ह्यापी नेपाल बन्द !

रत्नकाजी शाक्य 'करोडपति'

न्हूगु नेपाःया न्हूगु नखः 'नेपाल बन्द'या लसताय् सकसितं भिंतुना, शुभकामना, ह्यापी नेपाल बन्द' ! थुगुसी नेपाल बन्द स्वन्हु क्यन। बन्दोबस्त धुमधामं यात। थाय्थासय् प्याखं हुलाः, बाजं थानाः, म्येँ हालाः अझ न्हूगु वानेश्वरय् कर्न्सट नापं जुल। प्रचण्डं 'मेड इन इन्डिया' धकाः म्येँ हाला सकसितं न्हीकादिल। उकुन्हु हिरोनी नाप प्याखं हुलाः म्येँ हालेगु व प्याखं हुलेत वय्कः च्याम्पियन जुइधुंकल। बन्द कुन्हु 'बन्दे मातरम....' भजन हाःगु नं तायेदत। स्वन्हु वंगु ला चाहे मचाः। छन्हु निन्हु थपे यायेमाःला धइथें च्वं ।

गुलिसित सास्ती जुइगु नेपाल बन्द नं नखः जुइ ला, अखः अखः खँ ल्हात धकाः छिकपिंसं धयादी। तर थ्व एकदम ग्राय्ण्डगु नखः मेथाय् गन काः वने? थ्व भ्यालेन्टाइन डे मखु भ्वाइलेन्सटाइन डे खः। गथे झी बिस्काः जात्राबलय् भैलः द्यः खःयात निखेरं साली अले गुगु पार्टीं साले फत व ला त्या हे त्यात साले मफुगु पार्टीं अप्पां कयेकेगु शुरु याइ, हS अथे हे थुकी नं कुर्सी छगूयात निखेरं सालेगु याइ। गुगु पार्टीं साले फत इपिं सरकारय् वनी, मन्त्री, प्रधानमन्त्री जुइ, मफुगु पार्टीं अप्पां कयेकेगु शुरु याइ। अथे ला थौंकन्हय् रड, डण्डी, कथि, ल्वाभः नं चले यायेगु याना हयेधुंकल। त्याःपिंसं चाहिं स्वन्तिबलय् बारा न्यायेकू थें ध्वाइँ ध्वाइँ गोलीं न्यायेकी, रकेट च्याकू थें टियरग्याँस त्वःती, कथिं मुइकी, होलीबलय् बेलुनं कयेकी धकाः ल्यासेत बिसिउँ जू थें उकुन्हु कोपुंगु ह्वगंगु' सम्मेलनय् भाग कयाः लिहां वःम्ह माकुने ध्याकुने ध्याकुने सुलाः बालुवाटार वनेमाल। जलवायु बारे सिबें थःगु आयु बारे खँ ल्हाना वःम्ह थें च्वं। जात्रा धासेंलि छम्ह निम्ह घाःपाः जुइ, छम्ह निम्ह सी। अझ थुबलय् सीपं स्वर्गय् सहिद जुइ धइगु विश्वास दु। जिन्दाबाद, मुर्दावाद धकाः प्रार्थना यात कि सत्ता माःम्हेसित सत्ता, भत्ता माःम्हेसित भत्ता, धाःम्हेसित धाःधाःगु प्राप्त जुइ धइगु नं धापू दु ।

मचांनिसें बुरा तकं छु ल्यासे छु ल्याय्म्ह सकसितं उलि हे न्ह्यइपुइ। मस्तय् लाछिइ वयाः फुटबल म्हिते न्ह्याः ला, ब्याडमिन्टन म्हिते न्ह्याः ला, साइकल गये ला, छु तक न्ह्याः म्हिते दइ। स्कूलय् नं वनेम्वाः, विदा क्या मोज ! बुरातय् तास म्हिते ला टिभी स्वये ला दिन वंगु हे चाइ मखु। सकलें छेँजःपिं नापं च्वने दइगु। मिस्तय् थ्व कुन्हु छेँ सुचुपिचु यायेगु चलन दु। मिजंतय् स्यंगुभिंगु भिंकेगु नं याः। दुपिनि साःसाःगु भिंभिंगु ज्वरे यानाः नइ। मदुपिनि न्हि खानाः न्हि नयेमाःपिं भरिया ज्यामितय् थ्व दिनय् ब्रत च्वनेगु चलन दु। फुटपाथ पसल्यातय् लक्ष्मी द्यः दुहां वइगु दिन स्वन्ति न्याइ।
थ्व दिनय् गाडी चले यात कि तोडफोड जुइ, दुर्घटना जुइ धइगु विश्वास यानाः गाडी चले याइ मखु, छेँछेँय् ग्यारिजय् पुज्याना तइ। गाडी चले मजुइगु जुयाः वातावरण न्ह्यइपुसे च्वनी। पसःत नं लुटपाट जुइ तोडफोड जुइ धइगु भयं बन्द जुइ। लँय् न्यासि जुइ हे आनन्द वइ। पर्यटकतय्त थ्व दिनय् चाःहिलेगु मज्जा हे छगू जुइ ।

