गभर्नरय् एमाले छखे लात
गिरिजाया छेँय् कांग्रेस नेतातय् बैठक
नेपाली सेनाय् जुयाच्वंगु भर्ती विवाद व मेखे पशुपतिइ पुजारी नियुक्ति प्रकरणं पिहां वयाच्वंगु तनावया दथुइ थ्व समस्यायात गय् यानाः समाधान यायेगु धइगु बारे सहलह यायेत थौं महाराजगंजय् सभापित गिरिजाप्रसाद कोइरालाया छेँय् कांग्रेसया बैठक च्वंगु दु । कांग्रेसं थ्व निगुलिं प्रकरणय् माओवादी सरकारं बियाच्वंगु बिचाःया विरोधय् थःगु मत तया वयाच्वंगु दु ।
उखे राष्ट्र बैंकया गभर्नर नियुक्तिया ज्याय् माओवादीं सिफारिस याःपिं मनूतय् नां खनाः एमाले हानं छक्वः तम्वःगु दु । न्हूम्ह गभर्नर नियुक्तिया लागिं सरकारं स्वम्ह मनूया नां सिफारिस याःगुली एमालेया मनू युवराज खतिवडाया नां दुथ्यानाच्वंगु मदु । माओवादीं गभर्नरय् एमालेया मनू तयेगु धइगु शर्तय् संविधानसभाया उपाध्यक्ष चुनावय् थः उम्मेदवारयात एमालेया भोट काःगु खः । एमालें आः गभर्नर नियुक्तिया लागिं नां सिफारिस याःबलय् उकी थः मनूया नां मतः धकाः आक्रोश प्वंकूगु दु । थुकिं आः एमाले दुने सरकार त्वःतेमाः धाईपं नेतातय् सः अझतसः जुइगु अनुमान सूत्रं याःगु दु ।
च्याक्वःगु महाधिवेशनया तयारी यायेगु झ्वलय् थौं नं एमालेया केन्द्रीय बैठक बल्खुइ च्वंगु दु । बैठकय् खास यानाः महासचिव झलनाथ खनालं न्ह्यब्वयादीगु राजनीतिक प्रस्तावयात कयाः वहस न्ह्याइगु खँ धाःगु दु । महासचिवया प्रस्तावय् पार्टीया निर्देशक सिद्धान्त जुयाच्वंगु जनताया बहुदलीय जनवादय् संशोधन यायेमाः धकाः तयातःगु बुँदायात पुलांम्ह महासचिव माधव नेपालं विरोध याःगु दु ।
सूत्रं धाः कथं थौं च्वनीगु एमाले बैठकय् थौंकन्हय् जुयाच्वंगु सेना भर्ती व पशुपति प्रकरण बारे नं सहलह जुइफु । पशुपति प्रकरणय् एमालें नं माओवादी सरकारं याःगु ज्याया विरोध याःगु दु ।
उखे पशुपति लागाय् थौं नं स्थानीय जनतां बन्दया घोषणा यात । थुकिं यानाः थौं नं ग्वल देशय् पसः यातायात ठप्प जुयाच्वंगु दु । स्थानीय मनूतय्सं थौं नं लँय् सिँग्वः च्याकेत्यंबलय् प्रहरीं हस्तक्षेप यात । थौं सुथय् पशुपतिइ माओवादी समर्थित कार्यकर्तातय्सं नं नेपाली पुजारीया समर्थन यासें छगू जुलुस पिकाःगु खः ।
