माओवादी दुने हे भारतीय चलखेल

प्रमुख प्रतिपक्षी माओवादीया अध्यक्ष पुष्पकमल दाहाल 'प्रचण्डं' आः नकतिनि भारतया भण्डाफोर यायेगु झ्वलय् बियादीगु अभिव्यक्तिं वय्कःया थःगु हे पार्टी दुने कचवं पिहां वइगु स्थिति सिर्जना जूगु दु। भारतं यदि माओवादीया मेम्ह वरिष्ठ नेता डा. बाबुराम भट्टराईयात प्रधानमन्त्री दयेकेगु खःसा थःपिंसं समर्थन याये धकाः प्रस्ताव छ्वया हयाच्वंगु खँ पार्टीया छगू आन्तरिक ज्याझ्वलय् 'खुल्ला' रुपं न्ववानादीवं पार्टी दुने थ्व कचवंया अवस्था पिहां वःगु खः ।

धायेत ला वय्कलं थ्व खँ भारतं थःगु पार्टी दुने तकं हस्तक्षेप यायेत स्वयाच्वन धइगु अर्थय् धयादीगु जुइमाः तर वय्कःया थ्व धापुतिं माओवादी दुनेया वरिष्ठ नेतात तकं भारतीय चलखेलया गोटी जुयाच्वंगु दु धइगु खँया संकेत धाःसा पिनेत बिउगु दु। नेता डा. बाबुराम भट्टराईया सवालय् न्हापा नं भारतीय स्वापूलिसे स्वानाः विवाद वयेधुंकूगु दु। डा. भट्टराईयात पार्टीं यानातःगु कारवाही लित कायेमाः धकाः भारतं दवाव बिउगु व कारवाही लित कायेधुंकाः डा. भट्टराईनं भारतया यात्रा याःगु खँ अबलय् चर्चाय् वःगु खः। आः नं भारतं भट्टराईयात हे प्रधानमन्त्री दयेकेमाः धकाः दवाव बियाहःगु खँ सार्वजनिक जुइवं आः डा. भट्टराईनं हे थुकिया बारे थःगु धापू स्पष्ट यायेमाःगु आवश्यक जूगु दु। अले थुकिया बारे वय्कलं धयादीगु धापुतिं पार्टी दुने गज्याःगु अवस्था सिर्जना याइगु खः व धाःसा मेगु चिउताःया विषय जुयाच्वंगु दनि ।

More Stories Like this