प्रम लिथ्यनेवं न्हूगु समीकरण ?
प्रम नेपाल थौं लिथ्यनीगु
येँ (सन्ध्या टाइम्स)/प्रधानमन्त्री माधव नेपाल चीनया भ्रमण क्वचायेकाः थौं बहनी नेपाः लिहां झायेत्यंगु दु ।
चीनं नेपाःया प्रधानमन्त्रीयात सन् २००९ तकया दुने थःगु देशय् स्वागत यायेगु धकाः घोषणा याःगु खः। धाः गथे अथे हे सन् २००९ या डिसेम्बर २६ कुन्हु थःगु देशय् सःताः सन् २०१० क्यने स्वयां छन्हु न्ह्यः लित छ्वया हःगु दु। प्रम नेपालया थ्व चीन भ्रमण अतिकं सफल जूगु खँ भ्रमणय् दुथ्याःपिं दुजःतय्सं धाःगु दु ।
उखे प्रम नेपाल नेपाः लिथ्यनेवं हे देशय् कायम जुयाच्वंगु गतिरोध चीकेगु लागिं नं पहल शुरु जुइगु खँ धाःगु दु। वय्कः थौं नेपाः लिहां झायेत्यंगु दुसा सम्भवतः थौं हे स्वंगू दलया शीर्ष नेतातय् बैठक च्वने फुगु खँ सूत्रं धाःगु दु ।
प्रम नेपाल स्वदेश लिहां वयेवं हे सरकारया समीकरण हिलेफुगु अनुमान थन जुयाच्वंगु दु। नेपालयात चीन भ्रमण छगू याकाः वयां तुरुन्त हे लिपा मेम्ह हे मनूया नेतृत्वय् राष्ट्रिय सरकार गठनया तयारी जुयाच्वंगु खँ सूत्रतय्सं धाःगु दु। यदि मेगु सरकार कांग्रेसया सुं नेताया नेतृत्वय् गठन यात धाःसा उकी माओवादी नं वनेफुगु खँ नं सूत्रं धाःगु दु ।
