बल्ल निर्माण जूगु उच्चस्तरीय संयन्त्र

ताःईया छलफल व तयारी लिपा बल्लबल्ल सरकार सञ्चालनया उच्चस्तरीय संयन्त्र दयेकेत तःधंगु दल ताःलाःगु दु। नेपाली कांग्रेसया सभापति गिरिजाप्रसाद कोइरालाया अध्यक्षताय् उकुन्हु उच्चस्तरीय संयन्त्र निर्माण याःगु खः। आःयात थुकी माओवादी व एमालेया शीर्ष नेतात दुजःया रुपय् च्वनादीगु दु। प्रधानमन्त्री माधव नेपालयात धाःसा थुकी दुथ्याकातःगु मदु ।

थ्व उच्चस्तरीय संयन्त्र दयेकेगु लागिं ताः ई न्ह्यवंनिसें कुतः जुयाच्वंगु खः। तर स्वंगू पार्टीया थःथःगु कवचंया कारणं थ्व संयन्त्र दयेके मफयाच्वन। आः स्वम्हं शीर्ष नेतात छथाय् च्वनाः छगू वार्ता यायेवं संयन्त्र निर्माण जूगु कारणं थ्वयां लिपाया वातावरण सहज जुइगु खः लाकि धइगु आशा नं ब्वलंगु दु ।

सरकारपाखें याइगु आपालं ज्याखँय् माओवादी सन्तुष्ट जुयाच्वंगु मदु। लिसें गुलिखे ज्याखँत थज्याःगु नं दु गुगु सकस्यां सहमति दयेकाः जक न्ह्यःने यंकेमाःगु जुयाच्वनी। छाय्धाःसां आः देय् न्ह्यःने न्ह्याइगु आधार धइगु हे सकलें पार्टीया राष्ट्रिय सहमति खः। वहे राष्ट्रिय सहमति मदयाः देशय् जुइमाःगु आपालं ज्याखँत जुइ मफयाच्वंगु खः। आः गठन जूगु उच्चस्तरीय संयन्त्रपाखें अज्याःगु सहमति निर्माणय् ग्वाहालि याइगु आशा यायेफु। लिसें संयन्त्र दत धाःसा सरकारयात नं निरंकुश जुयाः थः यत्थे याये मदइगु वातावरण वया बी। उच्चस्तरीय संयन्त्र खास यानाः सरकार सञ्चालनया निंतिं हे खः। सरकारं यायेमाःगु महत्वपूर्ण ज्याखँ सकस्यां सहमति कयाः जक जुइगु जुल धाःसा उकिं सम्भावित कचवंयात नं ब्वलनीगुपाखें पना बी। थुकिं दथु दथुइ वयाच्वनीगु अवरोध नं मदयेका बी ।

More Stories Like this