योगिता महर्जन जुल मिस नेवाः

थुगुसी जूगु मिस नेवाः धेंधेंबल्लाः कासा त्याकाः मय्जु योगिता महर्जन थुगु दँया मिस नेवाः जुयादीगु दु। म्हिगः नेपाल प्रज्ञाप्रतिष्ठानया हलय् जूगु ज्याझ्वलय् मेपिं ३५ म्ह मिस्तय्त छखे लाकाः मय्जु महर्जनं थ्व उपाधि ल्हातय् लाकूगु खः ।

उकथं हे फर्स्ट रनरअपया सिरपाः मय्जु सबिना डंगोलं त्याकूगु दुसा सेकेण्ड रनरअपया सिरपाः मय्जु एलिसा श्रेष्ठं त्याकूगु दु। फर्स्ट रनर अपं ३० हजार तका व सेकेण्ड रनर अपं १५ हजार तका दां सिरपाः त्याकूगु खः ।

मिस नेवाः उपाधिया नापनापं योगिता महर्जनं ५० हजार तका दां व छगः ल्यापटप कम्प्युटर त्याकूगु दु।
मिजंतय्सं दिमागं सोचे याइ, मिस्तय्सं नुगलं सोचे याइ धइगु धापूयात कयाः थःगु बिचाः बिउ धइगु न्ह्यसःया सुन्दर लिसः बिसें वय्कलं थ्व उपाधि त्याकूगु खः ।

नेपाल वायुसेवा निगमया कार्यकारी अध्यक्ष सुगतरत्न कंसाकारया सभापतित्वय् जूगु उगु ज्याझ्वलय् हिक्मतबहादुर माली, सरस्वती मानन्धर व रीता महर्जनं म्येँ हालाः मनोरंजन बियादीगु खः। अथे हे मिस लिटिल नेवाःया मस्तय्सं हुलाप्याखं हुलाः क्यंगु खः ।

कासाया जजया रुपय् किशोर श्रेष्ठ, भाइराजा तुलाधर, रबिन साय्मि, कमलेश्वर तुलाधर, सुधीर खत्री, डा. शिक्षिता श्रेष्ठ व केएम रंजितकारपिं च्वनादीगु खः ।

थुगुसी ल्यःम्ह मिस नेवाः न्याम्हम्ह खः। थ्व स्वयां न्ह्यः सविता श्रेष्ठ, सुविता प्रधान, सुप्रिया तुलाधर व आकाशा वज्राचार्य मिस नेवाः जुइधुंकूगु दु ।

कासाय् बेस्ट ड्रेस लाःम्ह मय्जु हाकु पतासियात हे मिनी स्कर्ट दयेकाः थःगु सिर्जनशीलता ब्वःगु खः। अथे हे मय्जु श्रृष्टि श्रेष्ठं नेवाःतय्सं थीथी सांस्कृतिक पर्वय् ब्वइगु समय्द्वँयात हे वसः दयेकाः अतिकं जतनपूर्वक प्रस्तुत यानादीगु खः। उकिया आकर्षण व सिर्जनशीलतायात ध्यान बिसें वय्कःयात 'सन्ध्या टाइम्स' न्हिपौपाखें न्याद्वः तकाया सिरपाः नं अन लःल्हाःगु खः ।

ज्याझ्वलय् पिने जिल्लां ब्वति काः वयाच्वंपिं तेह्रथुमया शिखा श्रेष्ठ, धादिङ्गया सरु श्रेष्ठ, दोल्खाया विपना श्रेष्ठ व ओखलढुंगाया वर्षा राजभण्डारीयात मिस नेवाः ज्याझ्वःया लागिं जिल्ला एम्बेसडर घोषणा याःगु खः। ज्याझ्वलय् दोल्खाया मय्जु विपनां द्वाल्खा नेवाः भाय् ल्हानाः सकसितं प्रभावित यानादीगु खः ।

ज्याझ्वः नेपलिज फेशन होमया ग्वसालय् जूगु खः ।

More Stories Like this