याकनं संविधान दयेकेत जनजातिया दवाव

सरकारं थ्वहे वइगु जेठ १४ गते तकया दुने न्हूगु संविधान दयेकेगु धकाः तयार याना तःगु कार्यतालिका पूवंके मफइगु संकेत खने दयेवं उकियात दवाव बी कथं आदिवासी जनजातितय्सं थीथी कथंया संघर्षया ज्याझ्वः याना वयाच्वंगु दु। थ्वहे झ्वलय् थौं बन्दया आह्वान नं यानातःगु खः। यद्यपि बन्दया न्हि धाःसा इस्वी संवत्या न्हूदँ कुन्हु लाःगुलिं सर्वसाधारणं उकियात ययेकाच्वंगु मदु ।

बहुलवादयात स्वीकार यायेधुंकाः इस्वीया न्हूदँ नं आः नेपाली जनताया हे छगू नखः जुइधुंकूगु दु ।

अथे खःसां मुख्य खँ न्हूगु संविधान दयेकेगु ज्याय् राजनीतिक पार्टीतय्सं यानाच्वंगु आलटालया खः। संविधान दयेकेगु न्हि सतिना वःसां संविधान दयेकेगु ज्याय् वयाच्वंगु सुस्ततां आः आम जनता इलय् हे संविधान तयार जुइ धइगु खँ पत्याः यायेत तयार मदु। न्हय्क्वः तक संविधान निर्माणया कार्यतालिका संशोधन यानाः संविधानसभा थः हे अविश्वास व अनिश्चितताया दलदलय् फँसे जुयाच्वंगु दु। वास्तवय् देशय् इलय् संविधान दयेकेगु ज्या जुइ मखुत धइगु वाःचायेकाः हे थीथी ख्यलं थज्याःगु दवावमूलक ज्याझ्वः शुरु याना हःगु खः। छुं जुयाः देशय् न्हूगु संविधान तयार मजुल धाःसा अधिकारं बञ्चित जुइमालीपिं ला थ्वहे आदिवासी जनजाति, दलित, मिसा, मधेशी पुचः हे खः। न्हापांनिसें शासनय् एकाधिकार कायम यानाः च्वनाच्वंगु जाति व समुदाययात ला पुलांगु हे संविधान काफी जू। न्हूगु संविधानं व बाहेकया पुचःयात अधिकार बीगु आशा यानातःगु खः। उकिं संविधान मवल धाःसा गुगु पुचः आशां द्याये मालीगु खः उमिसं न्हूगु संविधानया लागिं दवाव शुरु याइगु अस्वाभाविक मखु ।

More Stories Like this