यायेफुसा कवाड व्यवसाय नं सफल

मधु श्रेष्ठ

रोजगारीया निंतिं मनूतय्सं थीथी कथं व्यवसाय चले याना वयाच्वंगु दु। तर छगू अलग कथं संचालन यानाः नं सफल जुयाच्वंगु खः, पुलांगु ज्या लगे मजूगु कवाडी ज्वलंया व्यवसाय। येँया पचलीइ थुकिया छगू पसः दु 'पचली स्क्रायाच (कवाड) सेन्टर। थ्व शाही परिवारं चले याना वयाच्वंगु व्यवसाय खः। थ्व झिन्यादँ, नीदँ न्ह्यवंनिसें चले जया वयाच्वंगु व्यवसाय खः' धइगु सम्बन्धित शाही परिवारया धापू दु ।

पचली स्क्रयाच सेन्टरय् थीथी कथंया गाडी, मोटरसाइकलया पुलांगु वा न्हूगु पार्टपुर्जात मियातःगु दु। उलि जक मखु थन साइकलया पार्टपुर्जा, कम्प्यूटरया पार्टपुर्जा कवाडीया सामान, डन्डी, पांग्रा नँ आदि थेंज्याःगु सामानत नं मियातःगु दु ।

थ्व पसलय् थुलिमछि सामान वा पार्टपुर्जात गनं हइगु धइगु न्ह्यसःया लिसलय् कवाड सेन्टरया साहु राजकुमार शाहीं धयादी, 'थन अप्वः यानाः टेन्डर सामानत वइ। अले मेगु कार्यालयपाखें लिलाम जुयावइगु पार्टपुर्जात नं जिमिसं हयेगु खः। उलि बाहेक शो रुमं नं जिमिसं सामानत हयेगु याना।
शो रुमं धाःसा वय्कःपिंसं अप्वः यानाः डाय्मेज जूगु सामान हइगु जुयाच्वन। सुं व्यक्ति सामान मी हःसा व्यक्तिगत कथं मी हःगु सामान अन न्याना मकाः। बील मदुगु सामान नं कायेगु मयाः ।

वय्कःपिंसं थीथी कार्यालय वनाः ज्यालगे मजूगु सामानत लिलाम कथं हइगु जुयाच्वन। अले गनं सामान न्यायेत टेन्डर तयाः नं हइगु जुयाच्वन। उलि बाहेक शोरुमं न्हूगु व पुलांगु स्यंगु पार्टपुर्जात नं हयाः मीगु जुयाच्वन। थन अप्वः यानाः हिरो डोन्डा, यामाहा, बजाजया शोरुमं सामान हइगु खः। उलि बाहेक थन न्हूगु वा पुलांगु गाडीत मीगु वाख न्यायेगु ज्या नं याः ।

थनया सामानत अप्वः यानाः सुनां न्याःवइले धइगु बारे मेम्ह पसः थुवाः क्षितिज शाहीं नं धयादी थन च्वंगु सामान अक्सर यानाः वर्क शपपाखें न्याः वइगु खः। व्यक्तिगत कथं थःगु लागीं सामान न्याःवइपि नं दु ।

पिने बजारय् मदुगु सामान नं थन दइगुलिं थन सामान न्याः वइच्वनीपिं मनूत आपाः खनेदु। थुकिं न्याम्ह स्ताफतय्सं रोजगारी नं बियातःगु दु ।

क्षितिज शाहीया कथं थन न्हिछिया झिद्वः झिंन्याद्वः व गबलें गबलें व स्वयां अप्वः नं व्यापार जू। व्यापारिक दृष्टिकोणं स्वयेबलय् वय्कःपिनिगु व्यवसाय यक्व हे सफल जूगु खनेदु। थन कारखाना दयेकातःगु जग्गा नं वय्कःपिनिगु खः। वय्कःपिनिगु व्यवसाय स्वयेबलय् मेहनत व लगनं ज्या याये फःसा छगू अलग्ग किसिमया व्यवसाय नं सफल जुइ फइगु खनेदु ।

More Stories Like this