झी छ्वय्लाभू, क्रिसमस इभ धाये थें बन्द छन्हु न्ह्यः चिलाख ज्वनाः देय् चाःहिलेगु गुलि न्ह्यइपुसे च्वं। थुकियात मशाल जुलुस धाइ थें। थुकिं बन्द न्यात धकाः नाय्खिं च्वयेकूगु हिसाब जुइ। मेमेगु नखः थें थ्व नखः दच्छिया छक्वः, थ्व खुन्हु थ्व तिथिइ यायेमाः धइगु मदु। थुकिया पञ्चाङ्ग निर्णायक समितिइ झी हे नेतात च्वनी। ग्वःन्हु यायेगु, गबलय् यायेगु धकाः थुमिसं हे साइत पिकाइ। गुम्हे गुम्हेसियां भाकल यानातःगु नं दइ बन्द छगू याये धकाः। निम्हतिपू ल्वापु जूसां, कलाः पय्नं वंसां बन्द न्यायेकेगु याः। छिं जिं न्ह्यागु आशिका यानाः बन्द याःसां जिउ। छुं थाकु मजू। पसःपिसः कलकारखाना, शिक्षण संस्था, यातायात बन्द याना बिल बस्। छुं अप्रिय घटना जुइबलय् नं संकटकालीन बन्द यायेगु याः ।

मोहनिबलय् थें न्हून्हूगु लं फीमाः धइगु नं मदु। स्वन्तिबलय् थें झिलिमिलि मत च्याकेमाः धइगु नं मदु। लोडसेडिङं छुं हे मपं। थ्व हे नसाज्वलं माः धइगु नं मदु। खर्च नं जुइ मखु पसःत चाली मखुगुलिं। थ्व छगू तसकं मितव्ययी नखः खः। छथ्वःसिनं अर्बौं खर्च जुल, नोक्सान जुल धकाः कुंखिनेगु नं याः। छम्ह निम्ह थ्व नखः बन्द यायेमाः धाइपिं नास्तिकत नं पिहां मवःगु मखु। तर बन्द मयायेकं मन्त्री-मान्त्रीतय्गु न्हाय्पनय् च्वंगु कपाय् लिहां वइ मखु धइगु नं धापू दु।
सिलाचःर्‍हेबलय् सिँ च्याके थें दुवातय् दुवातय् टायर, मोटरसाइकल, रिक्सा, मोटर च्याकेगु गुलि न्ह्यइपुसे च्वं। यःसिं क्वःथः थें बार, रेलिङ्ग क्वःथलेगु आहा ! भाराकुरा तछ्याये थें गाडीया न्हाय्कं तछ्यायेगु मज्जा सुनां ध्वयेफइ? भुतुमालि ब्वयेके थें झण्डा ब्यानर ब्वयेकेगु अझ उकी थारा थारा न्हुइकीगु नारा च्वयेगु। गथांमुगः, गुंपुन्हिबलय् थें पुतला जात्रा, पुतला दहन। स्वन्तिया रकेट थें टियर ग्याँसया कुँ थनेगु गज्याःगु रोमाञ्चकारी? थुकथं फुक्क नखःयागु एकमुष्ठ मज्जा कायेखनीगु। थुकिं यानाः नखःनिखः न्यायेके मलाःपिंत थ्व नखः द्यःया वरदान धाःसां जिउ। छकः निकः थ्व जन्मन्हि थें नं च्वना वइगु, 'ह्याप्पी बन्द डे तुयू' नं धाये मास्ते वइगु। थुकथं थ्व नखः वैज्ञानिक, धार्मिक, मार्मिक, राजनैतिक, साँस्कृतिक, आर्थिक, स्वार्थिक न्ह्यागु दृष्टिं नं ताःलाःगु नखः खः। थ्वयात विश्वव्यापीकरण यायेमाःगु दु। प्रचार प्रसार यानाः पर्यटकत दुकाये माःगु दु। न्ह्याम्हेस्यां न्ह्यागु धा, थ्व छगू नमुना नखः खः। 'ह्याप्पी नेपाल बन्द !' सेम टु यू छकः धायेगु मखुला ?

More Stories Like this