बन्द विरुद्ध नेवाः जागरण अभियान
येँ (सन्ध्या टाइम्स)/ संविधासभाय् दुथ्याःगु राष्ट्रिय जनमोर्चां याःगु पुस २६ गतेया स्वनिगः नापं बागमति अञ्चल बन्द ज्याझ्वःया प्रतिकार यायेत नेवाः स्वायत्त राज्य मंकाः संघर्ष समितिं कन्हसंनिसें हे स्वनिगःन्यंकं नेवाः स्वायत्त राज्य जनजागरण अभियान न्ह्याकीगु जूगु दु ।
म्हिगः नेवाः स्वायत्त राज्य मंकाः संघर्ष समितया मुँज्या च्वनाः बन्द ज्याझ्वः विरुद्ध थ्व जनजागरण अभियान न्ह्याकेगु निर्णय याःगु खः ।
ऐतिहासिक नेपालमण्डल लागाया नेवाः बाहुल्यता दुगु फुक्क लागायात दुथ्याकाः नेवाः स्वायत्त राज्य धकाः वंगु ११ गते शनिवाः लाखौं नेवाःतय्गु दथुइ नेवाः स्वायत्त राज्य घोषणा यायेधुंकूगु नेवाः स्वायत्त राज्य मंकाः संघर्ष समितिं उगु अभियान कन्हसंनिसें छवाः तक न्ह्याकेत्यंगु खः ।
मुँज्यां कन्हय् येँया वंघलय्, २४ गते किपुली, २५ गते येँया शान्ति वाटिकाय्, २६ गते बसन्तपुली उगु कथं अभियान न्ह्याकेगु नापं २९ गते तक मदिक्क स्वनिगःया थाय् थासय् नापं गांगामय् तकं अभियान न्ह्याकेगु खँ धाःगु दु ।
नेवाः स्वायत्त राज्य जन जागरण अन्तर्गत नेवाः स्वायत्त राज्य बारे जनतायात ध्वाथुइकेगु पर्चा इनेगु नापं थाय्थायय् सभा यायेगु खँ नं धाःगु दु ।
थ्व हे झ्वलय् गन गबलय् उगु अभियान अन्तर्गत ज्याझ्वःत न्ह्याकेगु धइगु विषययात कयाः थौं हे नेवाः स्वायत्त राज्य मंकाः संघर्ष समितिं थीथी थाय्या नेवाः स्वायत्त राज्य मंकाः संघर्ष समन्वय समितिया प्रतिनिधितलिसे सहलह ब्याकेत्यंगु दु ।
'जनस्तरं प्रतिवाद यात धाःसा जनमोर्चा हे जिम्मेवार'
आः तक भूमिगत जुयाच्वंगु नेकपा (मसाल)या चुनावी मोर्चा राष्ट्रिय जनमोर्चां वइगु २६ गते आइतवाः संघीय व्यवस्थाया विरोधय् स्वनिगः नापं बागमती अञ्चल बन्द धकाः याःगु आह्वानयात नेवाःतपाखें नेवाः स्वायत्त राज्य मंकाः संघर्ष समितिं भर्त्सना याःगु दु। मंकाः संघर्ष समितया मुँज्यां संघीय गणतन्त्र नेपाः दुने नेवाः स्वायत्त राज्य धकाः जनस्तरं हे घोषणा यायेधुंकूगु अवस्थाय् संघीयता विरुद्ध आन्दोलनया नामय् गुगु कथं स्वानिगः बन्दया घोषणा याःगु खः थ्व जनताया भावनाया अःखः नापं नेवाःतय्गु भावनाया अःखः खः धासें थुज्वःगु बन्दया छुं नं आवश्यकता मदु धाःगु दु। संघर्ष समितिया छ्याञ्जे नरेश ताम्रकारया नामं थन छगू विज्ञप्ति पिथँसें जनमोर्चाया उगु बन्द ज्याझ्वःयात जनस्तरं प्रतिवाद यात धाःसा उकिया जिम्मेवारी स्वयं राष्ट्रिय जनमोर्चां हे कायेमाली धकाः न्ह्यथनातःगु दु ।
