जनजातिया बन्द शान्तिपूर्ण
थाय्थासं जनजाति कार्यकर्तात ज्वना यंकल
येँ (सन्ध्या टाइम्स)/आदिवासी जनजाति वृहत्त मोर्चा, नेपालं थौं आह्वानयाःगु नेपाल बन्द ज्याझ्वः शान्तिपूर्ण जूगु दुसा सरकारं धाःसा प्रदर्शकनकारीतय्त हस्तक्षेप यानाः न्यय्म्हं मल्याक ज्वना यंकूगु दु ।
आत्मनिर्णयाय अधिकार, जातीय स्वायत्तता नापं स्वाशान, प्राकृतिक श्रोत साधनय् आदिवनसी जनजातितय्गु अग्राधिकार, राजनीतिक अग्राधिकार नापं थीथी कथंया मागयात न्हूगु संविधानय् सम्वोधनय यायेमाः धकाः माग यानाः थौं उगु मोर्चां नेपाल बन्द आह्वान याःगु खःसा बन्द आह्वान यायेत माओवादीया सभासद् सुरेश आलेमगर, नेपाली कांग्रेसया सभासद् रत्ना शेरचन, नेपाः राष्ट्रिय पार्टीया सभासद् बुद्ध साय्मिपिन्सं थाय् थासय् जुलुसया नेतृत्व यानादीगु खः। बन्द आह्वन यानातःगु हुनिं देय्न्यंकंया जनजीवनय् लिच्वः लाःगु दु। मोर्चां थौंया बन्द शान्तिपूर्ण कथं यायेगु धकाः निर्देशन ब्यूगु हुनिं थौं प्रदर्शनकारीतय्सं बन्द अवज्ञा याःगु द्धपंबियाः छगः नं गाडी तोडफोड यायेगु ज्या मजूगु खः धकाः धाःगु दु ।
सरकारं धाःसा सडकय् प्रहरीत ब्यापक रुपं परिचालन याना थौं सुथय् बानेश्वरं देवेन्द्र खलाङ, धिरेन बाहिन, हिमनाथ छिरिङ नापं न्याम्ह, चाबहिलं दाबा साङमो भोटे नापं नीन्याम्ह, बालाजुं गुम्ह, महाराजगंजं छगू दर्जनं मल्याक ज्वना यंकूगु दुसा विरातनगरय् नं न्याम्हेसित ज्वंगु उगु मोर्चां धाःगु दु ।
