स्वम्ह माओवादी कार्यकर्ता स्यात
विरोधय् भोजपुरा क्षेत्र बन्द
तराई मुक्ति मोर्चापाखें जिम्मा
येँ (सन्ध्या टाइम्स)/बाराया गन्ज भवानीपुरय् थौं वंगु चान्हय् स्वम्ह माओवादी कार्यकर्तायात गोलीं कयेकाः स्याना बिउगु दु। आक्रमणकारीत आः तक म्हमसिउनि। उमिसं शर्ट मेसिनगन व माउजर थेंज्याःगु हतियार छ्यःगु खँ धाःगु दु। उगु आक्रमणय् लानाः माओवादीया निम्ह कार्यकर्ता अन हे सीगु खःसा मेपिं निम्ह घाःपाः जूगु दु ।
उगु आक्रमणय् लानाः माओवादी कार्यकर्ता रामप्रसाद यादव, वया हे काय्चा दारा यादव व अम्बिका यादव सीगु खः। रामप्रसाद माओवादी बारा जिल्ला कमिटीया दुजः खः। उकी लानाः माओवादीया भोजपुरा राज्य समितिया दुजः कन्हैया यादव व सियाराम कुशबाह घाःपाः जूगु खः ।
थःथितिपिंथाय् भ्वय् वनाः बहनी छेँय् लिहां वनाच्वंगु इलय् बहनी साढे ९ बजेपाखे उमित लँय् हे गोली प्रहार याःगु खः। आक्रमणकारीत ख्वाः त्वपुक नकाब पुना वःगु खँ धाःगु दु। उमित आः तकं म्हसीके मफुनि। उकी लानाः गम्भीर रुपं घाःपाः जूपिं निम्हेसितं येँय् हयाः नर्भिक अस्पतालय् वासः याकातःगु दु। उखे थः कार्यकर्ताया हत्या याःगु खँयात कयाः माओवादी कार्यकर्तातय्सं बारान्यंकं विरोध आन्दोलन शुरु यायेधुंकूगु दु। माओवादीया भोजपुरा गणराज्य समितिं थौं हे मुक्कं भोजपुरा क्षेत्र बन्दया आह्वान यानाः उगु लागा ठप्प याना बिउगु दु ।
माओवादीया थ्व बन्दं यानाः थौं बारा, पर्सा व रौतहत जिल्ला ठप्प जूगु दु। थौं सुथंनिसें उगु लागाया जनजीवन प्रभावित जूगु दुसा उगु लागा जुयाः चले जुइगु यातायात नं बन्द जूगु दु। माओवादीं थः कार्यकर्ताया हत्या याःपिं हत्यारातय्त तुरुन्त ज्वनाः कारवाही यायेमाःगु, सीपिनि छेँजःयात क्षतिपूर्ति बीमाःगु लगायतया नारा थ्वयेकाः अन प्रदर्शन यानाच्वंगु दु ।
थ्वहे झ्वलय् उगु गोली काण्ड थःपिंसं यानागु धकाः तराई मुक्ति मोर्चा बारा, पर्सा व रौतहतया सैन्य कमाण्डरं दावी याःगु दु। स्थानीय संचार माध्यमयात टेलिफोन यानाः उमिसं थ्व ज्या थःपिनि जिल्ला कमाण्डर जयरामया नेतृत्वय् यानागु धकाः जिम्मा काःगु खः ।
