गिरिजाया नेतृत्वय् संयन्त्र
येँ (सन्ध्या टाइम्स)/राजनीतिक गतिरोध अन्त्य यायेगु निंतिं अन्ततः नेपाली कांग्रेसया सभापति नापं पुलांम्ह प्रधानमन्त्री गिरिजा प्रसाद कोइरालाया हे नेतृत्वय् स्वम्ह दुजः दुगु उच्च स्तरीय राजनीतिक संयन्त्र दयेकाः हाकनं छकः कोइरालायात हे नेता नालेत एनेकपा (माओवादी) व नेकपा (एमाले) तयार जूगु दु। थौं सुथय् कोइराला निवास महाराजगंजय् स्वंगू दलया शीर्ष नेतातय्गु बैठकं कोइरालाया नेतृत्वय् उगु कथंया संयन्त्र दयेकूगु खः ।
संयन्त्रय् एनेकपा (माओवादी) पाखें अध्यक्ष प्रचण्ड व नेकपा (एमाले)पाखें अध्यक्ष झलनाथ खनाल च्वनादीगु दु। आःयात स्वंगू जक दलया नेतृत्व च्वनाः दयेकूगु उगु संयन्त्रय् आः संविधानसभाय् दुथ्याःगु राजनीतिक दलया प्रतिनिधित नं तयेगु जुइ धकाः धाःगु दु ।
स्वंगू दलया शीर्ष नेतातय्गु मुँज्या च्वने न्ह्यः हे एनेकपा (माओवादी)या केन्द्रीय पदाधिकारीतय्गु मुँज्या च्वनाः राजनीतिक निकास, न्हूगु संविधान व शान्ति प्रकृयाया निंतिं उच्चस्तरीय राजनीतिक संयन्त्र आवश्यक जूगु ठहर यानाः उच्च स्तरीय संयन्त्र दयेकेगु निंतिं पार्टीं पूर्ण रुपं ग्वाहालि यायेगु खँ क्वःछिउगु खः। आः सरकारं याइगु हरेक ज्या थ्व संयन्त्रं पारित यानाः नं शुरु याइ ।
प्रम नेपाल संयन्त्रं पिने
येँ(सन्ध्या टाइम्स)/ताः ई लिपा जक नीस्वनेत ताः लाःगु उच्चस्तरीय राजनीतिक संयन्त्रय् प्रधानमन्त्री माधव कुमार नेपाल धाःसा दुमथ्याइगु जूगु दु ।
संयन्त्र दयेके न्ह्यः हे संयन्त्र दयेकेगु खँय् सहमति प्वंकाः नं संयन्त्रया कार्यक्षेत्रया बारे स्पष्ट यायेमाः धकाः बिचाः प्वंका च्वनादीम्ह प्रधानमन्त्री नेपालयात संयन्त्रं पिने हे तयेगु धकाः स्वंगू दलया शीर्ष नेतातय्गु दथुइ सहमति जूकथं वय्कःयात संयन्त्रय् दुमथ्याकूगु खः ।
प्रधानमन्त्री नेपालं आवंलि सरकारया फुक्क निर्णय संयन्त्रं हे याइगु जकं मखु ला धकाः आशंका यानाः उगु कथं बिचाः प्वंका वयाच्वंगु खः धकाः धाःगु दु। तर राजनीतिक पार्टीया नेतातय्सं थ्व उच्चस्तरीय राजनीतिक संयन्त्रं राजनीतिक विवाद व इलय् हे संविधान दयेकेगु निंतिं माःगु कथं भूमिका म्हितेगु जुइ अले सरकारयात माःगु सुभाव बीगु जुइ धकाः न्ह्यथना वयाच्वंगु दु। संयन्त्रपाखें सरकारं याइगु छुं नं कथंया ज्याखँ आः थ्वहे संयन्त्रपाखें पारित याकाः जक कार्यान्वयन याकेगु जुइ धकाः नं धाःगु दु ।
