बाखं दबू प्रवेश द्वार खः

नर्मदेश्वर प्रधान

बाखं दबू। बाखं बिधाया विकास। सञ्जालया बिस्तार। जनसम्पर्क वृद्धि। थ्वया आज्जु। थ्वं थ्वहे उद्देश्य ज्वनी। इलय्ब्यलय् स्वनिगलं पिहां वनी। बाखं विषयय् जागरण थनेत स्वइ ।

खास बाग्लुङ्ग वनेगु निर्णय जुइ। थ्यनी नारायणघाट, बुटवल, लुम्बिनी। पुलांपिंसं धाइगु लुमनी। कपालय् च्वया तःगु जक जुइ। क्वःछिना तइगु थाय् हिली। कपालय् च्वयातःगु थाय् नारायणघाट, बुटवल, लुम्बिनी जुया बी। अन्धविश्वासी जुयाः मखु। जूगु खँ जक कनागु खः।
इच्छा यानां जक मगाः। पाय्छिगु परिस्थिति चूलायेमाः। नारायणघाट, बुटवल, लुम्बिनी वनेगु क्वःजी। अपर्झट। ई म्हो। सुयात सुयात सम्पर्क तयेगु? गन वनेगु? गन च्वनेगु? मजाकया लागि चाःहिउ वनेगु उद्देश्य मखु। स्थानीय नेवाः भाय्, साहित्यप्रेमीतय्त बाखं न्यंके। सहलह याये। लक्ष जुइ। थाय्थासय् परिचालन व व्यवस्थापनया खँ वइ। यात्राय् भाजु शाक्य सुरेन दइ। शाक्य सुरेनं फुक्कथाय् स्वापू तइ। माःगु परिचालित याइ। कार्यक्रमत तय याइ। च्वनेगु, नयेगु थाय् व्यवस्थित याइ। शाक्य सुरेनयात महादया ! बाखं दबू वय्कःप्रति तसकं कृतज्ञ। आभारी ।

नारायणघाट थ्यनी। नेवाः पुचःया दबू छेँ। नेवाः खलः पुचःतय् पदाधिकारीतय्सं लसकुस याइ। बाखं ब्वनेगु जुइ। न्वचुत जुइ। कार्यक्रम चीधं। तर अनया व थनं वंपिं दथुइ आत्मियता कालबिल जुइ। दुःख-सुखया खँ कालबिल जुइ। स्वनिगलं पिनेया वय्कःपिनि थौंया चिन्ता, जिज्ञासा छु? सीके खनी। अतिकं पारिवारिक वातावरणय् ज्याझ्वः सम्पन्न जुइ ।

बाखं दबूया यात्राय् सांस्कृतिक कलाकारत नं दइ। संगीतविद् भाजु गणेशराम लाछीपाखें व्यवस्था जुइ। लोकंह्वाःम्ह गायक रामकृष्ण दुवाल नं यात्राय् दइ। भाजु गणेशराम व भाजु रामकृष्णपिं यात्राय् बाखं च्वमि कथं नं लुइ ।

