स्वनिगः बन्दया प्रतिकार

येँ (सन्ध्या टाइम्स)/नेकपा (मसाल)या चुनावी मोर्चा राष्ट्रिय जनमोर्चां संघीयताया विरोधय् थौं स्वनिगः नापं बागमती अञ्चल बन्द धकाः यानाःगु आह्वानं आंशिक लिच्वः लाःगु दु। बन्द धाःसां सतकय् मोटरसाइकल व मेगु निजी सवारी साधन चले जूसां भाडाया गाडी धाःसा चले मजू ।

यलय् पिनेया पसः मचाःसां दुने धाःसा चालाच्वंगु दु। ख्वपय् बन्दया खास हे प्रचार मदुसां पसः बजाः धाःसा पूर्ण रुपं ठप्प जुयाच्वंगु दु। किपुली सम्पूर्ण पसः बजाः चालाच्वंगु दु।
बन्दकर्तातय्सं थौं सुथंनिसें थानकोट, नागढुंगा, सोल्टीमोडय् नापं यानाः प्यंगः गाडी तोडफोड याःगु दु। गाडी तोडफोड याःगुलिं राष्ट्रिय जनमोर्चाया केन्द्रीय उपाध्यक्ष नापं सभासद् सन्तबहादुर नेपाली लगायत स्वंगू दर्जन कार्यकर्तायात ज्वना यंकूगु दु ।

संघीयताया विरोधय् थौं घोषणा यानातःगु स्वनिगः बन्दया प्रतिकार यायेत आह्वान यासें नेवाः स्वायत्त राज्य जन जागरण अभियान अन्तर्गत थौं सुथय् थनया बसन्तपुलिं छगू मोटरसाइकल र्‍याली पिकाल। नेवाः राज्यया ध्वाँय् ब्वयेकाः सलंसः मोटरसाइकलं ब्वति काःगु उगु र्‍याली येँया भद्रमाली, त्रिपुरेश्वर, कालिमाटी, कलंकी, रत्नपार्क, टेकु, न्हूसतक आदि लागा चाःहिलाः हानं बसन्तपुली तुं वयाः क्वचायेकीगु ग्वसाः दु। र्‍यालीं संघीयता विरोधी होशियार, नेवाः राज्य जिन्दावाद, पसः बजाः चायेके नु धइगु नारा थ्वयेका वंगु खः। र्‍यालीइ येँया थीथी लागां वयाच्वंपिं नेवाःतय्सं बसन्तपुली वयाः ब्वति काःगु खः। मोटरसाइकल र्‍याली थीथी लागाय् चाःहिउसां गनं नं बन्दकर्तातलिसे मुठभेद धाःसा मजूगु खँ धाःगु दु ।