थःथःगु चिउताः स्पष्ट यायेमाः

- नर्मदेश्वर प्रधान

द्वन्द्व कालया इलय् माओवादीतसें काःगु सम्पत्ति लितः बीमा । थ्व खँय् कांग्रेसं हालय् तःधंगु दवाव बिल । संविधानसभाया बैठक तःन्हूतक अवरुद्ध यानाबिल । न्यनेदु प्रधानमन्त्री व कांग्रेसया दथुइ माओवादीं काःगु सम्पत्ति याकन लित बीगु खँय् सम्झौता जूगु दु । थ्व कार्यान्वयन यायेगु ई सीमा क्वःछिउगु दु ।

माओवादीं युद्धकालय् काःगु सम्पत्तिं राजनैतिक अर्थ नं काइ । थ्व अपराधिक ज्याकथं जक खने दइ मखु । थ्व विषय राजनैतिक बहस नं जू । सम्पत्ति काःगु ज्याखँय् राजनैतिक औचित्य खंकीिपं छथी दु । थ्वयात अपराधिक ज्या तायेकीपिं न दु । माओवादीतसें सम्पत्ति काःगु ज्या खँयात वर्गीय संघर्षया सन्दर्भय् तया स्वइ । प्रजातन्त्रवादीतसें थ्वयात सम्पत्ति प्रतिया मौलिक हकया उल्लंघन खंकी । प्रधानमन्त्री व कांग्रेस दल दथुइ जूगु सम्झौता प्रति माओवादीया नेता किरण वैद्यं राजनैतीक असन्तोस व्यक्त याःगु खनेदु । माओवादीं सम्पत्ति काःगुयात विरोध क्यनीिपं दु । तर छेँबुँ मदुपिं गरीब सुकुम्वासि विषय माओवादी विरोधी पार्टीतसें न्वमवाः । किरण वैद्यं असन्तोष प्वंकी । थज्याःगु असन्तोषया निंतिं भाजु किरण वैद्यंयात चरमपन्थी माओवादी धाः । मातृका यादवया प्रतिकृया थ्व खँय् झंन आक्रमक खने दइ । माओवादी काःगु सम्पत्ति लितः बीम्वाःगु पक्षय् वं वकालत याइ । माओवादी पार्टी गरमपन्थी व नरमपन्थी खेमाय् विभाजीत जूगु खँ पिहां वइ । माओवादीं जनयुद्ध इलय काःगु सम्पत्ति लित बीगु मबीगु प्रश्न विषय राजनैतिक पार्टीतय् दथुइ जुइगु बहस अन्तरद्वन्द्वं देशय् वयाच्वंगु राजनैतिक सिद्धान्तया ख्यःया सूक्ष्म रुपय् जुयाच्वंगु कसरत प्रतिबिम्बित जुयाच्वंगु अनुभव याकी । निजी सम्पत्ति धइगु छु थ्वया हैशियत विषय थीथी राजनैतिक सिद्धान्तं बिस्कं बिस्कंया परिभाष बी । राजनैतिक विचारधाराया अन्तरया कारणं माओवादी व प्रजातन्त्रवादीतय् सम्पत्ति प्रतिया दृष्टिकोण छथी हे जुइ मखु । छथी हे खंकलकि उमि राजनैतिक सिद्धान्तय् विचलन खने दइ । पहिचानया संकट लुइ । माओवादीतसें काःगु सम्पत्ति लित बीगु वा मबीगु न्ह्यसलं राजनैतिक विचारकतय्त थ्व विषय राजनैतिक विचरण यागु अवसर बी । माओवादी काःगु सम्पत्ति लित बीमाः वा म्वाः । गुगुं पक्षय् बिचाः प्वंकेगु च्वसुया उद्देश्य मखु । सम्पत्ति विषय थीथी राजनैतिक सिद्धान्तय् अवधारणया प्रतिकात्मक अभिव्यक्तिपाखे चिन्तन मनन यायेगु थन कुतः जुइ ।

माओवादी काःगु सम्पत्ति लितः बीगु वा मबीगु थ्व राजनैतिक प्रश्न जुयाः लुइ । राजनैतिक हल यायेगु कसरत पार्टीत दथुइ जुइ । सामना समाधानया कुतः थ्व विषय राजनैतिक ख्यलय् खने दइ । प्रधानमन्त्री दाहाल व कांग्रेसत दथुइ थ्व विषय जूगु सम्झौता राजनैतिक खः । सम्झौताया पालन वा उल्लंघन न्ह्याग्गु हे जूसां उकिया राजनैतिक हिसाब दइ । हिसाबय् वेरुजू वइ मवइ सम्बन्धित दलतसें राजनैतिक स्तरय् मूल्यांकन याइ ।

