शिविर त्वःता वंपिं अयोग्य लडाकुत

माओवादीया थीथी शिविरय् च्वनाच्वंपिं अयोग्य धाःपिं लडाकुतय्त म्हिगःनिसें चीकेगु ज्या शुरु याःगु दु। अनमिनं थुमित अयोग्य धकाः ठहर यायेधुंकाःलि उमित छु यायेगु धइगु विवाद पिहां वःगु खःसा आः माओवादीं यकःति रुपं हे उमित शिविरं चीकाः छेँय् लित छ्वयेगु निर्णय याःगु खःसा वहे निर्णय कथं म्हिगःनिसें थ्व ज्या शुरु याःगु खः। खतुं शिविरं लिहां वयेधुंकाः आः उमिगु भविष्य छु जुइ धइगु खँ स्पष्ट मजूनि। उमित छुं भचा ध्यबा बियाः छेँय् लित तयेयंकेगु खँ धाःगु दु। तर वःदँमछि युद्धय् संलग्न जूगु, युद्ध लिपा नं तःदँ तक सैनिकतलिसे हे शिविरय् च्वंगु आदि कारणं उपिं शिविरं पिहां वंसां सैन्य मानसिकतां धाःसा उलि याउँक पिहां वये फइ मखु। यदि शिविरं पिहां वयेधुंकाः नं उमित माःगु वातावरण तयार मजुल, समाजं घृणाया मिखां स्वत, स्वीकार मयात, छेँजःपिंसं ग्वाहालि मयात धाःसा उपिं थौं शिविरं पिहां वः थें कन्हय् छेँनं पिहां वइ। छेँनं पिहां वनाः गन वनी? थ्व सकस्यां चिउताःया विषय जुइमाः। सैन्य पृष्ठभूमि दुपिं मनूत खः। छुं नं यायेत उपिं ग्याइ मखु। आपराधिक ज्याय् लगे जुइफु। मेमेगु सशस्त्र पुचलय् आवद्ध जू वनेफु। अबलय् उपिं माओवादीया जक समस्या जुइ मखु। मुक्कं देय्या समस्या जुया बी। उकिं थुकियात माओवादी लगायत राज्य व मेमेगु विदेशी सहयोगी देय्तय्सं नं ध्यान बियाः स्वयेमाःगु जुया बी। थ्व कन्हय् मेगु समस्या मजुइमा ।

More Stories Like this