थःगु शरीर हे थःगु वशय् मदु

सुनिता मानन्धर

अत्ताहि अत्तनो नाथो कोहि नाथो परोसिया
अत्तनाव सुदन्तेन नाथं लमति दुल्लभं
थुगु गाथा भगवान बुद्धं कुमार कश्यपया मांयात कनाबिज्याःगु खः। राजगृहया श्रेष्ठी कन्या थः भाःतयाके उजं कयाः प्रवजित जूगु खः। वया कायं प्रवजित जुइवं झिंनिदँ लिपा वं थः काययात खन। काययात खनेवं थःगु मनयात ची मफयाः वं जि काय धकाः कायया चीवर ज्वं वन। कायम्हं थः मांया आशक्ति त्वःफिकेत 'भिक्षुणी जुयाः नं स्नेह बन्धन त्वःफिके मफुला?' धकाः ल्हाः त्वःफिका वनेवं थः कायं चिउताः मतः धकाः वया मनय् वैराग्य उत्पन्न जुल। थुगु हे इलय् भगवान बुद्धं थः हे थःया मालिक खः सु मेपिं मालिक जुइ? थःत दमन याःसा दर्लभ स्वामित्व प्राप्त जुइ धकाः कनाबिज्याःगु खः ।

थुगु गाथा बुद्ध कालय् भगवान बुद्धं कनाबिज्याःगु गाथा खःसां थौं नं थुगु खँ अतिकं समसामयिक खनेदु। थौं झीत दकलय् अप्वः दुःख जुइगु धइगु थःगु म्हपाखें खः। अनंलि दुःख जुइगु थःथिति, थः सन्तान जःख आदिपाखें खः। थौंया इलय् मचांनिसें वैश वने धुंकूपिनि तकं नाना कथंया ल्वचं कयेका च्वनेमाःगु दु। उकिं थौं हलिंन्यंकं हे 'हेल्थ इज वेल्थ' धइगु धापू प्रचलित जुयाच्वंगु दु। थुगु धापूनाप नं च्वय् न्ह्यथनागु गाथायात स्वानाः स्वयफु। थौं सकसिनं ल्वय्पाखें तापाना च्वनेया लागिं नाना कथं व्यायाम याना
च्वनी। नसा त्वँसा व वसतय् तकं ध्यान बियाः फयांफक्व थः स्वस्थ जुइगु कुतः यानाच्वनी ।

थौं झीसं न्यना, विश्व सुन्दरी कासाय् ब्वति कायेत तयार जुयाच्वंम्ह तकं छत्थुं ल्वचं कयाः कुरुप जूगु घटना। झीगु थ्व म्ह थौं गुलि बांलाः, गुलि यइपुसे च्वं धाःसां ल्वचं कल कि व कुरुप जुइ। थुगु इलय् थःगु म्ह हे थःगु लागिं घाघः जुइ। अथे ला सुं छम्हेसिया गति जक थथे जुइगु मखु प्राणी जुयाः जन्म कासेंलि हरेकसित थज्याःगु गति जुइफुगु स्वाभाविक हे खः ।

बुद्धकालय् पुतिगतितिस्स धइम्ह भिक्षुया म्ह छम्हं कै वयाः ध्वग्गिनाः लासाय् च्वनेवं भगवान बुद्धं वया सुसाःकुसाः याः बिज्याःगु इलय् थुगु खँ धयाबिज्याःगु खः - 'थ्व छंगु शरीर छन्हु छुं ज्याख्यले मजूगु सिँग्वः थें जुइ तिनि।' थुगु खँ न्यनाः भिक्षुं थःगु न्हापायागु बांलाःगु म्ह, न्हाय्, मिखा, ल्हाः तुति लुमंकूगु खँ बौद्ध साहित्यय् न्ह्यथनातःगु दु ।

