येँदेय् सफा यायेगु जिम्मा निजी क्षेत्रयात

राजधानी येँदेय्या फोहोर व्यवस्थापनय् वयाच्वंगु समस्या समाधान यायेगु लागिं आः थुकिया जिम्मा हे निजी क्षेत्रयात बीगु तयारी जुयाच्वंगु समाचार वःगु दु। येँदेय्या फोहोर व्यवस्थापन यानां याये हे मफुगु ज्या मखु। तर थ्व ज्याय् थीथी थासं वइगु अनावश्यक समस्यां यानाः थुकियात छगू दुरुह ज्या थें दयेका बिउगु दु। गबलें कर्मचारी हडताल, गबलें स्थानीय जनताया विरोध, गबलें कुचिकार हडताल आदि आदि थेंज्याःगु समस्यां फोहोर व्यवस्थापनयात नं छगू 'समस्या' दयेका बिउगु खः। सम्भवतः थ्वपाखें मुक्त जुइगु लागिं हे थुकिया जिम्मा निजी क्षेत्रयात बीगु सोच वःगु जुइमाः ।

खतुं फोहोर व्यवस्थापनया जिम्मा निजी क्षेत्रयात बीगु धकाः न्हापा नं छक्वः चर्चा जूगु खः। तर मनपाया कर्मचारीतय् विरोधं यानाः थ्व ज्या न्ह्याः वने मफुत ।

तर थौंया ई यक्व हे हिलेधुंकल। त्वनेगु लःया व्यवस्थापन यायेगु जिम्मा तकं निजी क्षेत्रं कायेधुंकल। थथे निजी क्षेत्रयात जिम्मा बीबलय् बरु संस्थायात अःखतं लबः दइगु जुयाच्वनी। यदि फोहोर व्यवस्थापनया जिम्मा कयाः उकियात साः दयेकेगु, विद्युत पिकायेगु आदि थेंज्याःगु ज्या यानाः लबः पिकायेगु यात धाःसा उकिं मनपां रोयल्टी नये खनी। फोहोर व्यवस्थापनया जिम्मा निजी क्षेत्रयात बियाः यदि मनपायात लबः हे दइगु खःसा थ्व पलाः ल्ह्वनेत ग्यायेमाःगु आवश्यकता मदु। बरु जिम्मा काइगु निजी निकायं सर्वसाधारण जनतायात गज्याःगु भार बीगु खः, फोहोर चीकेगु ज्या गुलि पत्याः यायेबहः जुइक याइगु खः, कर्मचारी व्यवस्थापन गय् यानाः याइगु खः, थ्व खँय् धाःसा न्हापा हे क्वातुगु सहमति दयेकेमाः ।

More Stories Like this