छम्ह कलाकारया आह्वान पौ

झीगु नं दिन वइ तिनि

रत्नकाजी शाक्य

दकलय् न्हापां ला न्हूदँया भिंतुना। खय्त ला २०१० दँ मछि पुलांगुयात गय् यानाः न्हूदँ धायेगु। दँ न्हूगु जुइगु मखु झी हे पुलां जुइगु खः। बरु दछिया दकलय् अप्वः न्यायेकीगु नखः नेपाल बन्दया लसताय् दुनुगलंनिसें भिंतुना धायेगु खः लाकि? ह्याप्पी नेपाल बन्द ! सेम टु यु धयादिसँ ।

जिगु कला प्रदर्शनीया शीर्षक खः ग्लोवल वार्मिङ्ग। थ्व ग्लोबल वार्मिङ्ग नं खः, ओबामा व हु जिन्ताओयात पृथ्वीया चार्मिङ्ग बचे यायेत, उत्सर्जन घटे यायेत, नत्र झी सकस्यां जीवन विसर्जन जुइ, भयंकर प्रलय जुइ धकाः बियागु वार्निङ्ग नं खः। मेगु खँ, झीथाय् यक्व टायर च्याकेगु ज्या याःगुलिं नं ग्लोवल वार्मिङ्ग जुयाः सगरमाथाया च्वापु नाया वःगु खः लाकि? अतः नेतातय्त टायरया उत्सर्जन कम यायेत व सरकारयात नं टायर च्याकेगु वातावरण दयेका मबीत ग्लोवल वार्निङ्ग बियाच्वना। थुकिया नापं उकुन्हु कोपन हेगन थ्यंका वःपिं नेपाली लावालस्करयात नं थुगु ओपन हेभनय् निमन्त्रण यानाच्वना ।

कला राष्ट्रया तिसा खः धकाः नेतातय्सं खुब भाषण याइ तर तिसा न्यायेत धाःसा ध्यबा मदु। उमि न्हय्गू पुस्ताया गाक्क दां छुटे याये हे माल। झीसं धायेगु याना, न्यादँ टिके जूगु सरकार हे मवल। तर सरकार धइगु प्यला न्याला हे जक टिके जूगु बांलाः। प्यला न्याला टिके जूसा ला न्हय्गू पुस्तायात गाक्क सम्पत्ति मुंकेधुंकी धाःसा न्यादँ हे टिके जूगु जूसा गुलि पुस्तायात गाक्क मुंकीगु जुइ? खयर त्वःता छ्वये थ्व खँयात। कलाया धनी देशया गरीब कलाकार झीपिं। जाबा छगू कला एकेडेमि ला स्वीदँ तक नं दयेके मफु। आः ला कला एकेडेमि दयेकी धइगु तःधंगु खँ मखुत, कला एकेडेमि दयेकीगु इलय् तक ग्वःगू सरकार हिलेधुंकी, थ्व महत्वपूर्ण खँ खः। भागबन्डा व झन्डाया फन्डाय् फुक्क हे ठन्डा जुयाच्वंगु दु ।

नये मखंगु व पुने मखंगु देशय् कलाया विकास मजुइगु मखु। बरु कलाया विकास मजुल धाःसा देश नये मखनीगु व पुने मखनीगु अवस्थाय् थ्यनीगु खः। मही नं फ्वनेगु थल नं सुचुकेगु छाय्? थ्व धायेत लज्या चायेमाःगु मदु कि थ्व देश विदेशय् चिपगु गिलास सिलाः कमे यानातःगु ध्यबां चले जुयाच्वंगु दु। कला सुन्दरताया पर्याय खः। थुकियात चीका छ्वत धाःसा कुरुपता जक ल्यनाच्वनी। जाजरकोटय् ध्वगीगु जाकि लुटालुट, कालिमाटीइ ध्वगीगु तरकारी लुटालुट, थुखे सरकारी धुकू लुटालुटया खँ हे ल्हाये मते। थज्याःगु देशय् खिचाया लागिं जक लय् ३० हजार खर्च याइपिं सम्भ्रान्तत नं दु। थुपिं खिचाया हे कारणं चर्चित जुइ अले थःगु छेँय् थम्हं हे हानं 'खिचापाखें सावधान' धकाः नं च्वके बी। उकिं अर्थ मन्त्रीत उमिगु कम्पाउण्ड दुने दुहां वनेत ग्याइ। बरु कलाकार साहित्यकारतय्के हे कर कयाः देश चले यायेगु सोच तइ व कला अनुत्पादक धकाः गफ नं त्वःता जुइ। बजेट भाषणय् कला शव्द उच्चारण यायेत हे लज्या चाइ। कला मथू धायेगुली हे गर्व याइ। क माने कछुवा धकाः ब्वना वःगुलिं ला मसिउ देश नं थौं कछुवा गतिं हे न्ह्यानाच्वंगु दु। क माने कला धकाः ब्वनेगु या ले देश गनं गन थ्यनी। करोडौं तूगु पजेरो गइ। करोडौं तूगु छेँ दनी। लखौं तूगु पलङ्गय् द्यनी। लखौं तूगु डाइनिङ्ग टेबुलय् च्वनाः नइ तर अंगलय् छपाः पेन्टिङ्ग यखायेमाल धाःसा वां चःति पिकाइ।
न्ह्यागु थजु, कलाकारत थःगु बलं न्ह्याये दु थें कला ख्यलय् लगे जुयाच्वंगु दु। कलाकार पासापिं, धन्दा कायेम्वाः। राज्यं छुं मबिउसां, समाजं छुं मबिउसां भगवानं झीत अमूल्य सीप बिउगु दु। झीगु नं दिन वइ तिनि। निगू निगू थासं बूम्ह नेताया ला दिन वल धाःसा झीगु मवइगु खँ हे मदु।

(कलाकार शाक्यया 'ग्लोवल वार्मिङ्ग' शीर्षकया कला ब्वज्या बबरमहलया आर्ट काउन्सिलय् जुयाच्वंगु दु।)

More Stories Like this