पर्साया सहायक सीडीओयात गोलीं कयेकल, गार्ड सित
वीरगंज (सन्ध्या टाइम्स)/ पर्साया जिल्लाया सहायक सिडिओ बम बहादुर मल्लयात थौं सुथय् आकाझाकां गोली प्रहार जूगु दु। उकी लानाः वय्कः ला बचे जुयादिल तर वय्कःया अंगरक्षक धाःसा सीगु दु। गोलीं लानाः घाःपाः जूम्ह अंगरक्षक अनन्तराज खड्का अस्पतालय् वासः याकुयाकुं मदुगु खः ।
थौं सुथय् करिब पौने १० बजे वीरगंज उपमनपा वडा १२ स्थित सहायक सिडिओ भाजु मल्लया निवासय् हे उगु आक्रमण जूगु खः। वय्कः ज्याकू वनेगु लागिं छेँनं पिहां वयाः गाडीइ च्वनेधुंकूगु खःसा अंगरक्षक खड्का गाडीइ च्वने जक त्यंगु इलय् अन आकाझाकां गोलीं कयेका हःगु खः। गोलीं कयाः अंगरक्षक खड्का अन हे क्वःदःगु खःसा गोलीया छर्रां लानाः सहायक सीडीओ धाःसा घाःपाः जूगु खः। गोलीया छर्रा वय्कःया छ्यं व छातीइ लाःगु खःसा आः वय्कःया अवस्था सामान्य दुगु खँ पर्साया सीडीओ यादवप्रसाद कोइरालां धयादीगु दु। नारायणी अस्पतालय् वय्कःया सीटी स्क्यान यानाः स्वयेधुंकूगु दु ।
वय्कःया निवासपाखे पैदल हे वःपिं निम्ह मनूतय्सं अन्धाधुन्द गोली चले यानाः वय्कःयात घाःपाः याना बिउगु खः। गोली चले याःपिं सु धकाः पत्ता लगे मजूनिसां जनतान्त्रिक तराई मुक्ति मोर्चां स्थानीय सञ्चार माध्यमयात फोन यानाः आक्रमणया जिम्मा काःगु दु। उमिसं सरकारं थःपिंलिसे यानाच्वंगु वार्ता प्रक्रिया ढिला जूगुलिं आः उकियात भंग यानाः हानं सशस्त्र आन्दोलन न्ह्याकेगु उद्देश्य कथं थ्व आक्रमण यानागु खः धाःगु दु ।
उखे थ्व घटना जुइवं अपराधीयात ज्वनाः कारवाही यायेमाःगु व कर्मचारीया सुरक्षा जुइमाःगु माग यासें पर्सान्यंकया सरकारी ज्याकुथी ज्या ठप्प याःगु दु।
लुमंकेबहः जू, छुं ई न्ह्यः तिनि पर्साया सीडीओयात मन्त्रीं न्यतालय् दाःगु खः ।
