जनताया मार स्वइम्ह सु ?

नरेन्द्रमान श्रेष्ठ गोंगजु

चिनी किलोया ७५/- तका, माय् किलोया १५०/- तका, आलु धार्नीं ११०/- तका। थ्व खः थौकन्हय्या बजाः भा। २०४६ साल न्ह्यः पंचायत तन्त्रया पालय् किलों १३ तका वंगु चिनी संघीय लोकतान्त्रिक गणतन्त्रय् ७५ तका अय्नं जनता मौन, सरोकारवाला संघ संस्थात मौन, सरकार मौन। न्हूगु नेपाः दयेकेगु धकाः वँय् हाः थें हालाच्वंपिं देय्यात समृद्ध राष्ट्र दयेकेगु धकाः हालाच्वंपिं गणतन्त्र नेपाःया नेताय्त बजाःभाः न्हियान्हिथं थहां वनाच्वंगु बारे छुं नं सरोकार मदु। नेपाःमितय् दैनिक जीवन हनेत मदयेक मगाःगु थीथी दैनिक उपभोग्य सामानतय् भाः धाःसा थहां वनाः चन्द्रमाय् थी थें च्वनेधुंकल। नेपाःया बजारय् ब्यसाः भाः गुणाङ्कया हिराबं बढे जुयाच्वंगु दु। अय्नं थ्व देय्यात समृद्ध राष्ट्र दयेकेगु जिम्मा कयाः राज्य संचालन यानाच्वंपिं सत्ताधारी नेतात अले प्रतिपक्षया नेतात धाःसा थःथःगु राजनैतिक सत्ता स्वार्थय् तक्यनाः थज्याःगु खँयात बेवास्ता यानाच्वंगु दु। सरकार जनताया ध्यबाय् मोजमस्ती यायेगु ज्याय् तलीन जुयाच्वंगु दुसा विपक्षीत थःके सत्ता मदयाः भ्वय्भ्वय् कनाच्वंगु दु ।

सरकार सत्ता गय् यानाः ल्यंकातये धकाः लगे जुयाच्वंगु दुसा प्रतिपक्षी गय् यानाः सत्ता थःगु ल्हातय् लाकेगु धकाः लगे जुयाच्वंगु दु। अले सर्वसाधारण धाःसा महङ्गीया मारय् लानाच्वंगु दु।
थौंकन्हय् नेपाःया जनता महंगी, असुरक्षा, असुविधा व अस्थिरताया चक्रय् लानाच्वंगु दु। तर संविधानसभाया चुनावय् निगू निगू क्षेत्रं पराजित जूसां गणतन्त्र नेपाःया प्रधानमन्त्री जुइत ताःलाःम्ह भाग्यमानी प्रधानमन्त्री माधव कुमार नेपाल धाःसा थः परिवार सहित मन्त्री व सभासद् ज्वनाः विदेश सयर यानाच्वंगु दु। अले देय्या दकलय् तःधंगु राजनैतिक पार्टी माओवादी धाःसा नागरिक सर्वोच्चताया नामय् अनेक आन्दोलन यानाः अःखतं जनतायात हे असुविधा, असुरक्षा व अस्थिरताया घेराबन्दीइ लाकाच्वंगु दु। महंगी व अभावय् लानाच्वंपिं जनताया समस्यायात स्वयाः नं नेतात थःथःगु स्वार्थय् लगे जुयाः जनतायात सास्ती यानाच्वंगु दु। मानौं जनताया समस्या धइगु छुं नं मखु थें, जनताया समस्या धइगु थःपिनि सरोकारया विषय हे मखु थें जनतायात चुनावी भोट बैंकया रुपय् जक छ्यलेगु यानाच्वंगु दु। थःथःगु स्वार्थ पूवन कि जनता धइपिं �वाकलय् दुंसां वास्ता मयायेगु धइगु राजनैतिक पार्टीतय्गु नियती हे जुइ धुंकल।
संविधान सभाया चुनाव लिपा नेपाःया राजनीतिक ख्यलय् दकलय् तःधंगु पार्टी जुयाः नं थःगु अपरिपक्वता व यकःति निर्णयं यानाः सत्तां पिने च्वनेमाःम्ह एकीकृत नेकपा (माओवादी) नागरिक सर्वोच्चताया नामय् जनतायात राहत बीगु पलेसा आहत बियाच्वंगु दु। गबलें सुकुम्बासीया नामय् जग्गा अतिक्रमण याइगु, गबलें राजनैतिक व नागरिक सर्वोच्चताया नामय् आन्दोलन यानाः त्रास ब्वलनीगु गतिविधि याइगु। थःगु भातृ संगठनतय्सं न्ह्याका वयाच्वंगु बन्द, हडताल, जुलुस, चक्काजाम थेंज्याःगु ज्यायात बन्द यानाः जनतायात राहत बियाः सर्वसाधारणया भरोसा त्याके माःगु मखु ला ?

सरकार व थीथी राजनैतिक पार्टीतय्गु अदुरदर्शी नीतिं यानाः देशय् ब्वलनाच्वंगु अशान्ति अस्थिरता अभाव अपहरण, हत्या, लुटपाट, गुण्डागर्दी, बन्द, हडताल, जुलुस, चक्काजाम, भ्रष्टाचार, अराजक क्रियाकलाप अले महंगीपाखें जनतायात राहत बीमाःम्ह माओवादी झन थम्हं हे नागरिक सर्वोच्चता धकाः नागरिकया हे अधिकार लाका कायेगु ज्याय् लगे जुयाच्वंगु दु ।

दकलय् न्हापां जनता भय मुक्त लकसय् म्वाये दयेमाः। अले जनतायात म्वायेत मदयेक मगाःगु आधारभूत आवश्यकता धइगु 'गाँस, बास व कपास' खः। थ्व बिना जनतायाके न्ह्याक्व हे नागरिक सर्वाच्चता दुसां, प्रजातन्त्र व लोकतान्त्रिक अधिकार दुसां छुं महत्व दइ मखु। जब देशय् सुशासन दइ, अराजक गतिविधि जुइ मखु अले तिनि देशय् शान्ति दइ, असुरक्षा, अभाव, अशान्ति, महंगी, भ्रष्टाचार, बन्द, हडताल, जुलुस बन्द जुयाः देय् कृषि क्रान्तिइ वनी, औद्योगीकरणय् वनी, व रोजगारी सिर्जना जुइ जनता निर्धक साथ म्वाये खनी। अले नागरिक सर्वोच्चता धइगु अथें हे सुनिश्चित जुइ। तर नेपाःया विडम्वना, नेपाःया संघीय लोकतान्त्रिक गणतन्त्रया सरकार, विपक्षी पार्टी, अले सम्बन्धित सरोकारवालातय्गु ध्यान धाःसा थुखेपाखे वनाच्वंगु मदु। विपक्षी पार्टी माओवादी नागरिक सर्वोच्चताया नामय् थीथी कथंया आन्दोलन यानाच्वसा सरकार गबलें सगरमाथा बेस क्याम्पय् मन्त्रिपरिषद्या बैठक च्वनेगु यानाच्वनसा गबलें सभा सम्मेलनय् ब्वति कायेगु नामय् राज्यया धुकू फुकाः परिवार नापं विदेशय् सयर यानाच्वन। जनताया समस्याय् न सत्तापक्षया ध्यान दु, न प्रतिपक्षीया ध्यान बीगु फुर्सद दु ।

More Stories Like this