उकुन्हु बहनी। बाय् च्वनागु होटल। होटलया हल। सांस्कृतिक ज्याझ्वः न्ह्याइ। नेवाः खलः पुचःया हनेबहःपिं पदाधिकारपिं, वय्कःपिनि परिवारया उपस्थिति दइ। कुमारीनृत्य। मतिनां जाःगु प्याखंत। ज्यापु ज्यापुनी प्याखं। रामकृष्णजुया लोकंह्वाःगु म्येत प्रस्तुत जुइ। कलाकारतय्सं झाःपिं पाहांपिंत प्याखं हुइकी। तसकं न्ह्यइपुक ज्याझ्वः सम्पन्न जुइ। होटलय् च्वनागु, नयेगु व्यवस्था नेवाः पुचः व भाजु ज्ञानेन्द्र शाक्यपाखें जुइ। वय्कःपिंसं क्यनादीगु अनुराग, सत्कार प्रति बाखं दबूया सहभागीत अनुग्रहित जुइ।
निन्हु खुन्हु। बुटवलय् थ्यनी। बुटवलय् औद्योगिक मेला जुयाच्वंगु। बाखं दबूलिसे वःपिं कलाकारतय्सं अन जुइगु सांस्कृतिक ज्याझ्वलय् ब्वति कायेत इनाप वइ। मेला स्थल। विशाल दबू। थीथी जनजातितय् सांस्कृतिक ज्याझ्वः क्यनाच्वंगु। थनं वंपिं कलाकारतसं नेवाः संस्कृति प्रतिविम्वित जुइगु प्याखं, म्येँ न्ह्यब्वइ। भाजु रामकृष्ण दुवालं नेवाः लोकम्ये हाली। दबुली नेवाः संस्कृतिया प्रतिनिधित्व जुइ। कलाकारतयसं तःधंगु अभाव पूर्ति याना बी। सकलयात गौरव अनुभव जुइ। लिपा वुटवल नगर पालिकाका हल। बाखं न्यंकेगु ज्याझ्वः न्ह्याइ। वातावरणअत्यन्त शान्त। स्थानीय सहभागिता म्हो मजू। बाखं ब्वनेगु ज्या क्वचाइ। अनया नेवाः पुचःया अध्यक्ष व पुलांम्ह नगर प्रमुख विमल शाक्यजुं नुगःखँ प्वंकी। नेवाः भाषा, साहित्य, संस्कृति ब्वलंकेत सहकार्य यायेत सदां तयार। अत्यन्त शिष्ट भाषां विश्वस्त यानादी। बाखं दबूया नायः लक्ष्मण राजवंशीजुं बाखं दबूपाखें वय्कःपिंत सुभाय् देछाइ। मेलाया कारणं बुटवलय् स्थानया अभाव। लुम्बिनीपाखे वनेगु जुइ ।

कन्हय् सुथय्। लुम्बिनी शान्तिवन। भगवान वुद्धया जन्मस्थलया दर्शन याये। थीथी देशं दयेका तःगु स्तुप, विहार स्वये। लुम्बिनीया शान्ति वनय्बाखं कार्यक्रम याये। निर्णय जूगु खः। मौसम अःखः जुयाबी। शीत लहर। अतिकं ख्वाउँसे च्वनी। थाय् हिली। होटलया तःधंगु कोठा। ज्याझ्वः न्ह्याइ। बाखं वाचन जुइ। हनेबःहम्ह भिक्षु मैत्री महास्थविर बिज्याइ। छुं ई च्वनाः लिहां बिज्याइ। ब्वने ज्या क्वचाइ। सहलह न्ह्याइ। बाखं दबूयात गुकथं प्रभावकारी यायेगु? सुझावत वइ। स्वन्हुयंकं ब्वंगु बाखंतय् समीक्षा, विश्लेषण जुइ ।

बाखं दबू। बाखं बिधा। त्वहः जक खः। प्रवेश द्वार। थ्वया अर्थ संकीर्ण मजू। बाखं बिधा माध्यम जुइ। जातीय, भाषिक, साहित्यिक, सामाजिक जागरण थनेगु थ्वया कुतः जुइ। भाषा दुने समावेशीय साहित्य सृजना याये। थ्वया उद्देश्य जुइ। कुतः जुइ। जादूमय लिच्वः काये। थ्वया महत्वकांक्षा मखु। कुतः याये। सुरु याये। थ्वया अठोट जुइ। थ्व छगू जागरण अभियान खः। बहुआयामिक। यात्राय् सहभागीत सकलपाखें सहयोग दइ। यात्रा सफल जुइ ।

बाखं दबूया यात्राय् पुलांपिं न्हूपिं बाखं च्वमित दइ। मिसा बाखं च्वमितय् प्रतिनिधित्व नं जुइ। एफ.एम.या प्रतिनिधि, पत्रकारत नं समावेश जुइ। हनेबहःम्ह रामशेखर दाइ, तिलक दाइया उपस्थितिं बाखं दबूया यात्रा गौरवान्वित जुइ। भाजु गणेशराम, भाजु रामकृष्ण दुवालया सहयोग स्तुत्य जुइ। बाखं दबूयात थन थ्यंकेगु ज्या हनेबहःम्ह बाखं दबूया नायः लक्ष्मण राजवंशीजुया हःपाःया लिच्वः खः। वय्कःया योगदानप्रति बाखं दबूया सकल यात्रीतय् सुभाय् !

More Stories Like this