मनूया थःगु म्ह गबलय् छु जुइ सुनां धाये फइ मखु। थौं छुं मजूम्ह मनू पलख लिपा हे छग्वारा चिनाः छुं याये मफयेफु। छुं म्वाःम्ह मनुखं नं छुं म्वायेक अङ्गप्रत्यङ्ग मदयेका च्वनेमाःपि नं दु। थुकथंया घटना बुद्धकालय् व थौं जक मखु कालान्तर लिपा तक नं न्ह्यानाच्वनी। जीवनय् गबलय् छु जुइ धकाः सीका काये फुगु विद्या झीके मदु। उकिं झीसं मात्र थःगु मनयात संयम यानाः थःगु शरीरयात स्वस्थ याना तयेमाः। धम्मपदया थुगु गाथाय् नं धयातःगु दु थ्व छापा समान सिंगार यानातःगु देह घाः व दर्दपूर्ण नानाविधि संकल्प जायाच्वंगु अस्थिर विचित्र शरीर ।

अथे ला झीगु म्ह छुं ज्याख्यले मजूगु सिँग्वः थें जक जुइगु मखुसें झी सकसियां लिउने काल नं च्वनाच्वंगु दु। गबलय् सुयात गनं कालं ज्वनी व नं धाये फइ मखु। गुम्हेसित मांया प्वाथं हे यंकूसा गुम्हेसित मचांनिसे लित्तुलिनाः बुराबुरी जुइधुंकाः जूसां मृत्युया वशय् हे वनेमाःगु खँ नं थुगु गाथां यचुका बिउ। थ्व रुप जीर्ण जुया वनी, ल्वगिया छेँय् अत्यन्त क्षण भंगुर नवःगु म्ह त्वःताः मरणया जीवनय् अन्त जुइ। अथे हे मेगु गाथाय् न्ह्यथनातःगु दु, साजवालं कथि कयाः सायात ख्याः थें बुरासू व मृत्युं प्राणीया आयुयात ख्याना छ्वइ ।

अथे हे बुद्धकालय् निर्धनम्ह कृषा गौतमी धनी कुलय् ब्याहा जूगु खःसा वयात सकसिनं तिरस्कार याइगु जुयाच्वन। लिपा काय छम्ह बुइवं वयात तिरस्कार याइगु ला त्वःतल तर छुं ई लिपा हे कायम्हेसित कालं यंकल। थुगु दुःखयात सह याये मफयाः भगवान बुद्धयाथाय् वनाः थः मचा म्वाकेगु वासः फ्वंवन। लिपा छन्हु सकलें सीमाःगु खँ थुइवं वं थःगु मनयात चिनाः अर्हत जूगु खँ नं बौद्ध साहित्यय् न्ह्यथनातःगु दु ।

अतिकं दुःख सियाः थम्हं मनसें थः सन्तानया प्वाः जायेकाः सदां सन्तानया भिं तायेकाच्वंसां लिपा वहे मस्तसें थःत वास्ता मयाः धकाः दुःख तायेका जूपिं मांबौपिं नं दु। गुलिसियां मांबौ मदया दुःख, गुलिसियां सन्तान मदयाः दुःख, गुलिसियां थः सन्तान कुलतय् लानाच्वंगु दुःख, गुलिसितं धन सम्पत्ति मदयाः दुःख, गुलिसितं बाय् मदयाः दुःख। सकसिकें थःथः कथंया थःथःगु हे दुःख दु, पीर दु, धन्दा दु। थुकथं नाना कथंया दुःख व पीर क्वबिबिउँ मनूत न्हियान्हिथं सिनाच्वनी। थौं थुगु गाथा लुमंके बहः जू, थःगु शरीर ला थम्हं धया थें मदु धाःसा काय दयां छु याये धन दयां छु याये ?

हरेक खँयात सकारात्मक व नकारात्मक निगू पक्षं कायेफु। थः हे थःया नाथ खः धकाः थौं अहम भावना क्यना जूपिं नं म्हो मजू। थुकथं अहम भावनाय् दुनाच्वंपिंसं गुब्सं बांलाःगु ज्या याइ मखु। थौं गुलि नं ल्वापु हत्या हिंसा जुयाच्वन व सकतां थुकथंया नकारात्मक सोचं हे पिदंगु खः। उकिं थौं थः हे थःया नाथ खः, थःगु गति थः हे खः। गथे व्यापारीं बांलाःम्ह सलयात तालिमय् तइ अथे थःत थम्हं संयमय् तयेमाः धइगु थुगु गाथायात सकसिनं मनन याये फःसा थःगु नं भिं जुइ, हलिमय् न्यंकं न्ह्यइपुगु लकस ब्वलनी ।

More Stories Like this