नेवाः व ताम्सालिङया मंकाः प्रदेश प्रस्ताव

सीमाया विवाद समाधान याये मफयाः एनेकपा (माओवादी) दुने आः नेवाः व ताम्सालिङ स्वायत्त गणराज्य छथासं तयाः छगू हे मंकाः गणराज्य दयेकेगु प्रस्ताव वःगु दु। तामाङ व नेवाःतय् छगू हे प्रदेश दयेकेगु खँयात माओवादीया आपालं दुजःतय्सं समर्थन नं याःगु कारणं थुकियात माओवादीं आः पार्टीया नीति दयेकाः पित बीगु सम्भावना नं अप्वः दु ।

खतुं छगू हे भूभाग दुने प्यपुनाच्वंगु नेवाः व तामाङ प्रदेशयात बिस्कं बिस्कं यायेगु व्यावहारिक मजुइगु जूगुलिं थुकियात छथाय् हे तयाः मंकाः राज्य दयेके माली धइगु बिचाः तइपिं बुद्धिजीवीत तामाङ व नेवाः समुदाय निगुलिं थासय् मदुगु मखु। तर निगुलिं थासय् उकियात स्वीकार याइपिं मनूतय् ल्याः धाःसा म्हो जक दु। छगू इलय् नेवाः पुचः दुने नेवाः व तामाङयात छथासं तयाः 'ने-ता प्रदेश' दयेकेगु धकाः चर्चा जूगु खःसा गुलिखे तामाङ बुद्धिजीवीतय्सं आः नं थज्याःगु प्रदेशया सम्भावना न्ह्यःने तयेगु यानाच्वंगु दनि। उकिं थ्व असम्भव विकल्प मखु धइगु खँ अथें प्रस्ट जू। तर मात्र सीमा किटानया विवाद समाधान याये मफयाः हे निगू प्रदेशयात छथाय् तयाः मंकाः प्रदेश दयेके माःगु खः धइगु जूसा मंकाः प्रदेशया आवश्यकताया लागिं थ्व उपयुक्त तर्क व कारण धाःसा मखु। निगू प्रदेश छथाय् च्वनेमाःगु वस्तुगत कारण व उकिं जुइगु उपलब्धीया ठोस ल्याःचाः आः तक पिहां वःगु मदुनि। उकिं थुकिया बारे छुं अध्ययन हे मजुइक अज्याःगु निर्णय यायेबलय् कन्हय् थुकिं हानं मेगु ल्वापु पिकाइ मखु धाये फइ मखु। नापं च्वनाः ल्वानाच्वनेगु स्वयां अलग अलग च्वनाः मिले जुयाच्वनेगु बांलाःगु लँपु खः ।

More Stories Like this