कायपिनि जंक्व लिपा मांया प्यक्वःगु जक्व

कृष्ण प्रजापति

ख्वपया वडा नं.४ क्वाथन्डौया प्रशन्नशिल महाविहारय् च्वंगु विश्वकर्मा छेँय् म्हिगः छगू तःजिगु लसता जुल। लसता थ्व अर्थय् जुल कि थः निम्ह निम्ह ज्याःजंक्व क्वचाये धुंकूपिं कायपिनि न्ह्यःने च्वनाः सछिदँ दुम्ह मां छलमाया शाक्यया तःजिगु ज्याःजंक्व जुल। सछिदँ न्ह्यः भ्वँतय् गणेशकुमारी शाक्यया म्ह्याय् कथं बूम्ह छलकुमारीयात झिंच्यादँ दुबलय् ख्वपय् बिया हःगु जुयाच्वन। न्हापांम्ह काय तीर्थराज शाक्य चय्छदँ न्ह्यः बूगु खःसा निम्हम्ह काय विक्रमराज शाक्य न्हय्न्हय्दँ न्ह्यः जन्म जुल। थुपिं निम्हेसिगु नं ज्याःजंक्व क्वचायेधुंकल ।

छलमाया शाक्यया थ्व प्यक्वःगु ज्याःजंक्व खः। उकिं वय्कःयात म्हिगः खतय् तयाः देय् चाःहीकेगु ज्या धाःसा मजू। तर क्वंचाय् दुत छ्वयाः उगु क्वंचा प्वाः खनाः पित हयाः मिसा मस्तय्त याइगु फुक्कं संस्कारत इहि, बाराः व इहिपाःया विधि तकं छक्वलं याःगु खः। प्यक्वःगु ज्याःजंक्व यायेवं तुयूगु सँ हाकुया वइगु व हाया वनेधुंकूगु वा नं हाकनं न्हू कथं बुया वइ धइगु जनविश्वास दु। थथे यायेगुयात देवरथ महारथारोहण धाइगु चलन दु ।

छलमाया शाक्यया प्यम्ह काय् दु। निम्ह ज्याःजंक्व याये धुंकूपिं द्यः समान जुयाः उमिसं पूजापाठ याये मजिउ धकाः मांया उगु ज्याजंक्व ज्याझ्वः स्वस्वं टेलिभिजन च्यानलतय्त अन्तर्वार्ता बीगु ज्याय् जक व्यस्त जुयाच्वन। ८१ दँ दुम्ह तीर्थराज शाक्य व उकुन्हु खुला न्ह्यः तिनि ज्याःजंक्व याःम्ह विक्रमराज शाक्य धुंकाःयाम्ह हिरण्यराज शाक्यं मांया ज्याःजंक्वया फुक्कं विधि पूवंकूगु खः। वयां नं क्वय् रुपकाजी शाक्य छम्ह दनिसा पंचसुन्दर शाक्य नांया न्याम्हम्ह काय् स्वदँ न्ह्यः मदुगु खः। तिलकराज शाक्य धाःम्ह काय् धाःसा मचाबलय् हे मदुगु खः। छलमाया शाक्यया भाःतम्ह हेरामान शाक्य चाहिं २०३६ सालय् ७० दँय् मदुगु खः। बौद्ध परम्परा कथं सछिदँ क्यंगु लसताय् यायेमाःगु परम्परागत पूजा याये सःपिं गुर्जुपिं ख्वपय् मलुइवं यलया माइला गुर्जु हयाः पूजा जूगु खः। जंक्व ज्याय् म्ह्याय्पिं चैत्यशोभा व लुपुशोभा नं सहभागी जूगु खः। न्याम्ह काय्पाखें बूपिं छय्, छुइ व उइ नापं यानाः छलमाया शाक्यया सछिम्ह सन्तान दयेधुंकल ।

प्यक्वः ज्याःजंक्व जूगु थ्व लसताय् म्हिगः अन आतिशवाजी यासें बारा पटाखा मुइकेगु ज्या नं जूगु खः। सुथय् करिब निघौ न्ह्याःगु पुजा लिपा बहनी सञ्चार माध्यमत समेत दुथ्याःगु भ्वय् नं जूगु खः ।

ख्वपय् जूगु थ्व महत्वपूर्ण सामाजिक अवसरयात नेपाल टेलिभिजन, एभिन्यूज टेलिभिजन नापं मेमेगु नं सञ्चार माध्यमतय्सं प्रशारण याःगु खः। गुलिं च्यानलतय्सं उकिया डकुमेन्ट्री हे दयेकाः प्रशारण यायेगु खँ नं धाःगु दु। थज्याःगु दुर्लभ संयोग म्हो हे जक भाग्यमानी परिवारं चूलाके खनीगु खँ स्थानीय मनूतय्सं धयाच्वंगु दु ।

More Stories Like this