सम्पत्तिया खँय थौं विबाः यायेमाःगु जटिल मार्मिक न्ह्यसः मेगु दु । प्रजातन्त्रवादीतसें धाइ निजी सम्पत्ति प्रतिया अधिकार सुरक्षित जुइमाः । निजी सम्पत्ति सुनां नं हरण याये दइ मखु । माओवादीतसें धाइ जग्गा विहीन भूमि विहीन किसान सुकुम्वासीतय्त भूमि वितरण यायेमाः । सामन्तवाद ध्वंस यायेमाः । उमि नारा थ्वइ । थःथःगु आस्थाया लिधंसाय् निगू सोचं थःथःगु तर्क न्ह्याकी । राजनैतिक प्रचार प्रसारवाजी याइ । तर निगुलिं शक्तिशाली सोच सिद्धान्तया उपहास थौं देशय् मालपोत कार्यालयसं जुयाच्वंगु खने दइ । मालपोत कार्यालयं थौं मनूतय निजी सम्पत्ति लुटे यानाः नयाच्वंगु दु । मनूतय्के छेँय् लालपुर्जा दयाच्वनी । तर लालपुर्जाया छेँ बुँया विक्री मालपोत कार्यालयं तँ तँ जायेधुंकी । निजी सम्पत्तिया पक्षय् हल्ला याईपं दलतसें मालपोत कार्यालयया थ्व खुल्ला हाँक भ्रष्टाचार प्रति छाय् मिखा तिसिल माओवादीं काःगु सम्पत्तिया खँय् प्रश्न याईपंसं मालपोत कार्यालयं जनतायात नाङ्गा यानाच्वंगु खँय् छाय् ध्यान मबिल सामान्य जनतां दुगु छपी निपी जग्गा थौं उपभोग याये मखं । मालपोत कार्यालय व भूमाफिया दलालतसें जनताया निजी सम्पत्तियात निर्भिक रुपं मियाः नयाच्वंगु दु । भाजु सुन्दरलाल याके बुँया लालपुर्जा दु । व मालपोत अफिसय् वनी । तर वया बुँ मिया तये धुंकी । थौं थज्याःगु घटना सामान्य जुइ । थ्व निजी सम्पत्ति प्रतिया अधिकारया हरण मखुला थज्याःगु हरण ज्याय् राजनैतिक पार्टितय् संरक्षण दु । थौं मनूतसें शंका याइ । राजनैतिक क्षेत्रं थुकिया विरोध छाय् मजुल मनूत उत्सुक जुइ ।

माओवादीतसें जग्गा विहीन किसानतय् पक्षय् क्रान्तिकारी भुमिसुधारया समर्थन याइ । ठीक जू मदुपिंत भूमि बीमाः । तर मालपोत कार्यालया भ्रष्टाचारीत क्रान्तिकारी भूमिसुधार पक्षय दु ला मनूतय् लालपुर्जायात म्हासे यानाः करोडौंपति जुयाच्विपं नव सामन्तवादी भूमाफिया प्रित माओवादी सरकारं गुकथं स्वये त्यन थौं सुयां लालपुर्जाया सुरक्षा मदु । दुपिनि छेँबुँ कयाः मदुपिंत बियाच्वंगु दुला मालपोत कार्यालयं मदु । दलालतय् वृत्त दयेकाः मालपोत कार्यालयं जनताया छेँबुँयात अःखः कचिकं नयाच्वंगु दु । छम्हू दलाल माफियातसें जग्गा आतंक न्यंकाच्वंगु दु । कर्किया छेँबुँ गैरकानुनि कथं मियाः दाः खायेका च्वंगु दु । राजनैतिक होहल्लां जक थ्व पर्याप्त जुइ मखु । थौं मालपोत कार्यालय दुनेया गिरोहतय् गतिविधिं नं निजी सम्पत्ति सुरक्षित जुइ न गरिब भुमिहिन विपन्न मनूतय कल्याण जुइ । थ्व खँय् राजनैतिक दलतसें थःथःगु निति स्पष्ट यायेमाः ।

More Stories Like this