नेवाः-ताम्सालिङ छगू हे प्रदेश
येँ (सन्ध्या टाइम्स)/राज्य पुनर्संरचनाया झ्वलय् आः माओवादीं नेवाः स्वायत्त गणराज्य व ताम्सालिङ स्वायत्त गणराज्य छथासं तयाः छगू जक मंकाः गणराज्य दयेकीगु जूगु दु ।
थीथी कथंया झिंस्वंगू जाति, भाषा व क्षेत्रया आधारय् स्वायत्त गणराज्यत माः धकाः थीथी स्वायत्त गणराज्यत घोषणा तकं याये धुंकूगु माओवादीं आः वयाः थीथी स्वायत्त गणराज्यत संयुक्त यानाः देशय् मुक्कं खुगू जक स्वायत्त गणराज्य दयेकेगु प्रस्ताव न्ह्यःने हःगु दु ।
माओवादी दुने जातीय मामिला स्वया च्वनादीम्ह स्थायी समितिया दुजः देव गुरुङ व संविधानसभा राज्य पुनर्संरचना नापं राज्य शक्ति बाँडफाँड समितिया नायः लोकन्द्र बहादुर बिष्ट मगरं उगु कथं राज्य पुनर्संरचनाया प्रस्ताव हयादीगु खँ माओवादीया छम्ह पोलिटब्यूरो दुजलं 'सन्ध्या टाइम्स'यात कनादीगु दु। थौंया मुँज्याय् भेरी-कर्णाली, सेती-महाकाली व भोट-लामा स्वायत्त प्रदेशयात छथासं तयाः खसान स्वायत्त प्रदेश दयेकेगु, मगरात व तमुवानयात छथासं तयाः मगरात-तमुवान स्वायत्त प्रदेश, लिम्बुवान, शेर्पा व किरातयात छथासं तयाः किरात-लिम्बुवान प्रदेश, नेवाः व ताम्सालिङयात छथासं तयाः नेवाः-ताम्सालिङ प्रदेश, थारुवान प्रदेश व मधेश व कोचिला छथासं तयाः मधेस प्रदेश दयेकेगु प्रस्ताव तःगु दु ।
थौं च्वनीगु माओवादीया केन्द्रीय समितिया मुँज्याय् उगु कथंया प्रस्ताव यंकाः पारित याये धुनेवं हे संविधानसभाय् प्रस्तावया रुपय् यंकी धाःगु दु। केन्द्रीय समितिया मुँज्यां व प्रस्ताव पारित यानाः प्रदेशतय्गु सीमाङ्कन नं याइ धाःगु दु ।
माओवादीया भावी प्रधानमन्त्रीया खँय् कचमच
एनेकपा (माओवादीं) नागरिक सर्बोच्चता नापं राष्ट्रिय स्वाधिनतायात कयाः आन्दोलन याना वयाच्वंगु खःसां लिपांगु इलय् वयाः आः संयुक्त राष्ट्रिय सरकारया नेतृत्व यानाः प्रधानमन्त्री सु जुइ धइगु विषययात कयाः पार्टी दुने ब्यापक रुपं बिवाद ब्वलनावःगु खँ सीदुगु दु ।
माओवादीया छम्ह नेतां 'सन्ध्या टाइम्स'लिसे खँ ल्हासें माओवादीया नेतातय्सं पोलिटब्यूरोया मुँज्याय् भावी प्रधानमन्त्री डा. बाबुराम भट्टराई, राम बहादुर थापा बादल, नारायणकाजी श्रेष्ठ प्रकाश, कृष्णबहादुर महरायात यायेमाः धकाः थःथःगु कथं खँ तःगु खःसा नायः प्रचण्डं धाःसा आःया नितिं थः हे प्रधानमन्त्रीया नेतृत्व यायेत न्ह्यःने वनेगु अले व इलय् समस्यात समाधान यायेगु जुइ धकाः खँ तयादीगु जानकारी सूत्रं बिउगु दु ।
पोलिटब्यूरोया मुँज्याय् नायः प्रचण्डं अथे थःगु नुगः खँ तये धुनेवं दना वंगु खँ नं धाःगु दु ।
