होल्ड यानातःगु जलस्रोतया लाइसेन्स
नेपाःया तःधंगु जलविद्युत परियोजना मध्ये छगू जुयाच्वंगु पश्चिम सेती शुरु यायेगु धकाः अष्ट्रेलियाया स्मेक कम्पनीं लाइसेन्स कयातःगु दँदँ दयेधुंकलं नं ज्या धाःसा न्ह्याकूगु मखुनि। बरु ज्या शुरु यायेगु पलेसा लाइसेन्सया म्याद थपे यायेमाल धकाः सरकारयात दवाव बीगु ज्या यानाच्वंगु दु। खतुं लाइसेन्स कयाः नं ज्या शुरु मयासे च्वनाच्वंगु स्मेक छगू जक कम्पनी मखु। अरुण-३, कर्णाली आदि परियोजनाय् नं भारतं ज्या याये धकाः लाइसेन्स कयातःगु दु तर ज्या धाःया याःगु मखुनि। महाकालीया पंचेश्वर परियोजना ला भारतं हेपे यानाः हे शुरु मयासे तयातःगु दु। उगु परियोजना मेपिंसं काइ धकाः उकियात 'होल्ड' जक याना तयेगु लागिं विदेशी कम्पनीतय्सं थथे लाइसेन्स कयाः थम्हं तुं तया तइगु खः। थुकिं यानाः अन मेपिंसं नं ज्या याये मखनीगु जुयाः नेपाःया जलस्रोत विकासय् हे लिच्वः लाइगु स्वाभाविक खः। खतुं थथे ज्या मयासे होल्ड जक याना तइगु लाइसेन्स निश्चित अवधि लिपा खारेज यायेगु धकाः सरकारं नीति नं दयेका तःगु दु। तर उकियात लागू धाःसा याये फयाच्वंगु मदु। छगू कम्पनीं लाइसेन्स कयातःगु थासय् मेगु कम्पनी वयाः रुची क्यनी मखु। लिसें नेपालं नं हानं मेगु पुचःयाथाय् वनाः वहे परियोजना शुरु याना बीमाल धकाः आग्रह याये छिनी मखु। थौं नेपाःयात विद्युतया गुलि तःधंगु आवश्यकता जुयाच्वंगु दु धइगु खँ थौंकन्हय् न्हिंन्हिं जुयाच्वंगु लोडशेडिंगं नं स्पष्ट याः। भूटानं स्पष्ट रुपं हे जलस्रोत नीति दयेकाः न्ह््याः वंगु कारणं थुकिं हे थःगु देय्या नं विकास यात। तर नेपालय् धाःसा अप्वः राजनीतिं यानाः जुइ फइगु विकास नं जुइ फयाच्वंगु मदु, गुगु तःधंगु विडम्बना खः ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
