पशुपतिइ हस्तक्षेप

सम्पादकजु,

ने.सं. ११२९ पोहेलाथ्व ८ कुन्हु पशुपतिइ नेवाः ब्रम्हू पुजारी तयेमाः, दक्षिण भारतया पुजारी लिकयाः मेपिं पुजारी तःगु ज्याखँ बांलाःसां प्रकृया पाय्छि मजू धइगु खँय् पशुपति क्षेत्रया स्थानीय मनूतय्सं पत्रकार सम्मेलन यायेत स्वःबलय् अज्ञात मनूतय्सं आक्रमण याःगु सगरमाथा टेलिभिजनं प्रसारित दृश्यं जितः संवेदनशील यानाबिल । जिं स्वये न्हूम्ह पुजारी नियुक्ति प्रकृया पूमवंतले पुलांम्ह पुजारी हे कायम यायेमाः थें च्वं । सर्वोच्च अदालतं जाहेर याःगु निषेधाज्ञा सरकारं पालना यायेमाः थें च्वं । थुगु आदेश पालना मयायेगु धइगु सरकारया शासन प्रकृया सरकारं हे पालना मयायेगु खः । मेगु खँ पशुपतिइ दक्षिण भारतया पुजारी तयेयां न्ह्यः नेवाः उपाध्याय ब्रम्हूतय्सं पुजा यानाच्वंगु खँ ऐतिहासिक तथ्य जूगुलिं नेवाः पुजारी तयेमाः धइगु खँ नं उति हे जायज खः । अथे हे संस्कृति मन्त्रालयं आकिवंनिसें सांस्कृतिक नखःचखः- यात राज्यं ध्यबा ब्यहोरे याये फइ मखु जनस्तरं हे ब्यहोरे यानाः संचालन यायेमाः धइगु खँ पित बिउगु नं उलि हे पूर्वाग्रही खँ खः । संघीय शासन वइगु इलय् राज्यं मान्यता बीमाःगु जात्रा पर्व व स्थानीय सरकारं जिम्मा कायेमाःगु जात्रा पर्व छुटे यानाः संचालन यायेमाः थें च्वं । थ्व संविधानसभा धुंकाः न्हूगु संविधान अनुसार शासन शुरु जुइबलय्या चिन्ता खः । आः हे स्वनिगःया जात्रा पर्व दीकथं छुं हे प्रकृया पूमवंकुसे जनताया राय मकासे सम्बन्धित मनूतनाप अन्तक्रिया मयासें सलंसः दँया नियम व परम्परायात त्वाःथलाः न्हूगु नियम हयेगु धइगु राज्यं जनताया मतयात तप्यंक अपहेलना याःगु खः । उकुन्हु तिनि कुमारी रथ जात्राया खँय् अपाय्धंगु मुद्दा जुइक नं हाकनं थथे यायेगु धइगु स्वनिगःया सांस्कृतिक संस्थायात क्वःथलेत स्वःगु खः । कुमारी जात्रा सुथां लाकेत सरकारं स्वंगु समितिया जिम्मेवारी छु जुयाच्वन जिं मसिल । थ्व खँय् नेपाः राष्ट्रिय पार्टी, नेवाः देय् दबू, नेपालभाषा मंकाः खल, नेवाः देय् गुथि नेपालमण्डल, नेवाः जागरण मंच, नेवाः मुक्ति मंकाः दबू, नेवाः राष्ट्रिय मुक्ति मोर्चा, नेपाल लोकतान्त्रिक नेवाः संघ थेंजाःगु जातीय स्वशासनया पक्षधर संगठन व भातृ संगठनतय्सं सः तये हे माः थें च्वं म्हुतुइ धौ फिनाच्वनेगु मिले मजू ।

थौं पशुपतिइ जूगु पत्रकार सम्मेलनया ल्वापुइ पत्रकार सम्मेलन याःपिंसं थ्व वाइसीएलं याःगु धयाच्वन । वाईसीएलया काठमाडौं इन्चार्ज सागरं धाःसा थ्व अथे मखु धयाच्वन । संस्कृति मन्त्री गोपाल किराँतीं छानबिन यानाः कारवाही यायेगु खँ न्ववानाच्वन । वास्तवय् जूगु छु खः थ्व याकनं छानबिन जुइमाल । माओवादी दुने नं ब्राम्हणवाद हाबी जुयाच्वंगु खनेदु उगु ब्राम्हणवाद बिरुद्ध जातीय स्वशासनया पक्षधरत न्ह्यलं चायेकाः सकलें छप्पँ जुयाः बाहुनवादया पर्दाफास यायेमाःगु खनेदु । थुकी सकल जनजाति व जातीय स्वशासनया पक्षधरतय्सं पलाः ल्ह्वने हथाय् जुइधुंकल ।

- शाक्य सुरेन, यल ।

More Stories Like this