगदानन्द लोचनी।
तापसी उग्ररुपीच ऋद्धिसिद्धि वरप्रदा।।
दानपुण्य महाभागा अजिता जित विक्रमा।
जगदेक हितोयुक्ता संग्रामे तारिणी शुभा।।
क्षान्ति पारमिता देवी शालिनी ध्यानधारिणी।
पदि्नी पद्धारी च पद्मासन भासनी।।
शुद्धरुपी महातेजा हेमवर्णा प्रभाकरी।
चिन्तामणि धरीदेवी प्रज्ञापुस्तक धारिणी।।
निधानकुटमारुढी धान्यागारधनप्रिया।
त्रैधातुक महादेवी दिव्या
भरण भूषिणी।।।
मातरी सर्वबृद्धानां
रत्नधात्वेश्वरेश्वरी।
शून्यताभाविनी देवी भावाभावविवर्जिनी।।
वैनेयकी विनेता च द्विपिनि क्लेश छेदनी।
भिन्दनी सर्वमाराणां सप्तपातालक्षोमनी।।
ब्राम्हणी वेदमाताच गुह्यशट गुह्य्वासिनी।
सरस्वती विशालाक्षी चतुब्रम्ह बिहारिणी।।
तथागती महारम्या बजिरणी धर्मधारिणी।
कर्मधात्वेश्वरी विद्या विश्वज्वाला भ्रमण्डली।।
बोधनी सर्वसत्वानां बोध्यङ्गकृत शेखरी।
ध्यानादिमुक्ति सम्पन्ना अद्वया द्वयभाविनी।।
सर्वार्थ साधिनी भद्रा स्त्रीरुपामित विक्रमा।
दर्शनी बुद्ध मार्गाणां नष्टमार्ग प्रदर्शिनी।।
बागीश्वरी महाशास्त्री गोप्ती धात्री धनप्रदा।
स्त्रीरुप धाररिणी सिद्धा योगिनी योगमीश्वरी।।
मनोहरी महाकाली शौभाग्य प्रियदर्शिनी।
सार्थवाह कृपादृष्टि सर्वताथागतात्मकी।।
चतुर्दानं प्रदास्यामि चतुब्रम्ह विहारिणी।
चतुराज्य सत्यदश्च चतुरार्थ वरप्रदा।।
नमस्तेस्तु महादेवी सर्वसत्वार्थ दायिनी। नमस्तुते दिव्यरुपी बसुन्धारे नमस्तुते।।

थन च्वय् न्ह्यथनागु १०८ नांया तुतः रत्नकाजी वज्राचार्यजु व धर्मपासा खलःपाखें पिदंगु हिसाबं बसुन्धरादेवीया तुतः जुल। अथे हे छिकपिंसं पिथनादीगु सफूया हिसाबं तारादेवी तुतः व थन न्ह्यब्वयागु बसुन्धरा देवीया तुतः ब्वना स्वःसा १०८ नांया बच्छि धइथें नां ज्वःलाः। आः जितः सीके मास्ति वःगु खँ थ्व खः कि न्ह्याम्ह हे द्यःया तुतः ब्वंसां छगू निगू नां ज्वःलाइ धइगु जुइफु तर १०८ या बछि नां ज्वःलाइ धइगु जुइ मखु जुइ। उकिं थ्व तुतःयात रत्नकाजी वज्राचार्यजु व धर्मपासा खलकं पिकाःगु हिसाबं बसुन्धरा देवीया तुतः धकाः ब्वनेगु लाकि छिकपिंसं पिथनादीगु सफूया हिसाबं ताराद्यःया तुतः धकाः ब्वनेगु? जिं सिउ कथं ताराद्यः व बसुन्धरा द्यः छम्ह मखु। अलग्ग खः। उकिं थुगु तुतःयात बसुन्धरा वा ताराद्यः तुतः छु धकाः ब्वनेगु? थुगु मनया अन्योल चीका बीत सफू पिथनादीपिं छिकपिंत इनाप यानाच्वना। भलसा काये थुकिया याकनं हे 'सन्ध्या टाइम्स' न्हिपती हे लिसः ब्वने दइ ।

More Stories Like this