मधेशी दललिसे गोप्य वार्ता
येँ (सन्ध्या टाइम्स)/न्हूगु कथं सत्ता समीकरण न्ह्याकेगु निंतिं एनेकपा (माओवादी) व सत्तारुढ मधेशवादी दलतय् दथुइ गोप्य गृहकार्य शुरु जूगु दु ।
न्हू बानेश्वरया छखा छेँय् थौं सुथय् माओवादी व सत्तारुढ मधेशवादी दलया नेतातय् दथुइ गोप्य वार्ता जूगु खः। वार्ताया झ्वलय् एनेकपा (माओवादीं) याना वयाच्वंगु आन्दोलन नापं न्हू कथं सत्ता समीकरण यायेगु विषयय् सहलह जूगु खँ धाःगु दु ।
सहलहया झ्वलय् उप राष्ट्रपतिया पदयात क्रियाशिल यायेगु निंतिं अन्तरिम संविधानय् न्हय्क्वःगु संशोधन यायेगु नापं उकियात कयाः माःगु कथं मंकाः संकल्प प्रस्ताव नं यंकेगु विषयय् नं सहलह जूगु खः। सरकारं उपराष्ट्रपतिया पद क्रियाशिल यायेगु निंतिं धकाः हःगु संशोधन प्रस्ताव पारित यायेत माओवादीया समर्थन मदयेकं मगाःगु जुयाः हे सत्तारुढ मधेशवादी दलतय्सं माओवादीलिसे सहलह ब्याकूगु खः ।
उगु गोप्य वार्ताय् मधेशी जनअधिकार फोरम (लोकतान्त्रिक), तराई मधेश लोकतान्त्रिक पार्टी व सद्भावना पार्टीया प्रतिनिधि नापं माओवादी अध्यक्ष प्रचण्डं ब्वति कयादीगु खः। सहलहया झ्वलय् देय्या राजनीतिक गतिरोध अन्त्य यायेगु खँय् नं सहमति जूसां गुकथं अन्त्य यायेगु धइगु विषयय् धाःसा खँ ल्यंदनि धाःगु दु ।
अथे हे आःया अवस्थाय् गुकथं न्ह्याः वनेगु धइगु विषयय् मधेशी जनअधिकार फोरमया केन्द्रीय बैठक येँय् च्वनाच्वंगु दु ।
जनसेनायात कांग्रेस कार्यकर्तापाखें आक्रमण
नेकपा (माओवादी) या जनसेनायात नेपाली कांग्रेसया कार्यकर्तातय्सं आक्रमण यानाः घाःपाः याना बिउगु दु। थौं सुथय् सिन्धुलीइ जनमुक्ति सेना नेपालया जवानतय्त आक्रमण यानाः स्वंगूगु डिभिजनया बेनी बहादुर मोक्तान, शिव कुमार अछामी व अरुण लामायात घाःपाः याना बिउगु खः। उमिसं अन नेटिभीया पत्रकारयात नं दायाः घाःपाः याना बिउगु खः ।
सिन्धुलीया गढी दरबार चाःहिउ वयाच्वंपिं जनसेनाया जवानतय्त नेपाल तरुण दलया सिन्धुली जिल्लाया नायः उपेन्द्र पोख्रेलया नेतृत्वय् वःपिं कांग्रेस कार्यकर्तातय्सं आक्रमण याःगु खँ धाःगु दु। जिल्ला प्रहरी ज्याकू लिक्क जूगु उगु आक्रमणय् लानाः घाःपाः जूपिंत आः सिन्धुली जिल्ला अस्पतालय् तयाः वासः याकातःगु दु ।
