छगू भोट जितः नं

न संसदया चुनाव, न स्थानीय निकायया चुनाव। तर नं मनूतय् छेँय् भोट काः वइपिं धाःसा वःगु वलं। पाःगु थुलि जक खः कि थुगुसी भोट काः वःपिं सुं नेता मखुसें फिल्मय् म्हितीपिं अभिनेतात खः। अभिनेता जक मखु, थुगुसी म्येँ हालीपिं गायक गायिका, संगीतकार, म्येँ च्वमि व मेपिं कलाकारत नं भोट कायेगु लागिं थः फ्यानतय् छेँय् छेँय् ब्वाँय् जुयाच्वंगु खने दत ।

वय्कःपिं भोट कायेत ब्वाँय् जूगु चुनाव त्याकाः सभासद् वा मन्त्री जुइत धाःसा मखु। थुगुसी जुयाच्वंगु पेज थ्री पिपल्स च्वाइस एवार्ड-११३० थःगु ल्हातय् लाकेत वय्कःपिं उखेंथुखें ब्वाँय् जुयाच्वंगु खः। नोमिनेशनय् लाःगु नेपालभाषाया म्येँ, म्युजिक भिडियो व फिल्मया २५ गू विधाय् सुयात दकलय् अप्वः भोट वइ वयात हे थ्व अवार्ड लाइ। वय्कःपिंत एसएमएस, इन्टरनेट व नेपालभाषाया थीथी पत्रिकाय् पिहां वःगु फाराम मार्फत थ्व भोट वइगु खः। थ्व भोट कायेगु लागिं उगु नोमिनेशनय् लाःपिं कलाकारत थुगुसी गुगु ढंगं उत्साहपूर्वक ब्वाँय् जूगु खः व स्वयेबलय् पेज थ्री नेपालभाषा बाःछिपतिं याःगु ज्याझ्वः गाक्कं सफल जूगु खनेदत ।

थुकी भोटिङ्ग यायेगु ई म्हिगः बहनीनिसें क्वचाल। आः ग्वसाः खलकं थुकिया एनालाइसिस यानाः त्याःपिं कलाकारत ल्ययेगु ज्या याइ। थ्वहे वइगु पुस ३० गते यलया अशोक हलय् छगू ज्याझ्वः यासें त्याःपिं कलाकारतय् नां घोषणा याइगु ग्वसाः दु ।

पेज थ्रीया सम्पादक दर्शनवीर शाक्यं भोटिङ्गया लागिं कलाकार व फ्यानतय्सं क्यंगु उत्साहपाखें थः नं उलि हे उत्साहित जुयागु खँ कनादीगु दु। थ्व थम्हं बिचाः याना स्वयां गाक्कं हे अप्वः जूगु खँ नं वय्कलं कनादिल ।

नेपालभाषाया संगीत व फिल्म ख्यलं थःगु ढंगं ज्या यानाच्वंगु यक्व दयेधुंकल। उकी आम दर्शक व श्रोताया गज्याःगु सहभागिता वा सरोकार दु धकाः स्वयेगु ल्याखं थ्व ज्याझ्वः यानागु खँ वय्कलं कनादिल ।

थुकिया त्याःबू भोटिङ्गया लिधंसाय् जुइगु जुयाः थुकी एवार्ड काये मफुगु विधा वा कलाकारया गुणस्तर व क्षमता कमजोर खः धकाः मूल्यांकन याये मफइगु बिचाः नं वय्कलं प्वंकादिल। अथे खःसां भोटिङ्ग याःपिंसं बांलाःगु ज्वलं व बांलाःम्हेसित हे भोट बिल जुइमाः धकाः थम्हं आशा यानागु खँ नं वय्कलं कनादिल ।

थुकी भोट कायेगु लागिं गुलिखे कलाकार अफिसय् बिदा हे कयाः सक्रिय जुयादीगु खः। गुलिसिनं थःगु बिधा व कोड नम्बर च्वयातःगु अलग्ग हे स्लीप दयेकाः इना बिसें भोट कायेगु ज्या नं याःगु खः। अझ गुलिसिनं पत्रिकाय् भिंतुना विज्ञापन छापे यानाः नं भोट बीत इनाप याःगु खः। ज्याझ्वःयात सकस्यां गम्भीर रुपं हे काःगु खँया थ्व छगू दसि खः ।

म्हिगः तकया दुने एसएमएस, वेब साइट व फाराम मार्फत द्वलंद्वः हे भोटिङ्ग जुइधुंकूगु खनेदु। सुयात गुलि भोट वल धइगु खँ आः तक सी मदुनि। ग्वसाः खलकं उकियात ३० गते हे जक सार्वजनिक याइ। उकिं नोमिनेशनय् लाःपिं कलाकार व प्राविधिक लिसें भोटिङ्गय् सहभागी जूपिं सकस्यां लिच्वः छु जुल थें धकाः स्वयेत ३० गते तक थःगु सासः फिना तये हे माःगु जूगु दु ।

नेपालभाषा संगीत ख्यलय् थज्याःगु उत्कृष्ट संगीत ल्ययेगु ज्या न्हापा न्हापा नं मजूगु मखु। तर म्युजिक भिडियो व फिल्मया प्राविधिक विधा समेत छनौट यायेगु थज्याःगु सम्पूर्ण ल्यज्या जुयाच्वंगु धाःसा थ्वहे न्हापांखुसी खः। थुकिं नेपालभाषा फिल्म ख्यलय् बाखं, निर्देशक जक मखु पटकथा, छायाँकन, संपादन, दृश्य परिकल्पना थेंज्याःगु प्राविधिक विषयय् तकं मनूतय् ध्यान सालेगु व कन्हय् उकिया विकासय् नं तिबः बीगु अनुमान यायेछिं ।

खतुं थज्याःगु ज्या फिल्म सम्बन्धी बिस्कं निकायं यायेमाःगु खः। अय्नं फिल्म विकासया लागिं न्ह्याम्हेस्यां पलाः छिउसां उकियात लसकुस हे यायेमाः। भारतय् नं न्हापा 'फिल्म फेयर' नांगु फिल्मी पत्रिकां हे थज्याःगु अवार्डया आयोजना याइगु खः। आः टेलिभिजन लगायत मेमेगु नं आपालं निकायत थ्व ख्यलय् कुहां वयाच्वंगु दु ।

नेपालभाषाय् थ्व ज्या न्हापां न्हापांगु चरणय् जुयाच्वंगु दु। उकिं थुकियात सुनां नं त्याः बू धइगु ल्याखं स्वयेगु उचित मखु। थुकियात समग्र नेपालभाषा फिल्म विकासया लागिं छीमाःगु छगू सहायक पलाःया रुपय् कायेमाः। थुकिं नेवाःतय् दथुइ नं फिल्म, म्युजिक भिडियो व म्येँयात कयाः चर्चा याकेगु ज्या जूगु दु। थ्व सम्पूर्ण संगीत व फिल्म ख्यःया लागिं सकारात्मक पलाः खः ।

More Stories Like this