पशुपतिइ राजनीति मयाये
पशुपतियाथाय् पुजारी तयेगु ज्याय् राजनीति यात धकाः विवाद जुयाच्वंथाय् झन् अन आन्दालन यानाच्वंपिं नेवाः भण्डारी जातियात आक्रमण यानाः बांलाःगु ज्या मजूगु खँ सकस्यां वाःचाः जुइमाः । थ्व वाईसीएलया कार्यकर्तातय्सं तसकं तःधंगु गल्ती याःगु दु । उमित ला कारवाही याये हे माः । अन नेवाः हे पुजारी तयेमाः धकाः जुयाच्वंगु आन्दोलनय् नेवाः मुक्ति मोर्चां हे विरोध यानाच्वंगु बांलाक मथुयाच्वंगु दु । छाय् नेवाः विरुद्ध नेवाः हे लगे जुयाच्वगु खः । देशय् हानं छक्वः नेवाः नेवाः ल्वाकेगु ज्या जकं जुइत्यंगु मखु ला झी सकलें सतर्क जुइमाःगु दु । नेवाःतय्त जुइगु समस्याय् नेवाः मोर्चां बांलाःगु भूमिका म्हितेमाःगु मखु ला गन तक पशुपतिइ सुयात नियुक्त यायेमाःगु धइगु प्रश्न दु व ला सकस्यां धयाच्वंगु हे खँ धायेमाः अनयागु पुलांगु परम्परा व चलनयात ध्यान तयाः ज्या यायेमाःगु खः । पशुपति धइगु पुलांगु परम्परा दुगु आराध्यदेव खः । अनयागु परम्परायात राजनीतिक ढंगं जक स्वयां मजिउ । वयात राजनीतिक रुपं समाधान यायेगु नं पाय्छि मखु । थ्व ज्याय् राजनीतिक पार्टीत ला न्ह्यःहे वये हे मजिउ । आः एमाले कांग्रेस पार्टीया नेतातय्सं मौकाया फाइदा कायेत प्याच्च प्याच्च न्ववाना हःगु नं पाय्छि मखु । थुकिं ला मेपिं राजनीतिक पार्टीतय्त नं न्ह्यःने न्ह्यःने वयेत उत्साहित याना बी । अले राजनीति दुहां वन कि थ्व समस्या झन् समाधान हे याये मफयेक तःधं जुयाः विकराल जुयाबीगु खँय् ध्यान तयेमाः ।
- कृष्णहरि प्रधान,
चिकंमुगः येँ ।
More Stories Like this
केन्द्रया अनुमति कयाः आर्थिक ज्या जुइ मखु प्वंकेमखंगु श्रद्धांजिल सुवर्ण शाक्य कि सुवर्णकेशरी ? लाःलाःथें भाःथकाये मजिल बांलाःगु सुझावयात सुभाय्
